15
1 Aa medame ne-para ronopi agaa meda tea-dare nipuna agaa kumapimi abulape. Goa pali rabu nipuna ratu yawe kone dia yalia.
Go yapare neme aa meda-para ero agaa loa yala mapaliri mo aame ratu adaa yawoa ne-para ratu waru yawalia.
2 Aa medame epe kone sua epe agaa teare nimumi go aa-na kone makuae yae ora epeta loa raana omalimi.
Go yapare aa meda epe kone na-imi agaa tea-dare go agaa re nai agaa ta.
3 Adaa Aa-me su luabu-para pea yae rayo ada makuaaya.
Nipumi epe aa wae aa luabu ado kiritea.
4 Aa medame epe agaa onaa luabu laketa rabu go agaa pageme onaa luabu nimu laipi kalape repena nonapina agaa pagalimi.
Go yapare aa medame onaa-para wae agaa-teare onaa luabuna kone ma-oyalia.
5 Aa meda nipu epe kone na-saliare nipuna aapana agaa rasita.
Goa pea pare pa aa medame nipu agaa loa maredepo yaina gimaliare go aa nipu ora epe kone mealia.
6 Epe aanu nimu luabuna ada-para oyae ora adaapu imi.
Wae aanu nimuna mone-me nimu kedaa ora adaapu mea kata.
7 Epe kone imi aanumi onaa luabu epe kone kateme.
Go yapare epe kone rudu teme aanumiri goa page napeme.
8 Adaa Aa-me waea peme aanuna opa kateme yae luaburi ora gimea.
Pare epe redepone aanumi teme betene raana omoa pagea.
9 Adaa Aa-me wae aanumi peme yae luaburi ora raaname naomea.
Epe aanu nimumi agaa ratua peme rabu raaname omea.
10 Aa medame epe pora minarepaliare wae yoto mealia.
Aa meda nipu maredepo-yaina lape gimaliare nipu omalia.
11 Adaa Aa-me aba ome onaa luabu pimi-para ado kiritea.
Go su amaa onaa niaana ima kone page luabu ora waru aba ado kiritea.
12 Aakone i aamere pa aa medame nipu maredepo yaina kone ora na-ia.
Goa pea-pulu aa meda-para nipu epe kone gialepa natea.
13 Gore aa medana robaa-para epe kone saliare nipuna ini agaa-para epealia.
Go yapare aa meda nipuna ini agaa-para roke rialiare nipuna robaa-para ota.
14 Epe kone ia aamere puri palo kogono waru pua oyae meape madaa page makuae yae meape mada page kogono pea.
Go yapare wae kone i aamere maeyae agaa talo agu pea.
15 Aa meda nipu oyae rudu ta raburi oro yalo kone adaapu sua nipu wae-rupa piruaya.
Epe kone sua raana raana-me oroyalo ome aare epe eta nolalo peme rana mada omea.
16 Gore neme oge oyaesinu saa pirua Adaa Aa-na agaa pago ratua nipuna rolo-para piti-daare gore ne epe-rupa pirua kedaa riawa yaeme mone adapu i amope page rabuaniaaya.
17 Aa yago raana ome kone-re ririnane agaa go yade. Nena adami aanu raapu meda-para pirua padi raani no piralimiri gore epeta.
Go yapare raana naome aanu raapu gawa midi no pimidi rabuaaye. Gore nimu raapu mena no piri nona palia.
18 Ratu yawea aamere mo aa meda page ratu mayawaya.
Go yapare epe lo robaa kumapu i aame aanu medaloma-na kone lo rabaa pawa ma-epeaya. Goa pua nimu lo robaa padane-para sua mapiraya.
19 Kiaa rakepene aamere nipu epe kumapi-rupa pirape yaere ota kone ia. Goa peapulu nipu pa raa rugulua pamuaya.
Redepoya pia aa nipu oro yalo kagaa pirape yae epe ta kone ia. Gore epe poranini pamema-rupa madaa.
20 Epe kone i naakiri agi aarame raaname omepe.
Go yapare naakimi epe pora naratalia-re go naakimi agi aaraa gimaaya.
21 Epe kone na-i onaa-me maeyae kone ratape page pedo waru peme.
Go yapare epe kone ia aamere nipu oro yalo epe kone ratua epea pu aaya.
22 Neme kogono meda pulalo pali-dare aanu adaapuna kone aba meape. Goa pali raburi mo nena palide kogono luabu ora epealia.
Go yapare neme aa medana kone namealiri nena kogono ini namadialia rabu pama kalaipu kogono pusali.
23 Aa medalomame agaa lo pitimi rabu riaa lo kiritina loa neme epe agaa meda te-daare go rabu ne page raana palia.
24 Epe kone i aare so madaa porana opasari pea-pulu nipu epe-rupa pirape pada puaa mealia.
Goa pea-pulu nipu no rolopara-ia poranini pua ome onaana pada wala napua mealia.
25 Aa meda nipuna bipa nipuna bi minasalia rabu Adaa Aa-me nipuna ado bebo malalia.
Go yapare ona wasa aani aba omere rabamealia. Aa medame go onana su mada namealimi.
26 Wae kone luaburi Adaa Aa-na ini agaa madaa pugu waru pea.
Goa pea pare epe redepoyoa rolo ti agaa madaare nipuna ini agaa madaa epetada raana waru omea.
27 Aa medame mone adaapu orayo kone sua wae pora ratua mealiadare nipuna ona nogo naaki-na rikirane wae keda mea epea.
Aa medame nipu mone kanalo omeme pi kone wae narataliare nipu epe-rupa piralia.
28 Epe redepone aame kone aba waru niminaawa aa medana agaa orope abuta.
Go yapare wae aa-me agaa aipapulu talo pea raburi nipuna agaa wae luabu pa ta.
29 Waeanu peme aanu nimuri Adaa Aa raapu repara nae mopare yolamonea aeme.
Goa pua nipumi mo epe redepone aanuna betene teme rubu aane lobapaina pirua waru pagea.
30 Neme aa meda adali rabu ini agaa-para esepea raaname omalia-dare epe kone go ida.
Epe agaa remaa meda pagali rabu go remaame nena to yogane ora puri mapalalia.
31 Aa medame nipu maredepo yatalo palia rabu aane luyapa ina pirua pagaliri nipu epe kone sua makuaali.
32 Epe-rupa pirape madaa maredepo-yatalo palimi rabu agaa rasua gimaliare nipuna bipa nipu ma-oyaaya.
Goa pea pare aa medame nipu maredepo yatalo pea aana agaa pagoa rataliare gore nipu epealia. Goa pua nipuna kone page lobataboa nipuna makuae yae page epealia.
33 Adaa Aa-na rolo-para awalidare epe kone meape porana re go iada.
Nena bipa ne narabuniaawa epe pora narataliri gore ne adaa bi mada nameali.
<- Ol Provep 14Ol Provep 16 ->