1 Avo buga da Yeliko dikala dihindigwe kwa mgati, mbuli ya iwanhu wa Izilaeli. Kuduhu munhu yadahile kulawa kunze hebu kwingila mng'anda. 2 Abaho Mndewa Imulungu kamulongela Yoshua, “Lola nidigela mmakono gako buga da Yeliko hamoja na mndewa wao na iwakalizi zake weli magalu. 3 Mweye mdizunguluke buga dijo, iwambigalo wose odaha kuchola kuing'hondo wadizunguluke dibuga, mwanza umoja kila siku, kwa siku sita. 4 Walava nhosa saba, kuno kila imoja kagoga mhalati yake ya mhembe ya ng'hondolo mbigalo, wadilongolele disanduku da lagano. Mna isiku ya saba modizunguluka dibuga miyanza saba, kuno iwalava nhosa otowa zimhalati. 5 Abaho mwahahulika zimhalati zolila kwa kugendelela, iwanhu wose wagute ng'hani, na uluwa lwa dibuga olagala hasi na iwanhu wose wagendelele kuulongozi.”

6 Avo Yoshua mwanage Nuni kawakema iwalava nhosa kawalongela, “Dipapeni disanduku da lagano na iwalava nhosa saba wasole mhalati saba za ng'hondolo mbigalo walongole kuulongozi wa idisanduku da Mndewa Imulungu.” 7 Abaho Yoshua kawalagiza iwanhu, “Longoleni mkadizunguluke dibuga, na iwanhu weli na imigoha wadilongolele disanduku da Mndewa Imulungu.”

8 Avo kamba Yoshua viyawalagize iwanhu, iwalava nhosa saba kuno wagoga mhalati saba za ng'hondolo mbigalo, wachola kuulongozi wa Mndewa Imulungu, kuno otowa zimhalati na disanduku da lagano da Mndewa Imulungu dowakweleleza. 9 Wanhu waja wakalile na migoha wawalongolela waja iwalava nhosa wakalile otowa mhalati, na wakalizi wayagwe wadikweleleza disanduku dijo, kuno mhalati zogendelela kutoigwa. 10 Abaho Yoshua kawalongela iwanhu, “Sikumugute nyangi hebu kulava sauti, hebu mbuli yoyose kulawa mmilomo yenu, mbaka siku ayo vonda niwalongele mugute nyangi, baho moguta nyangi.” 11 Avo Yoshua kawalongela wanhu wadizunguluke buga mwanza umoja kuno wadipapa disanduku da Mndewa Imulungu na kubwela kuna ing'hambi kuwasa.

12 Imitondo yake Yoshua kalamuka imitootondo, na iwalava nhosa wadipapa disanduku da Mndewa Imulungu. 13 Iwalava nhosa saba wagogile zimhalati saba za ng'hondolo mbigalo wachola kuulongozi wa disanduku da Mndewa Imulungu kuno ogendelela kutowa zimhalati. Iwanhu weli na migoha wawalongolela iwalava nhosa na iwakalizi wayagwe wakala kukisogo chake cha disanduku da lagano, kuno mhalati zogendelela kutoigwa. 14 Siku da kabili wadizunguluka dibuga mwanza umoja, na wabwela kuna ing'hambi, watenda vivo kwa siku sita.

15 Siku da saba walamuka ulukwili, imitootondo ng'hani, na wadizunguluka dibuga miyanza saba kamba viwatendaga. Ikala siku dijo diiyeka wadizunguluka dibuga miyanza saba. 16 Umwanza wa saba, iwalava nhosa viwatowile zimhalati, Yoshua kawalongela iwanhu, “Guteni kwavija Mndewa Imulungu kawagwelela dibuga! 17 Dibuga na vose vili mumo vilavigwa kwa Mndewa Imulungu ili vibanangigwe. Lahabu imgoni yaiyeka na iwanhu weli mng'anda yake awo onda wasigale wagima, kwavija kawafisa iwasenga tuwatumile. 18 Lakini sikumusole kinhu chochose kilavigwe ili kibanangigwe, mwahasola kinhu chochose kilavigwe ili kibanangigwe moitenda ing'hambi ya iwanhu wa Izilaeli iwe kinhu cha kubanangigwa na mogala gehile. 19 Lakini shaba yose na zahabu na iviya va shaba ya kiguzi na mizuma avo ving'ala kwa Mndewa Imulungu, avo vigaligwe mna ingama ya Mndewa Imulungu.”

20 Avo, iwanhu waguta nyangi na mhalati zitoigwa. Bahaja wanhu viwahulike mhalati zolila, iwanhu waguta nyangi, na uluwa ludidimila hasi lose, avo iwanhu wengila mdibuga, kila munhu kuulongozi wake na wadisola dibuga. 21 Abaho wakinanga kila kinhu kili mdibuga dijo, na wawakoma kwa sime, wambigalo na watwanzi na wana na wavele na ng'ombe na ng'hondolo na vihongwe.

22 Abaho Yoshua kawalongela iwanhu wabili wacholile kuisungulila isi ayo, “Choleni mna ing'anda ya ija imgoni na mumgale mtwanzi ayo hamoja na iwanhu wose weli ndugu zake kamba vimuiduwile kumwake.” 23 Avo awo iwabwanga wacholile kuisungulila isi ayo wachola, wamgala Lahabu na tatake na mamake na ndugu zake na lukolo lwake lose. Wawagala kunze behi ya ing'hambi ya iwanhu wa Izilaeli. 24 Abaho wadisoma moto dibuga na kila kinhu kikalile mumo. Ila shaba na zahabu na iviya va shaba ya kiguzi na mizuma, wavika mna ingama mbuli ya ng'anda ya Mndewa Imulungu. 25 Lakini ija imgoni Lahabu na iwanhu wa ng'anda ya tatake na ndugu zake wose, Yoshua kauhonya ugima wao. Lahabu kakala mna iwanhu wa Izilaeli mbaka lelo, kwavija kawafisa iwasenga watumigwe na Yoshua wakadisungulile buga da Yeliko.

26 Yoshua kalonga mbuli za kuiduwila kuulongozi wa iwanhu, kawalongela