1 Aku Magono ma Zuba ma tonukoi Musa, 2 <<Tonuko Haruna n alobo a ne n aza a Isaraꞌila gba̱ ili iꞌya Magono ma Zuba ma tonuko le iꞌya naha: 3 Uza ɗa baci dem asuvu a kuwa ku aza a Isaraꞌila u kiɗai kanaka ko macon ko malala asuvu a asu u ɗa a shigba̱i agali ko kpam a uroto u agali vi, 4 bawu u tukoi ma kune a utsutsu u Katani ka Ugawunsa a kapala ka Katani ka Kavasu ka Magono ma Zuba, vuma nala vi a ka ka̱na̱ yi ta̱ n unyushi u uwotsongu mpasa. U ka̱na̱ ta̱ a peci yi n ama a ne. 5 Kalen ka mele ma nala mi ma, kotsu aza a Isaraꞌila a a̱sa̱ka̱ uɗara̱kpusa kaberikete a asu vi. U ka̱na̱ ta̱ a tuko Magono ma Zuba kune ku le a asu u kaɗara̱kpi a utsutsu u Katani ka Ugawunsa, aku u yanka n ɗa uɗara̱kpa u ndishi n shinga ubana a asu u Magono ma Zuba. 6 Kaɗara̱kpi ka vishana̱sa ta̱ mpasa mi a asuɗara̱kpa u Magono ma Zuba a utsutsu u Katani ka Ugawunsa, aku u runukpa manivi mi, ma woko ili i magula̱ni ma shinga ubana a asu u Magono ma Zuba. 7 A ka doku a ka banka uɗara̱kpa u le a asu u ityonshi iꞌya iꞌa̱ri yavu nlala wa, n ɗa a tsu yansa̱ka tsishankala[a]. Mele ma na mi ma yan ta̱ pini a uyan u le ushani ubana.

8 <<Vu tonuko le kpam: Gba̱ uza ɗa dem wa̱ri uza u kuwa ku aza a Isaraꞌila, ko kamoci ka ka̱ri ndishi a asuvu a le, uza ɗa u yain uɗara̱kpa u urunukpa ko uɗara̱kpa u roku 9 aku u kpa̱ɗa̱i utuko ma a utsutsu u Katani ka Ugawunsa kotsu u yain uɗara̱kpa u ne a asu u Magono ma Zuba, a ka pece yi ta̱ n ama a ne.

10 <<Gba̱ uza ɗa dem wa̱ri uza u kuwa ku aza a Isaraꞌila, ko kamoci ka ka̱ri ndishi a asuvu a le, uza ɗa u takumai inyama iꞌya iꞌa̱ri na̱ mpasa, mpa Magono ma Zuba ma yan ta̱ tsilala n vuma u nala vi n peci yi n ama a ne. 11 Uma u ili i uma dem, wa̱ ta̱ a mpasa, ɗa i zuwai mpa Magono ma Zuba n na̱ka̱ ɗa̱ mpasa n woko ili i utakpa u unyushi u cingi a asuɗara̱kpa adama a uma u ɗe. Kpaci mpasa uma u ɗa, adama nala mpasa n ɗa ma takpa unyushi u cingi. 12 Adama nala ɗa n tonukoi aza a Isaraꞌila: <Ko uza a asuvu a ɗe kotsu u takuma inyama iꞌya iꞌa̱ri na̱ mpasa wa, nala dem amoci a ɗa aꞌa̱ri a ɗe.>

13 <<Gba̱ uza u Samaꞌila ko kamoci ka ka̱ri a asuvu a le, uza ɗa banai tsutofi aku u wunai manama, ko manu ma a tsu takuma, u ka̱na̱ ta̱ u kiɗa ili iꞌya u wunai vi u wotsongu mpasa mi aku u pala n kayala. 14 Uma u ili i uma dem, wa̱ ta̱ a mpasa, ɗa i zuwai n tonukoi aza a Isaraꞌila kotsu a takuma inyama i ili u uma na̱ mpasa wa, kpaci uma u ili i uma dem wa̱ ta̱ asuvu a mpasa. Gba̱ uza ɗa takumai inyama iꞌya iꞌa̱ri na̱ mpasa, a ka pece yi ta̱ n ama a ne.

15 <<Gba̱ uza u iyamba ko kamoci uza ɗa baci takumai manama ma ma kuwa̱i agifa, ko ma manama ma mete ma wunai, u ka̱na̱ ta̱ u za̱i aminya a ne kpam u sumba̱. Gba̱ n nala wa rongo ta̱ pini na̱ nshinda̱ ubana kuvuli kahu a wulukpe yi. 16 Shegai u za̱ baci aminya ne wa, ko kpam bawu u sumba̱i, unyushi u ne wa̱ ta̱ a kaci ka ne.>>

<- Aɗara̱kpi 16Aɗara̱kpi 18 ->