Tagara̱da u

Nahum
Ukukpa̱ u kadyanshi
A tagara̱da u na vi, Nahum matsumate danai, Magono ma Zuba ma yanka ta̱ Niniba ilyuci i pige i Asiriya afada n mavura. Uyamba u nala vi, atokulalu a aza a Isaraꞌila a ɗa a tsu ꞌyankusu le ta̱ n a yanyi ara̱ɗi. Niniba u rukpa̱ ta̱ kpam a lyai u ɗa a kayen ka amangatawanteli n kupa n re kahu utuwa̱ u Kawauwi (612 B.C). Itagara̱da ushani a asuvu a kazuwamgbani ka cau i yan ta̱ kadyanshi a kaci ka a asuvayali a Magono ma Zuba an a yain kadyanshi ka ukuna u afada ɗa a'a̱ri dere a Magono ma Zuba, shegai a tagara̱da u na vi Magono ma Zuba ma pana ta̱ asuvayali a aza ɗa kpatalai a gonoi a asu u ne u yanka le kpam ukuna u shinga (Kondo 1:7).
Ili iꞌya iꞌa̱ri a tagara̱da u na vi
Upan u Magono ma Zuba a kaci ka Niniba (1:1-15)
Niniba wa rukpa̱ ta̱ (2:1--3:19)

1 Akani a Kashila̱ a kaci ka Niniba.[a] Tagara̱da u kuwene u Nahum uza u Elikoshiya.

Upan u Magono ma Zuba a kaci ka Niniba

2 Magono ma Zuba Kashila̱ uza u malyon ɗa,

Magono ma Zuba katsupuki ka n upan cika.

Magono ma Zuba u tsu tsupuka ta̱ kaci ka ne

a asu u atokulalu a ne

u tsu gonuko ta̱ upan u ne a asu u atokulalu a ne.

3 Magono ma Zuba wa̱ri n maloko ma uyan upan wa,

shegai wa̱ ta̱ n ucira cika,

Magono ma Zuba ma kpa̱ɗa̱ uyanka aza a unyushi mavura wa.

Ure u ne wa̱ ta̱ n uwule u pige u kabatara̱kpa n ulima̱,

aku alishi a ɗa kabuta̱ ka adeshikpetsu a ne.

4 U tsu ɓarana ta̱ mala n aga̱ta̱ a wumkpa,

u tsu zuwa ta̱ a ɗa kpam a ekpe.

Mete ma ma̱ri a Bashan n Karumelu ma tsu lumba ta̱

aku apa̱lu a Lebanon a sa̱ka̱ta̱.

5 Nsasa n tsu gba̱ɗa̱ ta̱ a kapala ka ne

aga̱la̱la̱ kpam a tsu dara̱kpa ta̱.

Uyamba u gba̱ɗa̱ a kapala ka ne,

likimba n gba̱ n ili iꞌya iꞌa̱ri pini a asuvu i giruwa̱ ta̱.

6 Ya wa fuɗa wa shamgba a kapala ka ne u yan baci upan?

Ya wa fuɗa u kawunku n upan u shen u ne?

Upan u ne wa̱ ta̱ shen yavu akina;

atali a tsu yuruwa ta̱ a kapala ka ne yuku-yuku.

7 Magono ma Zuba ma̱ ta̱ ukuna u shinga,

eyi asu u ukpawan ɗa aꞌayin a upana a ikyamba.

U tsu kirana ta̱ n aza ɗa a kpawain a asu u ne.

8 Shegai yavu uwayi u mini ma kushiva̱

ɗa wa tuko makorishi ma Niniba gba̱;

wa loko ta̱ atokulalu a ne a ubana a karimbi.

9 Ndya iꞌa̱ri ufoɓuso a kaci ka Magono ma Zuba?

Ko ndya baci wa, wa tuko ta̱ iꞌya gba̱ a makorishi;

uza u tsu yan tsilala n eyi hal kure wa.

10 Atokulalu a ne aꞌa̱ ta̱ yavu awana a ɗa a ɓolomgbonoi,

yavu asoi a ɗa a gutukpai a ka wala n a rukpusi,

a ka runukpa le ta̱ gba̱ yavu mete ma ekpi.

11 Asuvu a vunu, Niniba uza roku wa wuta̱ ta̱

uza ɗa u foɓusukoi Magono ma Zuba tsicingi

u na̱ka̱ adooki a cingi.

12 Ili iꞌya Magono ma Zuba ma danai iꞌya na:

<<Ko an u wokoi aza a Asiriya aꞌa̱ri ushani kpam n ucira,

a ka wacinsa le ta̱ kpam a wuna le.

Ko an u wokoi n yan vu ta̱ mavura, avu Yahuda,

ma doku kpam ma yan vu mavura wa.

13 Gogo-na ma koɗo ta̱ maɗanga ma kulima ma a taɗangi a udyoku u vunu,

n kiɗa̱sa kpam ikani iꞌya a sira̱sa vu n iꞌya.>>

14 Ili iꞌya Magono ma Zuba ma danai a kaci ka vunu Niniba iꞌya na:

<<Va doku va tsa̱ra̱ mmuku n tsikaya aza ɗa a ka wushuku kala ka vunu wa.

Ma wacinsa ta̱ gba̱ ameli a vunu, hal n ameli a urim a ɗa vu dara̱kpusai

a ɗa aꞌa̱ri a kunu ka ameli a vunu.

Ma foɓusuko vu ta̱ kasaun,

kpaci va̱ra̱ n kalen wa.>>

15 Wundya, uza ɗa wa tuko kadyanshi

ka shinga ki wa wala a zuba u nsasa,

uza u ɗa wa yan kalamu ka ndishi n shinga![b]

Kirana n abiki a vunu Yahuda,

kpam vu shaɗangu utsina u vunu.

Aza a cingi a ka doku a ka tuko vu kuvon wa;

a ka wacinsa le ta̱ gba̱.

Nahum 2 ->