Link to home pageLanguagesLink to all Bible versions on this site

1 Balaamu kamulongela Balaki, “Nizengele mhango saba hano abaho unigalile ng'ombe mbigalo saba na ng'hondolo mbigalo saba.” 2 Balaki katenda kamba Balaamu viyamulongele. Avo walava nhosa mna kila upango, ng'ombe mbigalo imoja na ng'hondolo mbigalo imoja.

3 Abaho Balaamu kamulongela Balaki, “Kala hano behi na inhosa yako ya kusoma moto, niye nokwela uchanha sengine Mndewa Imulungu kolonga na niye. Kinhu chochose chonda yandagusile nokwiza kukulongela.” Avo Balaamu kakwela yaiyeka kuna inhembeti ya ulugongo. 4 Imulungu kamulawila Balaamu, abaho Balaamu kamulongela, “Nitanda mhango saba na nilava nhosa uchanha ya kila upango ng'ombe mbigalo imoja na ng'hondolo mbigalo imoja.”

5 Mndewa Imulungu kamgwaa usenga Balaamu na kamulongela, “Bwela kwa Balaki na mgwee usenga awo.” 6 Avo Balaamu kabwela na kamvika Balaki kema bahaja behi na nhosa yake, hamoja na vilongozi wose wa Moabu.

7 Balaamu kamgwaa Balaki uusenga kwa kulagula kalonga,

“Balaki kanigala hano kulawa Alamu
Ona, mndewa wa Moabu kanigala kulawa kuvigongo va mwambu wa kudilawilila zuwa.
Kalonga, ‘Izo uniduwilizile wanhu wa Yakobo,
ona, izo uwaduwile Waizilaeli!’
8 Lakini, vino nomduwilaze munhu haduwiligwe na Imulungu?
Vino nowasuwaze wanhu hawasuwigwe na Mndewa Imulungu?
9 Kulawa kuna inhembeti ya imibwe nowona,
Kulawa uchanha ya ivigongo nowasungulila.
Lola wanhu wano okala waiyeka,
Na watambikiligwa kubanza wanhu wa isi ziyagwe.
10 Nani yodaha kuwapeta wanhu wa Yakobo.
Nani yodaha kugapeta mabumbila ga Izilaeli?
Beta ifa yangu iwe kamba imoja wa awo iwanhu wa Imulungu,
Beta niye nife kamba munhu yanogile mgameso ga Imulungu.”

11 Abaho Balaki kamulongela Balaamu, “Kunhenda choni? Nikugala hano uwaduwile wanhu onihila lakini gweye kuwatambikila.”

12 Balaamu kamwidika Balaki, “Niye nolondigwa kulonga mbuli zija ziyanigwelele Mndewa Imulungu.”

Balaamu kolagula kabili
13 Abaho Balaki kamulongela Balaamu, “Tuchole hanhu hayagwe aho kodaha kuwona lakini hudaha kuwona wose. Abaho uniduwilizile wanhu awo kulawa kuko.” 14 Avo Balaki kamgala Balaamu kumgunda wa Sofimu kuna inhembeti ya ulugongo lwa Pisiga. Kuko vivija kazenga mhango saba, na kalava nhosa uchanha ya kila upango, ng'ombe mbigalo imoja na ng'hondolo mbigalo imoja.

15 Balaamu kamulongela Balaki, “Kala hano behi na nhosa yako ya kusoma moto, niye nochola kuja umwambu kulonga na Mndewa Imulungu.”

16 Mndewa Imulungu kamulawilila Balaamu kamgwaa usenga yonda yalonge na kamulongela yabwele kwa Balaki. 17 Avo Balaamu kabwela, na kamvika Balaki kema behi na nhosa yake ya kusoma moto, hamoja na vilongozi wose wa Moabu. Balaki kamuuza Balaamu, “Mndewa Imulungu kakulongela choni?” 18 Avo, Balaamu kamgwaa Balaki uusenga kwa kulagula,

“Izo Balaki utegeleze,
Nhegeleze gweye mwanage Sipoli.
19 Imulungu siyo munhu yavize,
Na heyo siyo munhu yagimbule magesa gake.
Kotenda kinhu chochose chonda yalonge,
Na kotenda gose kamba viyalongile kotenda.
20 Lola nigweleligwa malagizo ga kuwatambikila,
na heyo kawatambikila avo niye sidaha kugimbula kinhu.
21 Mndewa Imulungu honile dihile kwa wana wa Yakobo,
Vivija honile ndwagi kwa Waizilaeli.
Mndewa Imulungu kahamoja na hewo,
Na hewo omtogola kamba Mndewa wao.
22 Imulungu kawalava mwiisi ya Misili,
na heyo kowagombela kwa nguvu zake kamba simba viyogombela wanage.
23 Kuduhu uhawi kwa wanhu wa Yakobo,
Kuduhu munhu yodaha kuwaloga Waizilaeli.
Mbuli ya Izilaeli wanhu olonga,
‘Loleni unzonza uyatendile Imulungu!’
24 Lola Waizilaeli wenuka kamba simba mtwanzi,
okwima wima kamba simba mbigalo.
Oigala na simba yoleka kuwasa mbaka yamambukize kuja kija kiyasakile,
na kong'wa damu ya vija viyakomile.”

25 Abaho Balaki kamulongela Balaamu, “Kamba huwaduwila vivija sikuuwatambikile!”

26 Balaamu kamwidika Balaki, “Vino sikulongele kamba chonda yalonge Mndewa Imulungu acho kinilondigwa kutenda?”

Balaamu kolagula lwa kadatu
27 Balaki kamulongela Balaamu, “Izo nokugala hanhu hayagwe, sengine Imulungu kokutogolela uniduwilizile wanhu awo kulawa kuko.” 28 Avo Balaki kamsola Balaamu mbaka kuna inhembeti ya ulugongo lwa Peoli, aho munhu yahema koluona uluwala. 29 Balaamu kamulongela Balaki, “Unizengele mhango saba hano abaho unitandile ng'ombe mbigalo saba na ng'hondolo mbigalo saba.” 30 Avo Balaki katenda kamba Balaamu viyamulongele, abaho kalava nhosa uchanha ya kila upango ng'ombe mbigalo imoja na ng'hondolo mbigalo imoja.

<- Kupetigwa 22Kupetigwa 24 ->