13
1 Gore naaki medame epe kone saliare nipuna aapana agaa waru pagea.
Agaa rasini naaki-mere pa aanumi nipu maredepo-yaina kone na-ia.
2 Epe agaa ne aamere nipumi epe oyaenu mualia.
Go yapare yaa agaa ne aanuri nimumi rogaawa i agaa rasitimi. Goa pua onaa luabu ma-oyape madaa raaname waru omeme.
3 Aa medame nipu agaa abulu waru suruboa epe agaa loa aaliare nipu mada na-oyalia.
Go yapare wae agaa loaeme aanu nimu oyoa beboteme.
4 Kiaa rakepene aanumi oyae adaapu meawe kone sua aaeme pare nimume go yae mada nameme.
Go yapare radaa noa kalaipu kogono peme aanumi oyae adaapu meme. Gore oyae adaapu nimuna raana omeme-rupa meme.
5 Epe redepone aanu nimumi yaa agaa loa makirape madaare gimi omeme.
Go yapare wae aanumi yala pia agu pulalo peme pare nimu madaa yala paala an-ia.
6 Aa-me epea agu paliare nipuna go peame nipu surubea rabu epe-rupa piruaaya.
Goa pea pare wae-pupitagi neme aanu nimu go wae yaena yoto mua wae-rupa piralimi.
7 Aa riabo naara aa medalomame nimu mone oyae adaapu sawe kone madaa makirae kone suaeme.
Amope mone oyae ora adaapu i aanumi page go-rupa mo aa naaranumi imi kone sua aeme.
8 Gore wae aanumi amone aa tulalo palimiri nipumi mone oyae adaapu mogo aanu kaloa epe-rupa piralia.
Go yapare aa riabo naara nimuri oyae page naimi-pulu wae aanumi nimu nabebolaeme.
9 Epe redepo aanu nimuri laba paa roaya-rupa mada pimi.
Pare wae aanuri mo laba oyoa uduna repe-repe piade piaene pimi.
10 Pupitagi nape konemere go aa kone wae madaa yada ratu runane mea pea.
Go yapare aa yago medame nipu maredepo yaina kone ia aare epe kone sua waru makuaya.
11 Aa medame kogono napi pama awa ode mone mualiare go mone ora dia yalia.
Go yapare aa medame kogono pua mone pawa oge-ogepu mea kirita samama pua ma-adaa yalia-dare go mone ora adaa yalia.
12 Aa medame oyaenu meda mealua kone sua adaalupu suruboa namealiare nipu lo robaa kedaame omalia.
Goa palia pare nipumi go oyae mu minuare nipuna kone pu robaa-para page epe ta kone sua raaname omea.
13 Aa yago medame aa meda epe agaa epe pora waloa agaa mana laketalo palia rabu nipumi gimalia-daare go aa nipu oyalia.
Go yapare aa medame agaa maana teade waru pagalia-daare go aa nipu epe-rupa pirualia.
14 Epe redepone aa-na agaa ora epe ta-pulu ipa laipi epe-rupa oro yalo pirama lama pope ipa-rupa pia.
Go agaa-me aa rabamealia rabu epe-rupa pirua wae yae madaa pakealimi.
15 Gore aa medaloma epe kone saliamiri onaa medalomame nimu bi minasalimi.
Go yapare rogaa i agaa rasini aanu nimu wae pora ratua pamueme.
16 Aanu epe pora ratua epe kone salimiri epe kone aba sua oyae peme.
Go yapare wae-rupa agaa lo wae pora rateme aanu nimuna pemeanu luabu pename amaa mea watea. Goa pua nimuna maeyae kone pename amaa ia.
17 Gore agaa yaa loa makirae agaa pereke-pereke teme aanu nimu wae kedaa mea epope kone sua aeme.
Go yapare aame agaa mea ipua go agaa redepone onaa lakeloa epe-rupa rabamealia-dare epe-rupa pitimi.
18 Aa meda aa yagome nipu maredepo-yaina kone na-i nipuna bipa nipu kone-kone sua aaliare nipu oyoa aa naara pirua ora wae-rupa piralia. Goa pua nipu yala polo aalia.
Goa palia pare aa meda nipu pa onaame maredepo yaina kone sua maredepo yaina teare go aa nipu onaa luabumi epe bi kateme rabu ada bi mealia.
19 Aa medame whose friend oyae meda mealua kone sua orope mealiare nipuna lo robaa-para raana adaa omoa pedo pedo adaa pua aalia.
Go yapare wae aanu nimumi nimuna wae yae gimae kone na-i pa pu aaeme.
20 Go yapare go aa nipu epe kone i aa raapu pora pamualiare go aa nipu page go aa-na kone mua nipu epe kone raapu pamualia.
Go yapare aa meda nipu wae kone i aa raapu pamualiare go aa nipu wae yaeme nipu mealia-pulu wae pupitagi-na rolo-para piralia.
21 Wae yaeme pupitagi ne aa nimu ora mulalo rapea.
Pare epe redepone aanu nimuri nimuna meme epe yaere nimuna yoto-rupa meme.
22 Epe aa meda nipu omea raburi nipuna sinu page nipuna oyae luabu nimu meme.
Go yapare wae aanumi oyae adaapu mea kirita imi yaenuri orope epe aanumi mealimi.
23 Naara pimi aanuna e-maapu-para eta nape oyae adaapu inalo
pare adaa aa mudunumi makirawa go eta nimu muaaeme.
24 Aaraame nipuna naaki pupitagi nalia rabu nipu ki paarame nataliare gore nipumi go naaki mana nata-pulu go naaki raname na-omea.
Go yapare araame nipuna naaki agaa mana lakeloa maredepo yayaa-re ora nipuna si kone ia.
25 Epe redepone aanuna eta ora adaapu rulatabena imi.