17
1 Aa medame nipuna ona naaki nogonu raapu lo-robaa padane sua piralimiri nimumi eta ragota page pa salimi.
Go-me mo adaa eta yawo neme onaa-me pemea page rabuniaya.
2 Gore kogono naaki medame epe kone sua kogono palia rabu nipuna surube aana si-rupa piralia.
Mo surube-aana wae naaki nipu mo kogono naaki-na rolo-para piralia. Goa pua mo surube aa omalia rabu oyae nipuna nogo naaki ruru raapu rumaalimi.
3 Adaa Aa-me niaa wae aa yapae epe aa yapae loa rumaa adolalo pea.
Gore golo silva yapame adolalo repena egaa-para iritimide-rupa niaa epeta pae ota pae lo adolalo pea.
4 Wae agaa lo ipa awaalae agaa teme aanu nimumi mo nimuna wae agaa lape mada aane luyapainaloa waru pageme.
5 Gote-me onaa raayo warisa. Aa medalomame naara aanu-para ero loa wae agaa temere nimumi Gote-para teme.
Aa medame aa yago medana kedaa rialia rabu raname omalia-dare go paliade pedome nipuna bipa nipu wae yoto mealia.
6 Aa meda nipu ogae yalia pare nipuna akuaa naaki-nu piralimiri raana waru omalia.
Gore akolo ya? Gomere nimu adaa bi kata rabu nogo naakimi nimuna agi aaraanu raname omeme.
7 Epe kone sua agaa temere kone na-i aanuna agaa-rupada nateme.
Ora agaa riaare yaa agaa teme aanuna agaada dia.
8 Omeme pua waea pape madaa aa medalomame mone oyae meme pare nipumi aba adea.
Go monere ona rakia nonapiane meapa yana kone sua nipuna raana epea-rupa ratea.
9 Aa medame nipuna adami aanu raapu epe-rupa pirano kone saliare nipumi aba pisade pupitagi pename namea salia.
Aa medame aba pisade wae yaenu madaa agaa pamu teare mo aa nipu ratu yawalia.
10 Neme epe kone i aa meda raapu agaa maredo yaatalo palipiri agaa rana padane te rabu nipumi makuae yae aipapulu mealia.
Go yapare neme wae kone i aa maredepo yatalo pali-dare nipu kalaipu ma-epeali. Goa pali pare nipuna kone aipapulu na-epealia.
11 Waea pi aame-re yada papena agaa agu marekaaya.
Goa pea rabu wae aa meda ipua nipu radaa waru pina talia.
12 Neme mena-beana si ripina mua mea epali rabu kiraa mena nipu poraania madaaliri ne epaa tu naalia-rabu adaa radaa nali.
Goa palia pare aa meda epe kone nasua waea pulalo pea aa poraa adali rabu ne tu-nalia.
13 Gore nimumi aa meda epea pulalo paliri go aame wala wae yaeme abutea rabu oro yalo nipuna onaa nogo naaki luabu wae-rupa pirualimi.
14 Aa medame ratu yawe kone marekaliare ipa naaku robo sua ipa popenaloa poaya-rupa mada.
Goa palia-dare nipu gimoa waea naepalia rabu epealia.
15 Adaa Aa-me go kone laapo gimi omea.
Pupitagi ne aa pa pirina teme page waeanu napi aa madaa pama kedaa mea kateme page gimea.
16 Naaki meda epe kone nasaliare nipuna aalu waeame regepe ta-pulu nipu makuae yae mada namealia.
Gore mo aana alu regepetaga sukulu kabape mone wala akolo mea epenaya?
17 Niaana adami aanumi oro yalo niaa raaname omeme.
Goa pua kedaa ritima rabu niaana kedaa rabamu ritalo nimumi managola pimi.
18 Kone waru na-i aanumi aa medana yago nimumi abulalima loa nimumi mada na-abulape yapare pama yaa agaa teme.
19 Waea pape madaa raaname omea aamere wala yada pape madaa raana omo yada marekaaya.
Go page aa medame nipuna bi minasaaliare go aa nipuna bipa nipu omape yae asapea.
20 Aa medame oro yalo wae kone su wae agaa agu teare nipu oro yalo epe-rupa mada napitia.
Dia nipu wae-rupa agu pirualia.
21 Aa medana simi epe kone nasaliare oro yalo aaraa nipu lo-robaa keda mu aalia.
22 Lo robaa kuma pua raana piamere marasini noa epe-rupa pimi-rupa mada pia.
Go yapare aa meda nipuna kone oyaliare wae yainame mo aa nipu ripinalia rabu uni-para yaina aawa maadapalia.
23 Waea pi aa nipu koso pagape yapidi medame pa laga taliare omeme pua kabe reke mua koso maoyaalia.
Goa pua nipumi mo koso ma-oyaatalo mone mua raaname waru omalia.
24 Waru makuae aamere epe kone page epe pora waru ratea-pulu nipumi makuaya.
Go yapare waea aame epe kone naia-pulu oyae rado rado luabu pamu yota.
25 Aame wae maeyae kone rataliare go naakina agi aaraame lo robaa kedaa adaa mua nimuna kone-para oyalia.
26 Koso epe-rupa ta aa-para koso kabena temere gore naepeta.
Aa mudunumi epea palaina nimu wala aipuyaame talimiri gore naepeta.
27 Makuae yae waru mea aamere nipu agaa bebo nata.
Epe kone i aamere aipapulu ratu yawape page gimea.
28 Epe kone na-i aamere agaa loralia.