1 Yapi medaloma popena loa, Gote-me Abraham kotisa. Gote-me nipu-para lalo: Abraham! Abraham-me lalo: Ni go ayoda. 2 Go rabu Gote-me lalo: Nena si, nena si komea, Aisak, neme kone mapiranedere mo Moria su-para pulupa. Neme watoade pore medana iru madiayae miru pua irape.

3 Ribarekore Abraham rekataboa nipuna donki mena managolaisa. Nipumi Aisak-para, nipuna kogono aalaapo lamuripinisa. Nipumi iru madia yape miru irape repena mada rekepuare, nipu Gote-me pope sade-para pisa. 4 Repopa yapinare Abraham-me, mo polalo pisade su pua ada monesa. 5 Nipuna kogono aalaapo-para lalo: Donki mena-rapu ado atepape, naki sare mogo pare popona. Gote adaa-bi pua kaloa wala epopona.

6 Abraham-me iru madia yae miru irape repena kapuri, si Aisak mariawa, repena ega-para, rai napi lapore nipuna ki-para ripinisa. Goa pua nipu komeapara puamama pisipi. 7 Aisak-me araa Abraham-para lalo: Apa? Abraham-me lalo: Na si akeya? Aisak-me lalo: Mo repena ega-para repena kapu lapore go ripinitipa ga, mo iru madiayae miru irape mena sipisipi ra? 8 Abraham-me lalo: Naa si, apo iru madiayape miru irape mena sipisipiri, Gote-me managolalia. Goa pua nipu padane-para pisipi.

9 Gote-me lakesade-para ipisipi raburi, Abraham-me ana reke meda go-para waria, repena kapu ana rekena isa. Goa puare sina ki alapo rogawa, so ana rekena musawa repena kapu mada saniasa isa. 10 Goa pua, nipuna ki ridulawa, rai napi mua si awolalo pisa. 11 Go rabu Adaa Aa-na Ensol-me soyapara awa yasa: Abraham! Abraham!

Nipumi lalo: Go ayoda.

12 Apo naki mada ki napirape. Nipu mada yae meda napape, abiare makuato, ni Gote mada kone mapirarina, gore nena si padane yade kone nasaede. Ni pagulalo paede.

13 Abraham-me adasaisa pare sipisipi mena meda repena pala ubura ipara ima mapalaga tabaisa. Nipumi mo sipisipi pua mua si polo-para iru madiayae miru mea irisa. 14 Go rabu Abraham-me go suri: Adaa Aa-me Managolae sa. Gore abia page go pore-re Adaa Aa-me managola-walialo gupa pateme.

15 Adaa Aa-na Ensel-me soyapara awaa rana laapopa Abraham yaloa lalo: 16 Adaa Aa-me lalara nerapu agaa rogato, akepeadaya gore neme goa padeane, nena si ora naa loma naki padane pida nalade. 17 Neme ne ora maepeawa, nena maralalide rururi, uba kedonu yaapara ayade rupa page, ipa mu rupa page maralalua. Go maralalide rurumiri iyanu pabo-tu rubua, nimuna adarenu page nimu minabalimi. 18 Nena maralalide onaa madare, go su rayona onaa rayo maepealua. Gore neme na agaa pagaede pulu.

19 Abraham nipu wala nipuna kogono aa laapo asipi pare wala ipua Besiba nimuna padane para pisimi. Goa pua Abraham Besiba pua asa.

<- Ripimae Agaa 21