1 Abaho iwanhu wa kabila da Efulaimu wamuuza Gideoni, “Habali kututenda vino? Habali hutukemile viucholile kuitowa na Wamidiani?” Avo wamkomhokela ng'hani.

2 Lakini Gideoni kawedika, “Vino niye nitenda choni kikulu kubanza mweye? Vinhu viwadondoleze wanhu wa Efulaimu viwamambukize kusenga vinoga ng'hani kubanza avija viwasengile iwanhu wa Abiezeli. 3 Imulungu kawagela mmakono genu iwakulu wa Midiani, Olebu na Zeebu. Avo niye nitenda choni kubanza mweye?” Avo Gideoni viyalongile gago, waleka kumkomhokela.

4 Gideoni na wayage magana madatu wavika Yolidani, waloka umwambu. Hamoja wakala wadonhile ng'hani, wagendelela kuwakweleleza awo owehila.

5 Viwavikile Sukoti, kawalongela wanhu wa buga dijo, “Chonde, wagweleleni wano wayangu magate kwavija wadonha ng'hani, na niye ning'hali nowakweleleza Zeba na Zalimuna iwandewa wa Midiani.”

6 Lakini ivilongozi wa Sukoti wamuuza, “Habali tuwagwelele magate wakalizi zako kuno mung'hali hamna wahuma Zeba na Zalimuna?”

7 Gideoni kawedika, “Vivo mulonga, lakini Mndewa Imulungu yahawagela mmakono gangu Zeba na Zalimuna nozidega dega ng'huli zenu kwa miba na mbigili za ako kuluwala.”

8 Viyasegele aho kachola kwa wanhu wa Penueli kawapula kamba vivo, lakini wanhu wa Penueli wamwidika kamba viwamwidike wanhu wa Sukoti. 9 Gideoni kawalongela, “Nahabwela kuno nihuma nokibena kilingo kino.”

10 Zeba na Zalimuna wakala kuko Kalikoli hamoja na wakalizi wao elufu kumi na tano, wano awo iwakalizi wasigale mna iwakalizi wa wanhu wa mwambu wa kudilawila zuwa, wakalizi laki na elufu ishilini wakomigwa. 11 Gideoni kagoga inzila ilongoza kwa iwanhu wakalaga mvibanda ako umwambu wa kudilawila zuwa wa Noba na Yogibeha, kawavamila iwakalizi awo kwa kusinhukiza. 12 Iwandewa awo wabili wa Midiani, Zeba na Zalimuna wakimbila, lakini Gideoni kawakweleleza, kawagoga na iwakalizi wose wengila bwembwe.

13 Abaho Gideoni, mwanage Yoashi, kabwela kulawa kuing'hondo kubitila nzila ya umtelemuko wa Helesi. 14 Kamgoga mbwanga imoja wa ako Sukoti na kamuuza. Mbwanga ayo kamwandikila gamatwaga ga ivilongozi na iwavele wa Sukoti, wose kwa wose wakala malongo saba na saba. 15 Avo Gideoni kachola kwa iwanhu wa Sukoti kawalongela, “Awano Zeba na Zalimuna, awo mbuli yao muniliga mulonga, ‘Habali tuwagwelele magate wakalizi zako wadonhile na kuno mung'hali hamna wahuma Zeba na Zalimuna?’ ” 16 Avo, kawasola iwavele wa buga da Sukoti na kawadega mzing'huli zao kwa miba na mbigili avo kawafunza iwanhu wa Sukoti. 17 Vivija kakibena ikilingo cha Penueli na kawakoma iwambigalo wa buga dijo.

18 Abaho kawauza Zeba na Zalimuna, “Wanhu wamuwakomile ako Taboli wakala vilihi?” Wamwidika, “Waigala na gweye, kwavija oneka kamba wana wa mndewa.” 19 Na heyo kawalongela, “Awo wakala ndugu zangu, wanage mamangu yanilelile. Noiduwila kwa Mndewa Imulungu yeli mgima, maza hamuwakomile na niye sambi niwakome mweye.” 20 Avo kamulongela Yeteli, mwanage wa chaudele, “Izo uwakome.” Lakini Yeteli kadumba kuwakoma, kwavija kakala yang'hali mwana. 21 Abaho Zeba na Zalimuna walonga, “Tukome gweye mwenyego, kwavija ino sang'hano ya munhu mkulu.” Gideoni kawakoma mwenyego na kasola ivinhu va ulembo vikalile mzisingo za ngamiya wao.

22 Abaho Waizilaeli wamulongela Gideoni, “Gweye uwe kilongozi wetu, gweye na wanago na wazukulu zako vivija watutawale, kwavija gweye kutukombola kulawa mmakono ga Wamidiani.” 23 Gideoni kawalongela, “Niye siwatawala bule na wanangu honda wawatawale bule, Mndewa Imulungu ayo yonda yawatawale mweye.” 24 Abaho kawalongela, “Niye nowapula kinhu kimoja, chonde kila imoja wenu yanigwelele iheleni yake imuwabokile iwanhu awo.” Iwanhu awo wakala na heleni za zahabu, kwavija wakala Waishimaeli. 25 Wanhu wamwidika, “Tokugwaa kwa kulonda wenyego.” Avo, watandika kiwalo na kila imoja wao kagela iheleni iyasolile kwa iwanhu awo. 26 Avo uzito wa ziheleni za zahabu ziyalondile ukala kilo malongo mabili, wahaleka ivinhu va ulembo na imikufu na iviwalo va iwandewa wa Midiani, na imikufu ikalile msingo za iwangamiya. 27 Gideoni katenda kinyago cha zahabu choneke kamba kikoti na kakika kudibuga jake da Ofula. Waizilaeli wose wamuleka Mndewa Imulungu na wachola kukitambikila ikinyago acho. Kinhu acho kikala mtego kwa Gideoni na iwanhu wa ng'anda yake. 28 Avo, Wamidiani wahumwa na Waizilaeli na hawenuke kabili. Isi ikala itindiwale kwa miyaka malongo mane, siku zose za ugima wa Gideoni.

29 Gideoni, vivija kokemigwa Yelubaali, mwanage Yoashi kachola kukala ukae kumwake. 30 Avo, Gideoni kakala na wana wa kimbigalo malongo saba, kwavija kakala yasolile watwanzi wengi. 31 Kakala na mtumwa wa kitwanzi ako Shekemu na ayo vivija kamulelela mwana wa kimbigalo, twaga jake Abimeleki. 32 Gideoni mwanage Yoashi kafa kuno kana miyaka mingi, na wamzika kudipanga da tatake Yoashi ako kudibuga da Ofula ya Wabiezeli.

33 Bahaja Gideoni viyafile, Waizilaeli wainanga kabili na wavitambikila vinyago va Baali. Wamtenda Baali Beliti kamba ayo imulungu wao. 34 Waizilaeli wamuleka Mndewa Imulungu, Imulungu wao, yawakombole kulawa mmakono ga awo wawehile wawazunguluke kila mwambu. 35 Vivija hawawatendele ganogile wanage Yelubaali ayo yakemigwe Gideoni kwa ganogile gayawatendele iwanhu wa Izilaeli.

<- Wasemi 7Wasemi 9 ->