23
6
1 Ne adaa aa meda raapu pirua eta no pirali-daare ne pa mo gialia eta madaa kone sua pirali.
2 Go page ne eta ora adaapu ne aa yaliare nena lo robaa rabuaniaawa gimape.
3 Neme mo aa muduna eta madaa ora pea kone nasape.
Neme mo eta madaa omeme pali rabu aa adaa nipumi raana naome aanu medaloma palilo lagialo.
7
4 Ne mone orae amo aa mudu pirano kone sua kalai ogeapu pape.
Gore ne mada epe kone piralia-dare goanu napape.
5 Neme mone adaapupe sali pare go mone ora aipapulu dia yalia.
Gore mone nipu yaa-itaa madaa popaa maawa riyaa palia rabu ne ipa ripi ralia.
8
6 Oyaenu narumaae aa raapu eta padane-para nanape.
Nipuna gialiade eta agu nolalo kone nasape.
7 Go piaene aa raapu eta nali-dare mo aame ne gupa lagialia. Eta ipa oyae luabu apo ia-ga nena raana palia-rupa aipapulu nabape tea.
Goa tea pare ora agaa-da nata ne eta nali-rupare aba gupa nalialo nipuna kone-para makuaaya.
8 Goa pua neme eta no kiritua aana pea luabu ado kirituare mo mea nalide eta luabu wala maaku ratu rubali-ga mo tede omeme pi agaa page puri napaloa ini namadialia.
9
9 Aa meda kone epe-rupa nasalia raapu neme agaa nalape.
Neme epe agaa nipu lakete-dare go agaa pa sa so lalia.
10
10 Ora abade su robo isimidere neme wala yolamonea meda nasape.
Neme agi aaraanu aba ome onaana su page nameape.
11 Adaa Aa-re amame padane-para madini nona pi aaya-pulu mo nogo naakinu rabamealia.
Goa pua nipumi puri adaa mua raba mulalo puri waru paloa koso madaa page rabamulalo pea.
11
12 Gore ne agaa mana lagialoga go agaa mana waru pagoa makuape.
Nena aane waru luyapa-ina pagoa go agaa waru makuaaliri epe yae rayo waru makuaali.
12
13 Neme nogo naaki tua kuma mapape madaare paalame naomape.
Neme agaa mana loa tali-daare nipu na-omalia.
14 Dia neme goa pali raburi maredepo yali-daa nipu ome onaana su-para mada napalia.
13
15 Naakinumi epe kone-para epe makuae yae mealimi rabu nena pu robaa-para page ora epealia.
16 Neme nena epe redepone agaa pagape madaare raana ora waru pea.
14
17 Neme waea peme aanuna pemea adoa epame na-omape.
Oro yalo neme Adaa Aa madaa raana omo pirua kone sape.
18 Neme go pora ratu pirali-dare nena orope pirape yaere ora epeaalia.
Goa puare ne page ora aipapulu mada na-omali.
15
19 Naa naakimi naa agaa pagoa epe kone mea.
Goa puare nena pora pamuali-rupa pawa adoa pamuape.
20 Nere ipa waini-para eta ora adaapu neme aanu raapu padane-para napamuape.
21 Ipa bia-para eta adaapu neme aanu nimu ora naraa piralimi.
Go yapare aa medalomame pa ipa agu noa u-patu piraliare nimu mamina riripipape pi yamoa piralimi.
16
22 Nena aapame ne maopasa-ga nipuna agaa waru pagape.
Nena aama page ogae yalia rabu ne ora waru yae-da kalape.
23 Neme ora waru puri paloa epe kone-para epe kogono pape-para epe makuae yae meape madaa puri paloa kogono pape.
Neme go epe kone narubape.
24 Gore aa medame epe kone sua epe pora ratalia-daare nipuna aaraame go naaki madaa raaname ora waru omea.
25 Neme go agaa pagoa epe pora luabu ratali raburi nena aama-aapame ne ora epe ta loa adaa raaname omoa pedo pedo waru palipi.
17
26 Go naaki neme nina kone ora waru adoa naa agaa pago pirali-daare epe yae luabu adaina.
27 Wae paake aa rume onare ipa naaku meda-rupa yapulu go-para lopoladere pua omaalimi.
28 Go piaene onanuri paake ne aanumi pemede-rupa surubaeme-ga waru adalepape.
Nimumi aa adaapu rumeme rabu aaninumi gimeme.
18
29 Aa apimi kedaa naloa nipuna bipa odo omea pae?
Aa apimi agaa adaapu loa yada marekaaya pae?
Aa apina to madaa rere pia pae?
Gore apina inipara ora ka-nea loa ayapae?
30 Go aanu luaburi oro yalo ipa bia-para wain lapo noa maeyae aanu yade.
31 Mo wain nipu epe pepena pua ranapi yae saliare nena kone-para ora mea gi tea gimape.
Nena peto-para page mea nali rabu rede-ora waru palia.
32 Wala ekeraa ribareko raburi paaka wae medame onaa nalade-rupa mada palia.
33 Gore nena kone luabu ora oyalia rabu neme oyae rado meda ade nona palia.
Neme goa pua makirae agaa adaapu te.
34 Goa pua ne pate raburi ipa sipi mo solowara mada pulaina so sipina ini kadu madaa piri nona palia.
35 Goa pua neme gupa te.
Ni tamede pare radaa napea te.