1 Go raburi Amrapel Sina-na aamudu-para, Ariok Elasa-na aamudu-para, Kedolaoma Elam-na aamudu-para, Tidal Goim-na aamudu alare, 2 nimumi Bera Sodom-na aamudu-para, Bisa Gomora-na aamudu-para, Sinap Adma-na aamudu-para, Semeber Seboim-na aamudu-para, Bela (abiare Soar teme) gona aamudu-para go ruru ala rapu yada pula pisimi. 3 Go adare supuna yadapi aanuri, Sidim awaro paune suna kiritasimi. Go parere abiare Aipa Ipa teme. 4 Yada abi napi aware Kedolaoma-na rolopara mali 12 pirisimi. Wala malinare nimumi agaa napagesimi.

5 Wala mali meda popenalomea Kedolaoma rapu ralasimi aa mudunumi yada pua pumea go ruru wini pisimi. Repaim ruru Estorot Kanaim aisimi-para, Susi ruru Am adare-para pati page, mo Em ruru awaro paune su Kiriataim pati page, 6 mo Or ruru so Seir rudu pati page, ora pua mo kapune suna rugi Elparan pua pabo tu kiritisimi. 7 Goa pua nimumi wala pereketua En Mispat pisimi (go suri abiare Kedes teme). Goa pua aamudu malapu-na rurumi Ameleke-na su ada luabu pabotu rubisimi. Nimumi mo Asason Tama su-para pati Amori ruru page pabo rubisimi.

8 Go rabu Sodom Gomora lapo-para, Adma-para, Siboim-para, Bela nipuna bi meda Soa-para, go aamudununa yadapi aanumi, yada roborobo maga-ari ipua, Sidim awaro paune pare kiratawa, 9 Kedolaoma Elamana aamudu-para, Tidal Goimana aamudu-para, Amrapel Sinana aamudu-para, Ariok Elasana aamudu aala rapu yada pisimi. Gore nimu aamudu malapu rapu aamudu supu rapu yada pisimi. 10 Go raburi mo su Sidimire awaro paune kolta mi naaku adapu isa. Sodom Gomora lapona yadapi aanu-para nimuna aamudunu page pogola pisimi. Medalomare mo kolta mi naaku para lopisimi. Medalomare so rudu rudu pogola pisimi. 11 Mo aa mudu mala-na yadapi aanumi Sodom Gomora lapona oyae rayo mea pisimi. 12 Abram-na amena si Lot page go Sodom su-para aisa pulu, nipu para nipuna oyae rayo page mea pisimi.

13 Aa meda pogola pisa aamere, Hibru aa Abram apo remaa rayo epa lakesa. Go raburi Amorait aa meda Mamri-na repena puti para Abram rapu epa asa. Mamri para nipuna ame Esko-para Ane lapo, nimu Abram rapu upasimi. 14 Go rabu amena si Lot iyanumi mea puamelo pagisa raburi, nipumi nipuna ruru para asimi yada pape aanu para madini aanu page 318 yasa. Goa pua mo iyanu nimu Dan adare pua ratu kiritisimi. 15 Go ribare Abram-me nipuna aanu epa rumasa. Goa pua yadaa isimi. Go yada wini pua Damaskas regepea ae adare Oba regepea pua ratu kiritisimi. 16 Abram-me apo mea pisimide oyae rayo-para Amena si Lot-para ona-repa para pa onaanu page rayo wala mea ipisa.

17 Abram-me mo Kedolaoma rapu ralasimi ruru pabo ruboa ipisa raburi, Sodom-na aamudumi Abram mo Save awaro paune pare madaata ipisa. Abiare go parere Aamuduna Awaro Paune su teme. 18 Gote Adaa Aa mudu-na miru irae aa pris Melkisadek-me bret wain lapo mea ipisa. Nipuri Salem-na aamudu. 19 Nipumi Abram maepeata-awa goa sa: Su yaa lapo warini Gote Adaa Aa Mudu-me ne ora maepeaina. 20 Nena iyanu nena kipara mea giaa Gote Adaa Aa Mudu ora so mada pena. Go rabu Abram-me mo mea ipisa yaenu rayona 10 ap Melkisedek kasa.

21 Mo Sodom-na aa mudumi Abram para lalo: Oyae rayore nena meainaga niri onaa komea giaina.

22 Gore Abram-me mo Sodom-na aa mudu para lalo: Neme Adaa Aa, Gote Adaa Aa Mudu, su yalapo warisa Gote-para ora lalo: 23 nena nonapi yaere neme ogeda page namealua gore neme lalo: Abram ma-ama yaisu tepulu. 24 Ni yae meda na-mealua pare na aanumi aba nameya yaenu komea meano, go page nirapu puame aa repo Ane-para Eskol-para Mamre aalana komea nina iyanu rapu yada pamega go repare kalaina.

<- Ripimae Agaa 13Ripimae Agaa 15 ->