Kulawa 35

Malagizo mbuli ya siku ya kubwihila

1 Musa kaiting'hana hamoja na wanhu wose wa Izilaeli abaho kawalongela, “Mndewa Imulungu kawalagiza musang'hane mbuli zino, 2 kwa siku sita musang'hane, lakini siku ya saba ni siku ing'alile ya kubwihila kwa Mndewa Imulungu. Munhu yoyose yonda yasang'hane mwiisiku ayo yakomigwe. 3 Sikumubwinhe moto mzikae zenu mwiisiku ayo ya kubwihila.”

Sadaka za hema ding'alile

(Kulawa 25:1-9)

4 Musa kawalongela Waizilaeli, “Mbuli ino ayo iyailagize Mndewa Imulungu, 5 mna ivinhu venu, mulavileni sadaka Mndewa Imulungu. Munhu yoyose yolonda, yamulavile Mndewa Imulungu sadaka za zahabu na shaba na shaba ya kiguzi, 6 sufi ya buluu na sufi ya zambalau na sufi ndung'hu na viwalo vinogile va kitani na viwalo vitendigwe kwa mibahila ya mbuzi. 7 Mulavileni ng'hwembe za ng'hondolo mbigalo zigeligwe langi ndung'hu na ng'hwembe za mnyama wa mbahali na mibiki ya muhamvi na mkese, 8 mavuta ga taa na vinhu vilondigwa mbuli ya mavuta ga kubakala na mbuli ya ubani unung'hila goya, 9 mabwe ga bei ng'hulu gokemigwa shohamu na mabwe gayagwe mbuli ya kukihamba kikoti cha mulava nhosa na kikoba cha mmhambaga.

Vinhu vilondigwa mna dihema ding'alile.

(Kulawa 39:32-43)

10 “Kila munhu hagati yenu yeli na nzewele ya kutenda kinhu chochose yasang'hane ivinhu viyalagize Mndewa Imulungu. 11 Watende hema ding'alile na ngubiko yake, vifungilo vake na vibao vake na mango zake na mhanda zake na vikalilo vake, 12 sanduku da lagano na mango zake za kudipapila na ngubiko yake na panziya da hanhu hong'ala ng'hani, 13 meza na mango zake za kuipapila na viya vake na magate galavigwe kwa Mndewa Imulungu. 14 Watende kingolobweda cha taa na viya vake na taa zake na mavuta ga taa, 15 upango wa kusomela ubani na mango zake za kuupapila na mavuta gang'alile na ubani unung'hila goya na panziya da ulwivi lwa dihema. 16 Watende upango wa kulavila nhosa na lwavu lwake lwa shaba ya kiguzi na mango zake za kuupapila na viya vake vose na bakuli da shaba ya kiguzi na mgimbo wake. 17 Watende mapanziya ga uluwa na mhanda zake na vikalilo vake na panziya da ulwivi lwa uluwa 18 na vifungilo va nzabi va dihema na va uluwa na nzabi zake. 19 Watende viwalo vilukigwe vinogile mbuli ya kusang'hanila hanhu hong'ala na viwalo va Haluni na wanage ili wasang'hane kamba walava nhosa.”

Wanhu ogala sadaka zao

20 Avo kibumbila chose cha Waizilaeli wasegela kuulongozi wa Musa, 21 kila munhu kasulukila mmoyo wake na kamulavila sadaka Mndewa Imulungu mbuli ya dihema da mting'hano na sang'hano zake zose, na viwalo vake ving'alile. 22 Avo wanhu weli na moyo unogile watwanzi na wambigalo wagala heleni na pete na ushanga na kila kinhu cha kuihamba cha zahabu na wavinula uchanha kamba kilaguso cha kumulavila Mndewa Imulungu. 23 Kila munhu kagala chochose kiyelinacho, mwene sufi ya buluu hebu sufi ya zambalau hebu sufi ndung'hu hebu viwalo vitendigwe kwa mibahila ya mbuzi hebu ng'hwembe za ng'hondolo mbigalo zigeligwe langi ndung'hu hebu ng'hwembe za mnyama wa mbahali. 24 Kila munhu yadahile kugala sadaka za shaba na shaba ya kiguzi kamgalila Mndewa Imulungu, na kila munhu yeli na mbao za mkese kazigala. 25 Watwanzi wose wadahile kusona wagala vinhu vao viwasonile kwa sufi ya langi ya buluu na ya zambalau na ndung'hu na kitani kilukigwe goya. 26 Na watwanzi wose wadahile kusona viwalo waluka mibahila ya mbuzi. 27 Vilongozi wagala mabwe ga shohamu na mabwe gayagwe mbuli ya kikoti na kikoba cha mmhambaga. 28 Vivija wagala vinhu vinung'hila goya na mavuta ga taa na mavuta ga kubaka na ubani unung'hila goya. 29 Waizilaeli wose wambigalo na watwanzi weli na moyo unogile wamulavila Mndewa Imulungu sadaka azo mbuli ya sang'hano ya Mndewa Imulungu kamba Musa viyawalagize watende.

Wasang'hanaji wa kutenda dihema da mting'hano

(Kulawa 31:1-11)

30 Abaho Musa kawalongela Waizilaeli, “Mndewa Imulungu kamsagula Bezaleli mwanage Uli mzukulu wa Huli kulawa kabila da Yuda, 31 kammemeza loho wake na kamgwaa nzewele na kujuwa vinhu va ufundi kwa kila sang'hano, 32 ili yatende sang'hano inogile ya vinhu va zahabu na shaba na shaba ya kiguzi. 33 Yasongole mabwe ga kuhambila na mbao mbuli ya sang'hano zose za ufundi. 34 Vivija kamgwaa heyo na Oholiabu mwanage Ahisamaki kulawa kabila da Dani, udahi wa kuwafunza wayagwe ufundi awo. 35 Kawagwelela udahi wa kutenda kila sang'hano ya ufundi itendigwa na wanhu osongola mabwe na oluka viwalo va sufi ya langi ya buluu na zambalau na ndung'hu na oluka kitani inogile, kwa ufundi wao wose.

<- Kulawa 34 Kulawa 36 ->