Kupetigwa 20

Mazi golawa mdibwe

(Kulawa 17:1-7)

1 Wanhu wose Waizilaeli, wavika kuluwala lwa Sini, mna umwezi wa ichanduso weka ng'hambi yao ako Kadeshi. Viwakalile kuko Miliamu kafa na kazikigwa.

2 Hanhu aho hawekile ing'hambi kukala kuduhu mazi ga kung'wa. Avo wanhu wose waiting'hana kuulongozi wa Musa na Haluni. 3 Waiyalala walonga, “Vinoga twahafile hamoja na ndugu zetu kuulongozi wa dihema da Mndewa Imulungu! 4 Habali mutugala siye iwanhu wa Mndewa Imulungu kuno kuluwala? Vino mutugala ili tufe hamoja na fugo zetu? 5 Vino habali mutulava Misili na mutugala hanhu hano hehile? Hano haduhu ndiya hebu tini hebu zabibu hebu makomamanga. Vivija hata mazi ga kung'wa hano haduhu!”

6 Avo, Musa na Haluni wasegela aho hana umting'hano, wachola kwima hana ulwivi lwa dihema da mting'hano, wagwa kingubanguba. Avo ukulu wa Mndewa Imulungu uwalawila, 7 na Mndewa Imulungu kamulongela Musa, 8 “Sola fimbo yako, abaho gweye na Haluni, muwating'hanize iwanhu wose wa Izilaeli. Abaho mgameso gao udilongele dibwe dili kuulongozi wao dilave mazi gake. Avo utende dibwe dilave mazi ili iwanhu wose wa Izilaeli na fugo yao wang'we mazi gago.”

9 Musa kachola kuisola ayo ifimbo kuulongozi wa Mndewa Imulungu kamba viyalagizwe. 10 Abaho Musa na Haluni wawating'haniza iwanhu wose kuulongozi wa idibwe na Musa kawalongela, “Tegelezeni mweye iwanhu wehile, vino tuwalavile mazi kulawa mdibwe dino?” 11 Abaho Musa kenula fimbo yake, kaditowa ajo idibwe miyanza mibili. Ilawa mbwibwi ya mazi aho, wanhu wang'wa hamoja na fugo yao.

12 Lakini Mndewa Imulungu kamulongela Musa na Haluni, “Kwavija mweye hamnitogole hebu kunigwaa ukulu mgameso ga Waizilaeli, avo kwa mbuli ayo honda muwengize iwanhu wao mna iisi inongile nowagwelela.” 13 Mazi gago gakemigwa Meliba[a] kwavija hanhu aho Waizilaeli wamuyalalila Mndewa Imulungu na heyo kailagusa kamba kang'ala hagati yao.

Wanhu ogomesigwa sikuwabitile Edomu

14 Abaho Musa kawatuma wanhu kulawa Kadeshi wachole kwa mndewa wa Edomu wamulongele, “Ndugu yako Izilaeli kolonga vino, gweye kugajuwa magayo gose tugapatile, 15 kujuwa iwahenga zetu viwacholile ako Misili, na wakala ng'hani ako na wadununzigwa, vivija na siye watudununza. 16 Tumulilila Mndewa Imulungu na heyo kahulika kulila kwetu, katugalila imsenga wake yatusegese ako Misili. Avo, sambi twa hano Kadeshi, kudibuga diibakane na isi yako. 17 Chonde tokupula ututogolele tubite mwiisi yako. Hatubojoga gaja gahandigwe mmigunda yenu na hatubojoga zabibu. Vivija hatung'wa mazi ga ivisima venu. Tokweleleza inzila ing'hulu ya mndewa na tobita bila kuhinduka ukudila hebu ukumoso mbaka vonda tulawe mwiisi yako.”

18 Lakini mndewa wa Edomu kedika, “Aka, hamubita mwiisi yangu, kamba mwahabita nowavamila na nowatowa kwa misime.” 19 Waizilaeli wamulongela, “Siye tokweleleza inzila ing'hulu, kamba siye na fugo yetu twahang'wa mazi genu, towaliha. Siye tolonda kubita, chonde tutogolele.”

20 Lakini mndewa wa Edomu kasusumiza, “Hatulonda mubite.” Bahaja Waedomu weli na nguvu walawilila waitowe na hewo. 21 Avo Waedomu wawalemela Waizilaeli kubita mna iisi yao. Avo, Waizilaeli wahindula wabita nzila iyagwe.

Haluni kofa

22 Abaho Waizilaeli wose wagendelela na mwanza kulawa ako Kadeshi na wavika kulugongo lwa Holi. 23 Ako kulugongo lwa Holi, kuna imbaka ya isi ya Edomu, Mndewa Imulungu kamulongela Musa na Haluni, 24 “Gweye Haluni kofa, na honda wingile bule mwiisi inilongile nowagwaa Waizilaeli kwavija gweye na Musa munilema niye kuja Meliba. 25 Gweye Musa msole Haluni na mwanage Eleazali, uwagale kuno uchanha kulugongo lwa Holi. 26 Abaho msaule Haluni viwalo vake va ulava nhosa na umvaze imwana Eleazali. Haluni kofila kuko kulugongo.”

27 Musa katenda kamba Mndewa Imulungu viyamulagize. Wose wadatu wakwela kulugongo lwa Holi kuulongozi wa iwanhu wose wa Izilaeli. 28 Abaho Musa kamsaula Haluni viwalo vake va ulava nhosa, kamvaza imwana Eleazali. Na Haluni kafa kuko kulugongo. Abaho Musa na Eleazali wahumuluka hasi ya ulugongo. 29 Mting'hano wose viupatile usenga awo kamba Haluni kafa wamuwasila tanga kwa siku malongo madatu.

<- Kupetigwa 19 Kupetigwa 21 ->