Luka 17

Nzambi

(Matayo 18:6-7, 21-22; Maluko 9:42)

1 Yesu kawalongela wanahina zake, “Vinhu vonda viwatende wanhu watende nzambi volawilila, lakini kogaya munhu ija yovitenda vilawilile! 2 Yokuwa vinoga kwa munhu ayo yagodekigwe dibwe kulu da kudugila msingo na yasigwe mbahali, kubanza kumuhonza imoja wa wadodo wano yatende nzambi. 3 Avo iteganyeni!

“Ndugu yako yahakutendela nzambi, umzume. Yahatogola, gela kumgongo. 4 Yahakutendela nzambi miyanza saba kwa siku dimoja, na kila yaheza kumwako kolonga, ‘Ng'hosa,’ kolondigwa ugele kumgongo.”

Tamanilo

5 Watumigwa wamulongela Mndewa, “Twengezele tamanilo.”

6 Mndewa kawedika, “Maza tamanilo jenu dahakuwile kulu kamba mbeyu ndodo ya haladali, mwahadahile kudilongela biki dino da mkuyu, ‘Ng'oka ukaihande mbahali!’ najo dahawatogolele.

Sang'hano ya msang'hanaji

7 “Vino nani kumwenu yeli na msang'hanaji yomulimila hebu kosusila ng'hondolo, yahabwela kumgunda, komulongela yalopole kuja ndiya yake? 8 Bule. Lakini komulongela, ‘Uitande, nitandile ndiya yangu, unisang'hanile mbaka ng'homeleze kuja na kung'wa, abaho na gweye koja na kung'wa.’ 9 Vino komgwaa nhogolwa msang'hanaji ayo kwavija kasang'hana gaja galagilizigwe? 10 Vivo ili kumwenu mweye, mwahatenda vose vimulagilizigwe, longeni, ‘Siye twa wasang'hanaji wadodo, tusang'hana kija kitulondigwe kusang'hana!’ ”

Yesu kowahonya wanhu longo

11 Yesu viyakalile mnzila kochola Yelusalemu, kabitila mzimbaka za vijiji va Samalia na Galilaya. 12 Viyakalile kokwingila mna ikijiji kimoja, mumo kukala na wanhu longo wakalile na utamu wa dikulu, wemile kutali. 13 Waguta, “Go mkulu! Yesu! Tonele bazi!”

14 Yesu kawona, kawalongela, “Gendeni mkailaguse kwa walava nhosa.”

Viwakalile mnzila ochola, wahona. 15 Imoja wao viyone kahona, kabweleganya kwa Yesu kuno komgwaa nhogolwa Imulungu kwa sauti ng'hulu. 16 Kamgwila Yesu mmagulu kingubanguba, kamtogola. Munhu ayo kakala Msamalia. 17 Yesu kalonga, “Vino hawakalile wanhu longo wahonyigwe? Wayagwe tisa wa kwahi? 18 Vino kuduhu iyagwe yabwelile kumgwaa nhogolwa Imulungu, ila munhu ino hali muyahudi?” 19 Abaho Yesu kamulongela munhu ija, “Ima na uchole. Kutamanila kwako kukuhonya.”

Kwiza kwa Undewa wa Imulungu

(Matayo 24:23-28, 37-41)

20 Mafalisayo wayagwe wamuuza Yesu Undewa wa Imulungu vonda wize. Yesu kawedika, “Undewa wa Imulungu hawiza kwa kukoneka kwa meso. 21 Kuduhu munhu yonda yalonge, ‘Lola, uno hano!’ hebu ‘Uja haja!’ Kwavija Undewa wa Imulungu wa mgati mmwenu.”

22 Abaho kawalongela wanahina zake, “Kipindi chokwiza vonda mulonde kuyona siku imoja mwiizisiku za Mwana wa Munhu, lakini hondamuyone bule. 23 Baho wanhu owalongela, ‘Loleni kakuja!’ hebu ‘Loleni, kahano!’ Sikumuwakweleleze. 24 Kwavija kamba vija lumwesa vilulawilila kuulanga na kumwemwesa kulawa mwambu umoja mbaka mwambu uyagwe, vivo vonda yawe Mwana wa Munhu mwiisiku yake. 25 Lakini tanhu kolondigwa yadununzike ng'hani na kulemigwa na wanhu wa lukolo luno. 26 Kamba viikalile mna ikipindi cha Nuhu, vivo vonda iwe mzisiku za Mwana wa Munhu. 27 Kila munhu kakala koja na kung'wa, kusola na kusoligwa mbaka siku ija Nuhu viyengile mdisafina. Mvula ng'hulu itowa na kuwakoma wanhu wose. 28 Vivija kamba viilawilile mna ikipindi cha Lutu. Wanhu wagendelela kuja na kung'wa, kugula na kuchuuza, kuhanda na kusenga. 29 Lakini siku ija Lutu viyasegele Sodoma, moto na mabwe gokwaka vilagala hasi na kuwakoma wose. 30 Vivo vonda iwe mwiisiku Mwana wa Munhu vonda yagubuligwe.

31 “Mwiisiku ayo, munhu yeli mkiswili cha ng'anda yake sikuyahumuluke mng'anda kusola vinhu vake, vivija munhu yeli kumgunda sikuyabwele ukae. 32 Kumbukeni gampatile mwehe wake Lutu. 33 Munhu yoyose yolonda kuukombola ugima wake mwenyego, kowagiza, na yoyose yowagiza ugima wake, koukombola. 34 Nowalongela, kilo acho wanhu wabili wawasile mulusazi lumoja, imoja kosoligwa na iyagwe kolekigwa. 35 Watwanzi wabili oduga sembe hamoja, imoja kosoligwa na iyagwe kolekigwa. 36 Wanhu wabili okuwa kumgunda, imoja kosoligwa na iyagwe kolekigwa.”

37 Wanahina zake wamuuza, “Vino, kwahi Mndewa?”

Yesu kawedika, “Kokose kuli na mzoga, baho honda waiting'hane mhungu.”

<- Luka 16 Luka 18 ->