1 Kipindi acho mndewa Amulafeli wa Shinali na mndewa Alioko wa Elasali na mndewa Kedolilaomeli wa Elamu na mndewa Tidali wa Goimu, 2 wachola kuitowa na wandewa wano, mndewa Belao wa Sodoma na mndewa Bilisha wa Gomola na mndewa Shinabu wa Adima na mndewa Shemebeli wa Seboimu na mndewa wa Bela na vivija Soali. 3 Wandewa awo wose watano waiting'hana kubonde da Sidimu hebu bahali ya Mkele. 4 Kwa kipindi cha miyaka longo na mibili wakala mmakono ga mndewa Kedolilaomeli, lakini muumwaka wa longo na ndatu wambiduka. 5 Muumwaka wa longo na nne, mndewa Kedolilaomeli na waja wandewa wayage weza na kuwahuma Walefai ako Ashitaloti Kalinaimu na Wazuzi ako Hamu na Waemi ako Shawe Kiliataimu, 6 na Waholi ako kuvigongo vao va Seili mbaka Elipalani behi na kiwala. 7 Abaho wabwela kuchugu mbaka Enimishipati hebu Kadeshi, waitowa isi yose ya Waamaleki na kuwahuma na vivija wawatowa Waamoli wakalile Hazazoni Tamali.

8 Abaho mndewa wa Sodoma na mndewa wa Gomola na mndewa wa Adima na mndewa Seboimu na mndewa wa Bela hebu Soali wengila kukigongo kubonde da Sidimu, 9 waitowa na Kedolilaomeli mndewa wa Elamu na Tidali mndewa wa Golimu na Amulafeli mndewa wa Shinali na Alioko mndewa wa Elasali, wandewa wane waitowa na wandewa watano. 10 Bonde da Sidimu dikala dimemile masimo ga lami, avo wandewa wa Sodoma na Gomola viwakalile okimbila ing'hondo wadumbukila mumo, lakini wandewa wayagwe wasigale wakimbilila kuvigongo. 11 Avo waja wahumile, wavisola vinhu vose va Sodoma na Gomola, vivija wasola ndiya zao, wasegela. 12 Vivija wamgela mmakono Lutu, mwana wa ndugu yake Abulamu hamoja na vinhu vake, kwavija Lutu kakala yokala Sodoma, abaho walawanya.

13 Munhu imoja yahonyeke, kamgalila usenga Abulamu yakalile Muebulania, na yakalile kokala behi na mibiki mikulu ya Mamule ya Muamoli, yakalile ndugu yake Eshikoli na Aneli, wose wakala wailumbile na Abulamu. 14 Abulamu viyahulike ndugu yake Lutu kageligwa mmakono, kalawa na wanhu zake wakalile magalu magana madatu na longo na nane waleleke mng'anda yake, wawakweleleza wanhu awo mbaka Dani. 15 Ako kawagola wanhu zake mvibumbila. Ikilo kawatowa wanhu awo, kawawinga mbaka Hoba, kasikazini ya Damesiki. 16 Baho, Abulamu kavikombola vinhu vose visoligwe na wanhu awo na kamkombola Lutu ndugu yake, vinhu vake, hamoja na watwanzi na wanhu wayagwe.

17 Abulamu viyakalile kobwela kulawa kumtowa mndewa Kedolilaomeli na wayage, mndewa wa Sodoma kachola kuiting'hana na heyo kubonde da Shawe hebu Bonde da Mndewa. 18 Na heyo Melikizedeki, yakalile mndewa wa Salemu na vivija yakalile mulava nhosa wa Imulungu yeli Uchanha Ng'hani, kamgalila Abulamu gate na divai, 19 kamtambikila kwa kulonga, “Imulungu yeli Uchanha Ng'hani, yalumbile ulanga na isi, yamtendele ganogile Abulamu! 20 Na Imulungu yeli Uchanha Ng'hani yagweleligwe ukulu, kwa kukugwaa udahi wa kuwahuma wanhu wakwihile.” Na heyo Abulamu kamgwaa Melikizedeki kinhu kimoja mna ikila vinhu longo kwa vinhu vose viyapatile kuing'hondo.

21 Mndewa wa Sodoma kamulongela Abulamu, “Ngwelela niye wanhu awo, na vinhu vose avo sola gweye.”

22 Abulamu kamwidika mndewa wa Sodoma, “Noiduwila kwa Mndewa Imulungu, yeli Uchanha Ng'hani, yalumbile ulanga na isi, 23 sisola kinhu chako chochose, sisola hata luzi hebu luzabi lwa vilatu, Sambi uitape kwa kulonga, ‘Niye ayo nimtendile Abulamu yawe tajili’ 24 Avo sisola kinhu chochose, ila nosola kiwadile wanhu zangu na kija cha wanhu wanicholile nao, Aneli na Eshikoli na Mamule, wao wana fungu mna ivinhu avo.”

<- Mwanduso 13Mwanduso 15 ->