1 Yoshua kawating'haniza iwanhu wose wa makabila ga Izilaeli ako Shekemu, na kawakema iwavele na ivilongozi na iwasemi na iwakulu wa iwanhu wa Izilaeli, na hewo weza kuulongozi wa Imulungu. 2 Yoshua kawalongela iwanhu wose, “Mndewa Imulungu, Imulungu wa Izilaeli kolonga, ‘Ako umwaka iwahenga zenu wakala ako umwambu wa lwanda lwa Fulate, Tela tatao Abulahamu na Naholi, waisang'hanila imilungu iyagwe. 3 Niye nimsegesa imuhenga wenu Abulahamu kulawa ako umwambu wa lwanda lwa Fulate, na nimgala mwiisi ino ya Kanaani, na nimgwelela ulelo mkulu, nimgwelela Isaka, 4 na Isaka nimgwelela Yakobo na Esau. Nimgwelela Esau isi ya kuvigongo va Seili yaisole, lakini Yakobo na wanage wachola Misili. 5 Abaho niwatuma Musa na Haluni, na niikoboza isi ya Misili kwa gago ganhendile hagati yake, abaho ako kumwande niwalava mweye mwiisi ayo. 6 Niwalava iwahenga zenu mwiisi ya Misili na niwagala mbaka kuna ibahali. Wamisili wawakweleleza iwahenga zenu kwa mituka ya kubulula na iwakalizi wakwelile falasi mbaka ako kuna ibahali ya Shamu. 7 Iwahenga zenu viwanililile niye Mndewa Imulungu, nika ziza hagati yao na Iwamisili na nitenda bahali iwagubike Iwamisili. Mweye mukona gaja ganitendile ako Misili. Mukala ako kuluwala kwa miyaka mingi. 8 Abaho niwagala mweye mwiisi ya Waamoli wakalile umwambu wa Yolidani. Hewo waitowa na mweye na niye niwagela mmakono genu na muisola isi yao, na niye niwabananga hewo kuulongozi wenu. 9 Abaho Balaki mwanage Sipoli, imndewa wa Moabu, keza kuitowa na Waizilaeli. Heyo kamgoneka Balaamu mwanage Beoli ili yawaduwile mweye, 10 lakini niye simtegeleze Balaamu. Avo kawatambikila, niye niwasegesa mweye mumkono wa Balaki. 11 Abaho muloka ulwanda lwa Yolidani na kuvika ako Yeliko, ivilongozi wa Yeliko waitowa na mweye, vivija Waamoli na Wapelizi na Wakanaani na Wahiti na Wagiligashi na Wahivi na Wayebusi. Awo wose niwagela mmakono genu. 12 Niye niwaswaswanya awo iwandewa wabili wa Waamoli kuulongozi wenu kamba munhu viyoswaswanyigwa na dondola, hamuwawingile kwa misime yenu hebu misale yenu. 13 Niwagwelela isi hamuisang'hanile na mabuga hamugazengile, na mweye mokala mumo. Moja matunda ga mizabibu na mizeituni hamuihandile.’

14 “Avo sambi mdumbeni Mndewa Imulungu na mumsang'hanile kwa mizoyo yenu yose. Muisegese imilungu iwaisang'hanile iwahenga zenu ako umwambu wa ulwanda na ako Misili, na mumsang'hanile Mndewa Imulungu. 15 Kamba haviwanogela bule mgameso genu kumsang'hanila Mndewa Imulungu, avo lelo didino saguleni ayo yonda mumsang'hanile, kamba imilungu iwaisang'hanile iwahenga zenu ako umwambu wa ulwanda hebu imilungu ya Waamoli awo omukala mwiisi yao sambi. Lakini niye na iwanhu wa mng'anda mmwangu tomsang'hanila Mndewa Imulungu.”

16 Abaho iwanhu wamwidika, “Aka, mbuli ayo ikale kutali na siye, hatudaha kumuleka Mndewa Imulungu na kuisang'hanila imilungu iyagwe, 17 kwavija Mndewa Imulungu, Imulungu wetu katulava siye na iwahenga zetu ako mwiisi ya Misili, kutukalile watumwa, na katenda vilaguso vikulu mgameso getu na katukaliza mna inzila yose itubitile mna ziisi za iwanhu watubitile hagati yao. 18 Mndewa Imulungu kawawinga kuulongozi wetu iwanhu wose, awo Iwaamoli wakalile mwiisi ino. Avo na siye vivija tomsang'hanila Mndewa Imulungu, kwavija heyo ayo Imulungu wetu.”

19 Lakini Yoshua kawalongela iwanhu, “Mweye hamudaha kumsang'hanila Mndewa Imulungu, kwavija heyo Imulungu kang'ala, heyo Imulungu yeli na migongo, honda yagagele kumgongo gehile genu hebu nzambi zenu. 20 Kamba mwahamuleka Mndewa Imulungu na kuisang'hanila imilungu iyagwe, heyo kowakoboza na kowabananga, hamoja kawatendela ganogile.” 21 Lakini awo iwanhu wamulongela Yoshua, “Aka, siye tomsang'hanila Mndewa Imulungu.” 22 Abaho Yoshua kawalongela iwanhu, “Mweye wenyego awo wasindila kamba musagula kumsang'hanila Mndewa Imulungu.” Hewo walonga, “Siye awo wasindila.” 23 Avo kawalongela, “Avo isegeseni imilungu ya isi ziyagwe ili hagati yenu, na mumgoge Mndewa Imulungu, Imulungu wa Izilaeli kwa mizoyo yenu yose.” 24 Awo iwanhu wamulongela Yoshua, “Siye tomsang'hanila na kumtegeleza Mndewa Imulungu, Imulungu wetu.” 25 Avo siku dijo Yoshua katenda lagano na iwanhu wa Izilaeli na kawagwelela malagizo na mafundizo ako Shekemu. 26 Abaho Yoshua kazandika mbuli zose azo mna ikitabu cha malagizo ga Imulungu, abaho kasola dibwe kulu na kadisimika hasi ya biki da mwaloni dikalile behi na dihema da Mndewa Imulungu. 27 Yoshua kawalongela iwanhu wose, “Loleni, dibwe dino dokuwa usindila kumwetu, kwavija dihulika mbuli zose ziyatulongele Mndewa Imulungu. Avo dokuwa usindila kumwenu, ili sikumumuleke Imulungu wenu.” 28 Avo Yoshua kawaleka iwanhu wasegele kila munhu kachola kuna uuhazi wake.

29 Vigabitile gago Yoshua mwanage Nuni, imsang'hanaji wa Mndewa Imulungu, kafa kuno kana miyaka gana dimoja na longo. 30 Wamzika Yoshua mwiisi ya uhazi wake ako Timinati Sela, isi ili kuvigongo va Efulaimu, mwambu wa kasikazini wa lugongo lwa Gaashi.

31 Avo iwanhu wa Izilaeli wamsang'hanila Mndewa Imulungu siku zose za ugima wa Yoshua, na siku zose za ugima wa iwavele wagendelele kukala wagima viyafile Yoshua, awo wagajuwile gose gayatendile Mndewa Imulungu kwa iwanhu wa Izilaeli.

32 Ayo imizege ya Yusufu, iwasegele nayo iwanhu wa Izilaeli kulawa Misili, waizika ako Shekemu mna iisi iyagulile Yakobo kulawa kwa wanage Hamoli tatake Shekemu kwa vihande gana dimoja va shaba. Isi ayo iwa uhazi wa iwanhu wa ulelo wa Yusufu.

33 Na Eleazali mwanage Haluni kafa, na wamzika ako Gibea, buga da imwana Finehasi, diyagweleligwe ako kuvigongo va Efulaimu.

<- Yoshua 23