Mwanduso 25

Ulelo uyagwe wa Abulahamu

(1 Umwaka 1:32-33)

1 Abulahamu kasola mwehe iyagwe, twaga jake Ketula. 2 Ketula kamulelela Abulahamu Zimlani na Yokushani na Medani na Midiani na Ishibaki na Shua. 3 Yokushani kamulela Sheba na Dedani. Ulelo wa Dedani wakala Waashulu na Waletushi na Waleumi. 4 Wanage Midiani wakala Efa na Efeli na Hanoki na Abida na Elidaa. Wose wano walawa muulelo wa Ketula.

5 Abulahamu kamgwaa Isaka uhazi wa vinhu vake vose. 6 Lakini yang'hali mgima kawagwaa nhunza iwana yalelile na watumwa wake. Abaho kawagala wana awo kuna iisi ya mwambu wa kudilawila zuwa, kutali na kuyeli mwanage Isaka.

Ifa ya Abulahamu na kuzikigwa kwake

7 Abulahamu kakala na miyaka gana na malongo saba na tano. 8 Abulahamu viyafile kakala mvele ng'hani, kauja ng'hani na kailumba na wahenga zake wafile mwaka. 9 Wanage Abulahamu Isaka na Ishimaeli, wamzika tatao mwiimhango ya Makipela, habehi na Mamule mumgunda ukalile wa Efuloni, mwanage Sohali, Muhiti. 10 Mgunda awo Abulahamu kakala yaugulile kwa Wahiti, heyo na mwehe wake Sala wazikigwa mumgunda awo. 11 Abulahamu viyafile, Imulungu kamtendela ganogile Isaka, mwanage Abulahamu, keka ng'hambi yake behi na Beeli Lahai Loi.

Ulelo wa Ishimaeli

(1 Umwaka 1:28-31)

12 Uno awo ulelo wa Ishimaeli, mwanage Abulahamu, ija imsang'hanaji wake Sala, Hajili Mmisili, yalelile na Abulahamu. 13 Gano gago matwaga ga wanage Ishimaeli, kamba viwaleleke, Nebayosi, mwana wa chaudele wa Ishimaeli na Kedali na Adibeeli na Mibisamu, 14 na Mishima na Duma na Masa, 15 Hadadi na Tema na Yetuli na Nafishi na Kedema. 16 Wano awo wanage Ishimaeli, wakalile watawala wa makabila longo na mbili. Mabuga gao na ng'hambi zao zikemigwa kwa matwaga gao. 17 Ishimaeli viyafile kakala yavikize miyaka gana na malongo madatu na saba, nayo kailumba na wahenga zake wafile umwaka. 18 Ulelo wa Ishimaeli wakala mna gamabuga gakalile hagati ya Havila na Shuli, behi na Misili, kuchola Ashulu. Wao wakala waigolile na ulelo uyagwe wa Abulahamu.

Kuleleka kwa Esau na Yakobo

19 Uno awo ulelo wa Isaka mwanage Abulahamu. Abulahamu kamulela Isaka. 20 Isaka viyavikize miyaka malongo mane kamsola Lebeka, mndele wa Besueli, Imualamu wa Padani Alamu na lumbu jake Labani Imualamu. 21 Lebeka kakala mgumba, avo Isaka kampula Mndewa Imulungu. Nayo Mndewa Imulungu kahulika kupula kwake na imwehe Lebeka kagoga inda. 22 Inda ayo ikala ya mapacha, wang'hali hawanavumbuka wakala oisung'hasung'ha mwiinda yake. Avo kalonga, “Habali kinhu kamba kino chondawilila niye?” Avo kachola kumuuza Mndewa Imulungu.

23 Mndewa Imulungu kamulongela,

“Makabila mabili ga mwiinda yako,

ng'holo mbili zonda uzilele, zogomba.

Imoja yokuwa na nguvu kubanza iyagwe,

imkulu komsang'hanila imdodo.”

24 Siku zake za kulela vizivikile, Lebeka kalela wana mapacha. 25 Wa ichanduso kakala mdung'hu, lukuli lose upipi wiiyeka, avo wamkema Esau. 26 Wa kabili kavumbuka kuno kamgoga Esau mna ikisiginho, avo wamgwaa twaga da Yakobo. Lebeka viyawalelile iwana, Isaka kakala yavikize miyaka malongo sita.

Esau kochuuza kiyalondigwe kuhazi

27 Wana awo wakula, Esau kakala galu wa kusaka, kakala konogelwa kusinda kumuhulo, lakini Yakobo kakala munhu muhole, kakalaga ukae. 28 Avo, Isaka kakala yamnogele Esau, kwavija kakala kotobola nyama ziyakomile, lakini Lebeka kakala yamnogele Yakobo.

29 Siku dimoja, Yakobo kakala koteleka ng'hunde, Esau kakala yabwelile kulawa kusaka. Kakala na nzala ng'hani, 30 avo kamulongela Yakobo, “Nofa nzala, ngolela kinhu acho ikidung'hu ndie.” Lekaavo wamgwaa twaga da Edomu, fambulo jake mdung'hu.

31 Yakobo kamwidika, “Nokugwaa kamba wahangwaa kija kiulondigwa kuhazi kamba mwana wa chaudele.”

32 Esau kamulongela, “Ona! Nolonda kufa, uhazi wangu wa mwana wa chaudele onifaya choni?”

33 Yakobo kamwidika, “Tanhu iduwile kamba kongwaa kiulondigwa kuhazi.”

Esau kaiduwila kamgwaa Yakobo kiyalondigwe kuhazi. 34 Avo Yakobo kamgwaa Esau gate na ng'hunde. Kaja, kang'wa, abaho kenuka, kasegela. Vino vivo Esau viyakibezile kija kiyalondigwe kuhazi kamba mwana wa chaudele.

<- Mwanduso 24 Mwanduso 26 ->