1 Avo, Salai, mwehe wake Abulamu, kakala hanamulelela wana bule. Lakini kakala na mtumwa wa kitwanzi, Mmisili, twaga jake Hajili. 2 Avo Salai kamulongela Abulamu, “Mndewa Imulungu kangwaa ugumba. Genda ukawase na mtumwa wangu wa kitwanzi, sengine nopata wana kubitila heyo.” Avo Abulamu katogola kiyalongile Salai. 3 Abaho, Salai kamsola mtumwa wake wa kitwanzi, mwenekae wa Misili, yakemigwe Hajili kamgwaa mkasano wake yamtende mwehe wake. Gago galawilila Abulamu viyakalile Kanaani kwa miyaka longo. 4 Abulamu kawasa na Hajili, na Hajili kagoga inda. Lakini Hajili viyagogile inda kasonga kuitapa na kumbezeli Salai.

5 Abaho Salai kamulongela Abulamu, “Gweye ayo kilamuso cha niye kudununzwa. Niye nikugwaa mtumwa wangu, kwavija sambi kajuwa kana inda, kosonga kunibezeli niye. Mndewa Imulungu na yatutaguse niye na gweye!”

6 Lakini Abulamu kamulongela Salai, “Mtumwa wako kammakono gako, mtendele viulonda.” Avo Salai kamdununza ng'hani Hajili mbaka kakimbila.

7 Msenga wa kuulanga wa Mndewa kamvika Hajili kuinzasa ako kuluwala, ikalile hamgwazo wa nzila ya kuchola Shuli. 8 Msenga ayo wa kuulanga kamuuza, “Gweye Hajili, mtumwa wa Salai, kolawa kwahi na kochola kwahi?”

Hajili kamwidika, “Nomkimbila Salai inimsang'hanila.”

9 Abaho msenga ayo wa Mndewa Imulungu kamulongela, “Bweleganya kwa Salai ukamtegeleze.” 10 Abaho kamulongela, “Nokugwaa ulelo mkulu ng'hani mbaka wanhu olemelwa kuwapeta.” 11 Abaho msenga ayo wa Mndewa Imulungu kamulongela, “Gweye kuna inda, na kolela mwana wa kimbigalo, komgwaa twaga da Ishimaeli, fambulo jake kahulika, kwavija Mndewa Imulungu kahulika kudununzwa kwako. 12 Lakini mwanago kokala kamba kihongwe wa kumuhulo, hailumba na wanhu na wanhu nao hawailumba na heyo bule. Koihasanya na ndugu zake wose.”

13 Avo Hajili kamgwaa Mndewa Imulungu iyalongile na heyo twaga da, “Imulungu konilola.” Kwavija kalonga, “Nimona heyo yonyona niye.” 14 Lekaavo kuna sima dokemigwa Beeli Lahai Loi, fambulo jake sima da ija yeli mgima yonyona niye. Sima dijo ding'hali kuko, ako hagati ha Kadeshi na Beledi.

15 Avo Hajili kamulelela Abulamu mwana wa kimbigalo, Abulamu kamgwaa mwana ayo twaga da Ishimaeli. 16 Hajili viyamulelile Ishimaeli, Abulamu kakala yavikize miyaka malongo manane na sita.

<- Mwanduso 15Mwanduso 17 ->