1 Viwafile wana wabili wa Haluni kipindi viwamkwesele behi Mndewa Imulungu, Mndewa Imulungu kamulongela Musa, 2 “Mulongele ndugu yako Haluni sikuyengile hanhu hong'ala ng'hani kukisogo cha panziya kipindi halondigwa kwingila, sikuyengile hanhu aho kwavija aho honda nilawilile mdiwingu uchanha ya ngubiko ya disanduku da lagano. Yahalema kofa. 3 Haluni yahalonda kwingila hanhu hong'ala ng'hani tanhu yalave nhosa ya bofu bigalo da ng'ombe kwa nhosa ya kusegesa nzambi na ng'hondolo mbigalo kwa nhosa ya kusoma moto.

4 “Yakoge lukuli lose abaho yavale viwalo ving'alile. Yengile hanhu aho kuno kavala viwalo avo ving'alile, kanzu da kitani na mgati yavale kaputula ya kitani na yaifunge mkwiji wa kitani na kilemba.

5 “Wanhu wa Izilaeli wamgalile mbuzi wabili wa kimbigalo kwa nhosa ya kusegesa nzambi na wamgalile ng'hondolo wa kimbigalo imoja kwa nhosa ya kusoma moto. 6 Haluni yamulave ayo ing'ombe wa kimbigalo kwa nhosa ya kusegesa nzambi zake mwenyego, na kutenda loholo da nzambi zake na wanhu wa mng'anda mmwake. 7 Abaho yawasole iwambuzi wabili yawagale kwa Mndewa Imulungu hana ulwivi lwa dihema da mting'hano. 8 Yabwanhe simbi mbuli ya awo iwambuzi wabili, simbi ya ichanduso mbuli ya Mndewa Imulungu na ya kabili mbuli ya Azazeli[a]. 9 Haluni yamsole ija imbuzi yalagalilwe na simbi mbuli ya Mndewa Imulungu, yamulave nhosa ya kusegesa nzambi. 10 Lakini mbuzi ija yalagalilwe na simbi mbuli ya Azazeli yalavigwe kwa Mndewa Imulungu kuno yang'hali mgima ili yatende loholo da nzambi na mulava nhosa yamuleke mbuzi ayo yachole kuluwala ili kusegesa nzambi za wanhu.

11 “Haluni yamsole ing'ombe wa nhosa ya kusegesa nzambi zake mwenyego ili yatende loholo da nzambi mbuli yake mwenyego na mbuli ya wanhu wa mng'anda mmwake, abaho yamchinje ing'ombe ayo. 12 Abaho yasole kiya cha kuhalila moto na yahale makala muupango wa nhosa kuulongozi wa Mndewa Imulungu na vivija yasole ubani udundigwe vinogile, yadehe maganza mabili yavigale hanhu hong'ala ng'hani. 13 Abaho, yaugele awo uubani mna gamakala kuulongozi wa Mndewa Imulungu, na yosi da awo uubani difililikile hana ingubiko ya disanduku da lagano, ili sikuyone abaho yafe. 14 Yasole idamu kidogo ya ayo ing'ombe na yaimize kwa kidole chake mwambu wa kudilawila zuwa uchanha ya ingubiko ya disanduku da lagano, abaho yaimize kuulongozi wa disanduku da lagano miyanza saba.

15 “Abaho yamchinje ija imbuzi wa nhosa ya kusegesa nzambi za wanhu wose. Idamu ya mbuzi ayo yengile nayo mgati hanhu hong'ala ng'hani na yatende kamba viyatendile kwa damu ya ing'ombe, yaimizile uchanha ya ingubiko ya disanduku da lagano na kuulongozi wa disanduku. 16 Vino vivo vonda yatende loholo mbuli ya hanhu hong'ala ng'hani na kwa mbuli ya ukufita kwao na mbuli ya gehile na nzambi za wanhu wa Izilaeli. Vivija vivo vonda yatende mbuli ya dihema da mting'hano dizengigwe hagati ya wanhu awo wafitile. 17 Kipindi Haluni kolava nhosa ya loholo mbuli ya nzambi zake mwenyego na wanhu wa mng'anda mmwake na wanhu wose wa Izilaeli, munhu yoyose sikuyengile mdihema da mting'hano mbaka vonda yamambukize na kulawa kunze. 18 Abaho yalawe na kuchola kuna uupango wa nhosa uli kuulongozi wa Mndewa Imulungu na yaulohole. Yasole damu kidogo ya ija ing'ombe na imbuzi na yabake zimhembe za upango wa kulavila nhosa banzi zose. 19 Yamize idamu muupango kwa kidole miyanza saba kwa nzila ayo koulava kwa Mndewa Imulungu na koutenda ung'ale kwa kusegesa ukufita kwa wanhu wa Izilaeli.

20 “Haluni yahamambukiza kulohola ihanhu hong'ala ng'hani na dihema da mting'hano na uupango wa nhosa, abaho yamulave ija imbuzi kwa Azazeli kuno yang'hali mgima. 21 Haluni yeke makono gake mdipala da ayo imbuzi yeli mgima na yatambule nzambi zose za wanhu wa Izilaeli, gehile gao na ubananzi wao wose na yawike mdipala da ayo imbuzi. Abaho yamulekese ayo imbuzi yachole kuluwala kuno kogaligwa na munhu yasaguligwe kwa sang'hana ayo. 22 Munhu ayo yamuleke mbuzi ayo yachole kuluwala hanhu kuduhu wanhu kuno kapapa nzambi zao zose.

23 “Abaho Haluni imulava nhosa yengile mna dihema da mting'hano na yasaule viwalo viyengile navo hanhu hong'ala ng'hani na yavileke mumo. 24 Yakoge mumo mgati ya hanhu hong'ala na yavale viwalo vake. Abaho yalawe kunze yalave nhosa ya kusoma moto na ya kusegesa nzambi zake na nzambi za wanhu wose ili kulohola nzambi zake na nzambi za wanhu wose. 25 Vivija yagasome moto gamavuta ga imnyama wa nhosa ya kusegesa nzambi muupango wa kulavila nhosa. 26 Munhu ija yamgalile ija imbuzi kwa Azazeli, tanhu yafuwe viwalo vake na kukoga abaho kodaha kubwela mwiing'hambi. 27 Ija ing'ombe na imbuzi walavigwe nhosa ya kusegesa nzambi, awo idamu yao igaligwe hanhu hong'ala ng'hani ili kutenda loholo da nzambi, mitufi yao igaligwe kunze ya ing'hambi na isomigwe moto. Ng'hwembe zao na zinyama na mavi gao, vose visomigwe moto. 28 Munhu yonda yaisome moto imitufi ayo yavifuwe viwalo vake na yakoge, abaho kodaha kubwela mwiing'hambi.

29 “Dino lagizo da siku zose, siku da longo da mwezi wa saba, mweye wenyego na hata wageni zenu mufunge kuja na sikumutende sang'hano. 30 Tendeni vivo kwavija siku dijo motendeligwa loholo da nzambi, musunhigwe nzambi zenu, na mweye mokala kuno mung'ala kuulongozi wa Mndewa Imulungu. 31 Siku dijo dokuwa siku da kubwihila, na mufunge kuja, na mudigoge lagizo dino siku zose. 32 Mulava nhosa yagidiligwe gamavuta na kulavigwa kwa Mndewa Imulungu yasolile sang'hano ya tatake, ayo yonda yatende loholo da nzambi kuno kavala iviwalo ving'alile va kitani. 33 Na heyo yatende loholo da nzambi mbuli ya hanhu hong'ala ng'hani na mbuli ya dihema da mting'hano na mbuli ya upango wa nhosa, na mbuli ya walava nhosa na wanhu wose wa Izilaeli. 34 Dino dokuwa lagizo da siku zose, molondigwa mudigoge ili mutende loholo da nzambi zose za wanhu wa Izilaeli mwanza umoja kila mwaka.”

Musa katenda kamba Mndewa Imulungu viyamulagize.

<- Walawi 15Walawi 17 ->