26
1 Epe kone na-i aa meda adaa bi katare gore na-epe ta.
Gore yai radaki raapu nare palu loapeade-rupa mada yade. Eta napeta rabu yai radaaki apaa lopea-rupa mada yade.
2 Aa medame pupitagi nanalia pare Gote-me go aa pa tina agaa tea-daare go agaana ini mada namadiaalia.
Nimuna agaare yaanumi repena palaa madaa napiralia pare pa biyaa pamea-rupa mada yade.
Goa pea-pulu ini namadini agaa teme.
3 Aanumi ose-mena aipapulu penalo aipuya unimi teme-rupa mada yade.
Gore dogi-menana agaa-para aeyane-me pora epe-rupa ma-puaeme-rupa peme.
Wae maeyae peme onaa goa napape loa teme-rupa mada yade.
4 Aa meda nipu epe redepone kone nasalia-daare nepara epe agaa meda natea. Goa palia-ga neme nipuna agaa na-abulape:
Neme nipuna agaa abute raburi wala nipumi pea pali.
5 Epe kone nai aame ne-para wae agaa tea-daare nipuna agaa abulape.
Na-abute raburi nipumi makua kone ora epeta kone salia.
6 Kone waru na-i aa meda-para go agaa laketa pu loa penatedare gore nena ne bipa ne maoyaayawa nena ke mea kepe rube nona palia.
7 Epe kone napiri aame epe agaa meda lano kone sua tea-daare mogo tea agaa epe-rupa mada natea.
Go agaare ke wae aa-na pora pamea-rupa rado yade.
8 Epe kone nai aa meda aa mudu bi kateme-daare nipumi etaa madaa aana mapagaawa pitalo peme-rupa mada peme.
9 Aa meda epe kone nasua nipumi epe agaa meda pa lano kone sua tea-daare ipa bia neme aanumi ope etolo etolo-ae kimi ripinaae nona-palia.
10 Surube aame kone waru na-i aanu kogono katalo paliare onaa adaapu ae-para etaa mada pi moneaya.
11 Kone waru na-i aamere nipuna abade maeyae-rupa wala maeyaaya.
Go peare yana-me maaku ratu ruboa wala mea neade-rupa mada pea.
12 Aa meda epe kone nasaliadare niaame nipu mada rabamua epe kone mogealima pae? Maria.
Pare go aa nipumi oyae luabu makuaayo kone salia-dare niaame go aa agaa mana loa rabameape-rupa mada dia.
13 Kiaa rakepene aa nipuna adapara pa piruaawa nipumi gupa ta.
Mo pora mena laiyono aaya kone sua pala omoa napea.
14 Kiaa rakepene aa nipumi nipuna ada runane patua pereke pereke tupia ada dua warini inisisi lego lego malaawa runane piruaaya.
15 Kiaa rakepene aame eta aipapulu mea nolalo nipuna ki pelete madaa ia.
Goa pea pare nipu mo eta minasaawa agaa-para mea nape-rupare puri na-ia.
16 Kiaa rakepene aame epe kone i aa (7) kerepopu na kone rabuaayo kone ia.
Goa kone sua nipumi aakone waru ia.
17 Gore aa laapome yada yada pua ratu yawalipi rabu aa medame nipu pua rabamealia-dare go aa nipu yana pupulaina aane pua ripinae nona pia pea.
18-19 Aa medame nipuna adami aa makiratalo puare wala orope gupa tea.
Neme pa raapa agaa lawade ta.
Gore maeyae aame repena agaa lusu ruboa etaane rubebe mada pea.
20 Repena kaapu repena ralae-para na-iralimi raburi gore repena naralia.
Go page aanumi maa agaa natemere go yaweme ratu dia yalia.
21 Repena kaapu waru iritimi rabu repena ora waru reade.
Gorupare ada pi agaa ta aamere yada agaa ora ma-adaayaya.
22 Niaame aa yago medana maa agaa pame rabu go agaa pagape madaare raname waru omema.
Go teme agaa-re epe ta kone sua epe eta-rupa mea neme.
23 Aa medame epe-rupa awape agaa puri paloa tea-daare ora yapare mo konena rere waea papena ta.
Gore sumi warini sosopen-rupa yapare wala silipa golme warini nona mapaaeme.
24 Gore aa medame aa yaago meda raname na-omaliare pa agaame makirae kone sua nimu rana omana kone inalo pea.
Nipu makinae kone sua pea.
25 Go piaene aanuna agaare nena aaneme pagape mada ora rede waru palia pare neme nipuna agaa madaa kone narulape.
Gore akolo ya? Nipuna kone pu robaa-para wae kone luabu pa rubitabea.
26 Nipuna pu lo robaa-para ia wae kone raayo pagaa salia pare onaa luabumi nipuna wae kone adoa makualimi.
27 Aa medame nipuna bipa nipu wae yaenu pa pu aano kone sua paliare nipuna bipa nipu otaa. Gore aa medame koyati pa onaa awena kone sua ia pare wala nipuna bipa mo koyati patemede-rupa mada pea.
Gore aana agaare rudu madaa sone mea pea pare wala perene ipua nipu epa tea-rupa mada yade.
28 Aa medame aa yago meda yaa agaa medaloma laketea-daare nipumi yaa agaa loa onaa ma-oyape mada pea.