1 Mndewa Imulungu kamulongela Musa, 2 “Mulongele Haluni na wanage, wavigelegeze goya vinhu viwonigalila wanhu wa Izilaeli, na sikuwadikudule twaga jangu ding'ala. Niye ayo Mndewa Imulungu.

3 “Walongele vino, ‘Kamba imoja wa munhu wenu mna uulelo wenu ako kumwande kovikwesela kuno kafita vinhu ving'alile viwongalila niye Mndewa Imulungu wanhu wa Izilaeli, munhu ayo nombagula. Niye ayo Mndewa Imulungu.

4 “ ‘Munhu yoyose wa ulelo wa Haluni yahawa na utamu wa dikulu hebu kolava udusi sikuyaje vinhu ving'ala mbaka vonda yahone. Vivija kokuwa kafita kamba yahakwasa kinhu chochose kifitizigwe na mtufi wa munhu yafile hebu yolawa na chelesi, 5 hebu yahakwasa mng'onyo yoyose yafitile hebu munhu yoyose yodaha kumtenda munhu yafite. 6 Vivija kokuwa kafita mbaka ichungulo na halondigwa kuja ndiya ing'ala mbaka vonda yakoge. 7 Zuwa dahahonga baho kokuwa kang'ala. Abaho kodaha kuja ndiya ing'ala kwavija ayo iyo ndiya yake. 8 Mulava nhosa sikuyaje nyama ya mnyama yoyose yafile mwenyego hebu mnyama yakomigwe na mnyama wa kumuhulo, sikuyaje na kuifitiza. Niye ayo Mndewa Imulungu.

9 “ ‘Avo walava nhosa wagagoge malagizo gangu ili sikuwatende nzambi na kufa. Niye ayo Mndewa Imulungu niwatenda wang'ale.

10 “ ‘Munhu yoyose halawa muulelo wa iwalava nhosa halondigwa kuja ndiya ing'ala. Hata mgeni wa mulava nhosa hebu kibaluwa wake sikuyaje. 11 Lakini kamba mulava nhosa kamgula mtumwa ili yawe wake, ayo kodaha kuja na vivija waja iwatumwa waleleke mng'anda yake. 12 Kamba mndele wa mulava nhosa kasoligwa na mbigalo halawa muulelo wa iwalava nhosa halondigwa kuja nhosa ya vinhu ving'ala. 13 Lakini kamba mndele wa mulava nhosa mgane hebu kasigwa na kabule wana na kabwela ukae kwa tatake na komtamanila tatake kamba viyakalile yang'ali hanasoligwa, aho kodaha kuja indiya iyogweleligwa tatake kamba mulava nhosa. Munhu yoyose halawa muulelo wa iwalava nhosa halondigwa kuja ndiya ino ing'ala.

14 “ ‘Kamba munhu iyagwe yahaja ndiya ino ing'ala bila kujuwa, avo yamulihe mulava nhosa kamba sente ya ndiya ayo viili na yengeze asilimia malongo mabili ya sente ya ndiya ayo. 15 Mulava nhosa sikuyavifitize vinhu vija wanhu wa Izilaeli omulavila Mndewa Imulungu, 16 kwa kuwatogolela waje ndiya ing'ala na kuwatenda watende gehile golondigwa kulihigwa. Niye ayo Mndewa Imulungu niwatenda mung'ale.’ ”

17 Mndewa Imulungu kamulongela Musa, 18 “Mulongele Haluni na wanage iwolava inhosa na wanhu wose wa Izilaeli, ‘Kamba munhu yoyose kumwenu hebu mgeni yoyose yokala Izilaeli yahagala nhosa yake, iwe nhosa ya kutenda kiyalongile hebu nhosa ya kulonda mwenyego, 19 ili nhosa ayo itogoligwe, yagale ng'ombe wa kimbigalo hebu mbuzi mbigalo hebu ng'hondolo wa kimbigalo yelibule kilema chochose. 20 Munhu sikuyagale mnyama yoyose yeli na kilema kwavija nhosa ayo honda itogoligwe mbuli yake. 21 Munhu yoyose yahamulavila Mndewa Imulungu nhosa ya kugala kuilumba ili kutenda kija kiyalongile hebu nhosa ya kulonda mwenyego kulawa mdibumbila da fugo yake, yahalonda Mndewa Imulungu yaitogole, yagale mnyama yatelele, mnyama ayo sikuyawe na kilema chochose. 22 Sikuumulavile Mndewa Imulungu mnyama yoyose halola hebu kilema hebu yabeneke hebu yolawa udusi hebu yeli na uhele hebu vilonda, awo sikuuwalave wawe nhosa ya kusoma moto muupango wa nhosa wa Mndewa Imulungu. 23 Ng'ombe hebu mwana ng'hondolo yeli na maungo makulu hebu madodo kubanza viilondigwa kodaha kumulava nhosa ya kulonda mwenyego, lakini sikuumulave kamba nhosa ya kutenda kija kiulongile. 24 Mnyama yeli na mhumbu zilumizigwe hebu zihondigwe hebu zituligwe hebu zikanhigwe, sikuumulavile Mndewa Imulungu hebu kumulava nhosa mwiisi yako.

25 “ ‘Vivija sikuuwabokele wanyama kamba awo kulawa kwa wageni na kumulavila Mndewa Imulungu wako kamba nhosa ya ndiya. Wanyama awo wanavilema kwavija wakanhigwa avo hawatogoligwa bule mbuli yenu.’ ”

26 Mndewa Imulungu kamulongela Musa, 27 “Ng'ombe hebu ng'hondolo hebu mbuzi yahaleligwa yakale kwa mamake kwa siku saba. Lakini kusongela siku da nane modaha kumulavila Mndewa Imulungu kamba nhosa ya kusoma moto. 28 Lakini sikuumchinje ng'ombe hebu ng'hondolo siku dimoja hamoja na mwanage.

29 “Wahamulavila Mndewa Imulungu nhosa ya kumgwaa nhogolwa, uilave kwa nzila yonda itende utogoligwe na heyo. 30 Nyama ya mnyama ayo idigwe siku dijo na sikumuisigase mbaka imitondo. Niye ayo Mndewa Imulungu.

31 “Gogeni malagizo gangu na mugakweleleze. Niye ayo Mndewa Imulungu. 32 Sikumudikudule twaga jangu ding'ala, twaga jangu mudigelegeze kamba ding'ala hagati ya wanhu wa Izilaeli. Niye ayo Mndewa Imulungu niwatenda mung'ale. 33 Niye ayo niwalavile mwiisi ya Misili ili niwe Imulungu wenu. Niye ayo Mndewa Imulungu.”

<- Walawi 21Walawi 23 ->