1 Mndewa Imulungu kamulongela Musa, 2 “Walagize Waizilaeli wamulave kunze ya ing'hambi munhu yoyose yeli na utamu wa dikulu na munhu yolawa udusi na munhu yoyose yafitile kwa kukwasa maiti. 3 Muwalave kunze wanhu kamba awo, wambigalo na watwanzi ili sikuwawafitize wanhu zangu wayagwe mna ing'hambi inikala.” 4 Avo Waizilaeli wawalava wanhu kamba awo kunze ya ing'hambi watenda kamba Mndewa Imulungu viyamulagize Musa.

5 Mndewa Imulungu kamulagiza Musa, 6 “Walongele Waizilaeli, ‘Kamba munhu yoyose mbigalo hebu mtwanzi yahaleka kumtamanila Mndewa Imulungu na yahatenda nzambi, munhu ayo kokuwa kabananga. 7 Munhu ayo kolondigwa yaitambule nzambi ayo na kolondigwa yalihe kwa kija kiyabanange na vivija yongeze asilimia ishilini na abaho yamgwelele ija iyamtendele gehile. 8 Lakini kamba munhu ayo kafa na kamba kabule ndugu yodaha kubokela kija kilihigwe, avo kinhu acho kigaligwe kwa Mndewa Imulungu mbuli ya iwalava nhosa. Vivija yagale ng'hondolo wa kimbigalo ili yatendeligwe loholo da nzambi zake. 9 Kila sadaka ing'alile ilavigwa na Waizilaeli kwa Mndewa Imulungu yokuwa ya mulava nhosa. 10 Kila kinhu kilavigwe kwa Mndewa Imulungu, kinhu acho chokuwa cha mulava nhosa.’ ”

11 Abaho Mndewa Imulungu kamulongela Musa, 12 “Walongele Waizilaeli, ‘Kamba mwehe wa munhu yahatenda ugoni na mbigalo iyagwe, 13 bila mkasano wake kujuwa hata kamba kuduhu munhu yamgogile ugoni heyo kokuwa kafita. 14 Avo, mkasano wake yahakona shaka kwa mwehe wake ayo kamba kaifitiza hebu kamba yahamonela wivu hata kamba haifitize, 15 avo wose wabili wachole kwa mulava nhosa na wagale nhosa ilondigwa, nhosa yenyego iwe vibaba vibili va usage wa shaili, lakini sikuugeligwe mavuta hebu ubani, kwavija ayo nhosa ya ndiya ya mbigalo yomonela shaka mwehe wake, nhosa ayo yolavigwa kwa mbuli ayo.

16 “ ‘Mulava nhosa yamgale mtwanzi ayo behi, na yamwimize kuulongozi wa Mndewa Imulungu. 17 Abaho yagele mazi gong'ala mna inongo na abaho yadehe timbwisi dili kuuvungu wa dihema da mting'hano na yadigele mmo mnongo ili gamazi gawe usungu. 18 Mulava nhosa yamwike mtwanzi ayo kuulongozi wa Mndewa Imulungu na yamgubule zimvili na yamgwee ayo inhosa ya indiya ilavigwe mbuli ya koneligwa shaka. Imulava nhosa yagoge inongo ili na mazi gogala makungu. 19 Abaho mulava nhosa yamduwilize ayo imtwanzi kuno yolonga, “Kamba huwasile na mbigalo iyagwe, na kuifitiza kuno kwa mmakono ga mkasano wako, avo makungu golawa mmazi gano geli usungu sikugakupate. 20 Lakini kamba kubena dilagano na kuno kwa mmakono ga mkasano wako na kuifitiza kwa kuwasa na mbigalo iyagwe yeli siyo mkasano wako, 21 avo Mndewa Imulungu yakukoboze na uduwiligwe mna iwanhu wako, uwe mgumba na inda yako ivimbe. 22 Mazi gano gogala makungu gengile mna iinda yako na gakutende mgumba na inda yako ivimbe.” Na ayo imtwanzi yedike, “Ona, Ona.”

23 “ ‘Abaho mulava nhosa yagandike gago gamakungu mkitabu na yagakoshele mgamazi gago gausungu. 24 Abaho yamng'weze mtwanzi ayo gago gamazi geli usungu gogala makungu, nago gokwingila mgati na gomtenda inda yake ilume ng'hani. 25 Abaho imulava nhosa yaisole ayo inhosa ya indiya ya koneligwa shaka mmakono ga ayo imtwanzi na yainule uchanha kamba kilaguso kwa Mndewa Imulungu abaho yaigale hana uupango wa nhosa. 26 Abaho yadehe ganza dimoja da ayo inhosa ya indiya kamba kinhu cha kukumbuka kamba nhosa ayo yose ilavigwa kwa Mndewa Imulungu na yaisome moto muupango wa nhosa. Abaho yamng'weze ayo imtwanzi gago gamazi. 27 Yahamambukiza kugang'wa gago gamazi, kamba kaifitiza na kabena dilagano da umzengo, gago gamazi gogala makungu gomtenda inda yake ilume ng'hani, lukuli lwake lovimba na isambo yosambuka sambuka. Mtwanzi ayo kogakalila makungu mna iwanhu wake. 28 Lakini kamba mtwanzi ayo haifitize bule na habanange kinhu, avo kuduhu kinhu chonda kimpate, na kolela wana.

29 “ ‘Avo gano gago malagizo kwa mbuli ya koneligwa shaka, kamba mtwanzi kammakono ga mkasano wake, na kobena lagizo da umzengo na koifitiza, 30 hebu kamba mbigalo yahakona wivu na komonela shaka mwehe wake. Komwimiza mtwanzi ayo kuulongozi wa Mndewa Imulungu, imulava nhosa kotenda gose golondigwa. 31 Imkasano kokuwa habanange kinhu, ila imtwanzi kolondigwa yagae kwa awo ubananzi wake.’ ”

<- Kupetigwa 4Kupetigwa 6 ->