1 Adaa Aa Abraham piri wala ipisa, mo Mamre-na adaa repena puti regepea narepame riripu waru pisa pulu Abraham nipuna sele ada poragape para pirisa. 2 Abraham-me adasaisa pare aa repo pa go pare reka aina adisa. Nipumi nimu adoare sele ada gimoa aloma madari pua alu pua kubunaisa.

3 Nipumi lalo: Naa adaa aanu, epea pamega, nimi nina ada nagimoa pulupape. Ni nimina kogono aa. 4 Ipa aba mea gula epono, goa puare nimina age aba radepeano go ada repena repara kitu piramina. 5 Neme nimina nape eta meata pono, goa puare puri mua nimina polalo pame nane palimina. Nimi naa adanane epamenada rana piaga nimina eta managolano. Nimumi lalo: Mada, nena laeare paina.

6 Gore aipapulu Abraham nipu Sarah piri sele adapara pisa. Nipumi goa-pua sa: Aipapulu plawa 20 kg ora epede waru adaapu managola, pereke-yoa bret waria ira. 7 Wala aipapulu nipuna gawa menanu aisimi para aloma pisa, goa pua epe pena apa ae yandapu mena meda pua mua nipuna kogono aa epa kaloa aipapulu managolatepa sa. 8 Mo gawa mena aba risa raburi gawana midi para gawana adu ipame warini eta-para mo gawana adu ipa medaloma mea ipisa. Goa pua mo kimisu aa repo epa kasa. Go eta nala pirinare, nipu repena repara suruba adoaisa.

9 Nimumi lalo: Nena ore Sarah akepa? No sele adapara no piada-sa.

10 Go rabu mo aa medame lalo: Ora go-dina ne piri para wala malina epalua, nena ore Sarah-me naki meda madu saba piralia.

Gore Sarah-re nimuna masanane sele ada poragape para pirua pagaba pirisa. 11 Abraham para Sarah lapore onagae yomagae lapo pirina. Sarah nogo-naki page madiape ai nai rabu. 12 Sarah-me nipuna agurapo pirua giri loa, goa kone isa. Niri aba ora onagaesi yade, nina adaa aa page ora yomagaesi yande pare ni mada go padane para patape rana salia pae?

13 Go rabu Adaa Aa-me Abraham-para lalo: Neme lalo agaanare Sarah-me giri akolo tapae: Niri onagae yadega neme naki meda madialua yapae? 14 Yae meda Gote-me papeare mada napaliaya? Wala malina apo epalua lawade raburi Sarah-me naki mada madu saba-piralia.

15 Sarah palame omisa pulu yagaa loa: Giri nalawadesa. Nipume lalo: Giri laedega yagaa nalapesa.

16 Mo aa repo polalo rekesimi rabure nimumi Sodom adaniasimi. Goa pua Abraham-me nimu pulumi rupa adoa rapatalo nimu rapu puamama pisa. 17 Go rabu Adaa Aa-me lalo: Neme pulalo pi-are Abraham-re kudiri palua pae? 18 Abraham-me maralaliade rururi adayoa puri komeada pabalimi, goa pua nipu madare go suada rayo epeama palia. 19 Neme nipu aba mada-misu pulu nipumi nipuna nogonaki-para nipuna adare para aeme onaa rayo mana tea. Neme katoa agaa ratinaloa nimumi epea pua ni epe kone gina. Goa pua Adaa Aa-me Abraham-me maralaliade rurunu page palua siade aonuri ora palia.

20 Gore Adaa Aa-me lalo: Sodom Gomora supara pimi onaame peme wae-yaenuna, agaa ora adapu epeada. 21 Ni gopara pulu, nimuna peme waea adola, goa pua ora yapalo nabipa adaluame.

22 Gore aa lapo Abraham gimoa Sodom adarena poranini pisipi. Adaa Aa-re Abraham aisa pare pa aisa. 23 Go rabu Abraham nipu Adaa Aa regepea ipua lalo: Neme epe onaa para wae onaa rayo taliya? 24 Go adare para epe onaa 50 pitimire, neme nimu page wae onaa rapu pa taliya? Neme mogo epe onaa 50 niminawa go adare pa inateya? 25 Nemere epe onaa-re, wae onaa tala-arare nataliya? Mo wae onaa me pemea madaa, epe onaa rada nanena, neme goa napaina. Nere onaa rayo rumae aa yade pulu; epea ora paina.

26 Adaa Aa-me lalo: Epe onaa 50 piralimi-dare gore pana bina natalua.

27 Gore Abraham-me nipu wala lorapisa: Adaa Aa, neme wala rana lapopa agaa mealo. Niri taaga para do lapo rupa yade. 28 Goa peaga 45 epe onaa piralimiri mo 50 ma-epapena supu diayaliare pa taliya?

Neme 45 adaluare, gore nataluasa.

29 Rana repopa wala Adaa Aa para goa sa: Gore 40 ama yaliare, gopage pa taliya?

Adaa Aa-me lalo: 40 piralimi-dare gimalua.

30 Abraham-me lalo: Adaa Aa neme ratu na yawape, wala agaa meano, gore 30 yaliare, ake paliya?

Adaa Aa-me lalo: Neme yada na palua 30 piralimi da page.

31 Abram-me lalo: Ratu na yawape neme ne wala apo agaa mealoga. Pa 20 komea yalia-dare ake paliya?

Nipumi lalo: 20 komea piralimi page natalua.

32 Abraham-me wala lalo: Adaa Aa neme ni ratu na yawape, pare neme ne rana-komea wala agaa mealo. Gore pa 10 ama yaliare ake paliya?

Nipumi gorupa abusa: Ora 10 ama yalia page na talua.

33 Gore Adaa Aa-me Abraham rapu agaa lo kirituare nipu pisa, go rabu Abraham nipu page ada pisa.

<- Ripimae Agaa 17Ripimae Agaa 19 ->