1 Yahwe nkunnyaulila Nuhu kuchidoni, “Injila nsafina, wako pamo na vanu vammalele va nng'ande mwako, kwa kuva muvanu va chívelèkwà achino, nangu nìkuwene chihi wako weka kuva umunu utênda àlalá lángulembèlà. 2 Vatwale anyama vammalele halali, vachilume saba na vachimahe saba, henga anyama halamu vatwale vachilume vavili na vachimahe vavili. 3 Uchocho, vitwale vyuni viulûka kumahunde vya kila aina, vyachilume saba na vyachimahe saba. Tenda uchocho kwajili ya kukondya mipandani ya aina dya anyama na vyuni anevyo, pachilambo. 4 Bada ya maduva saba, nìmbetonya imbula pachilambo maduva alubaini, chilo na muhi, na kila chiumbe chivêle na umi chinichiumbile pachilambo nìmbechiondonganga.” 5 Bahi Nuhu nkutenda lammalele malinga chalaijijwe na Yahwe.

6 Livambwe paliidile pachilambo, Nuhu ávele na myaka myasita. 7 Nuhu na n'jawe na vana vake na ajavao nkuinjila nsafina uchinga valinyemye na livambwe. 8 Bahi anyama halali na anyama halamu na vyuni na viumbe vyammalele viônga pachilambo, 9 vyachilume na vyachimahe, nkuida kwanga Nuhu, nkuinjila nsafina malinga Nnungu chamwamulisije Nuhu. 10 Bada ya maduva saba, medi la livambwe nkutandilika kuchihunika chilambo.

11 Nuhu panavele na vyaka myasita, nniduva lya kumi na saba lya mwedi wa vili, liduva anelyo vimbwimbwi vyammalele vya pahi chilambo nkulipuha medi, na medi lavêle kumahunde nkukung'unikila pachilambo. 12 Bahi imbula nkutonya pachilambo kwa maduva alubaini, chilo na muhi. 13 Nniduva ulyolyo imbula paitandilike kutonya, Nuhu na n'jawe na vana vake, Shemu, Yafeti na Hamu pamo na ajavao, nkuinjila nsafina. 14 Anemwo nsafina váinjidile vene pamo na aina dyammalele dya anyama va munnyitu na aina dyammalele dya anyama va kulangwa na aina dyammalele dya vakoko vaônga pachilambo na vyuni vya kila aina, na kila chiumbe chivêle na dimapa. 15 Bahi viumbe vyammalele vya kila aina nkuida kwanga Nuhu, nkuinjila nsafina, vivili-vivili. 16 Kila aina ya viumbe anevyo víinjidile nannume na mmahe malinga Nnungu chanamwamulisije Nuhu. Bahi Nuhu pamalilikidile kuinjila nsafina, Yahwe Nnungu nkuchima nnango.

17 Imbula ítonyile maduva alubaini, na livambwe nkuhalija kuyenjejeka pachilambo. Medi nkuyenjejeka namene mpaka safina kunyanyulwa muha namene mwa chilambo. 18 Medi nkuhalija kuyenjejeka namene ulehu, na safina nkuva uielea muha mwake. 19 Anelo medi nkuva lohe namene muha chilambo mpaka machinga lammalele malehu la pachilambo nkuhunikwa. 20 Medi lániyenjejeka mpaka kuhunika machinga na kulapunda, malinga ulehu wa futi ishilini na mbili. 21 Bahi viumbe vyammalele vya pachilambo nkuhwanga, yani vyuni na anyama va kulangwa na anyama va munnyitu na vakoko vammalele vaônga pachilambo, na vanu vammalele. 22-23 Nnungu ániviondonganga viumbe vyammalele vivêle na umi vya nchilambo, yani vanu na vanyama na vakoko vaônga pachilambo na vyuni vyammalele. Na nanga chiumbe chinalekwije chivèlè chomi ikànave chihi Nuhu na vanji vanavele nsafina. 24 Medi anelo lánitanda pachilambo kwa uhiku wa maduva myamoja na amsini.

<- Ntandiliko 6Ntandiliko 8 ->