1 Kukala na munhu imoja wa kabila da Lawi, yamsolile mtwanzi imoja, mtwanzi ayo vivija kolawa mdikabila da Lawi. 2 Avo mtwanzi ayo kagoga inda, kalela mwana wa kimbigalo. Viyamone mwana ayo kanoga ng'hani, kamfisa kwa miyezi midatu. 3 Viyonile hadaha kumfisa kabili, kasola kisege kilukigwe na milanzi kakibaka tongo tongo, kamwika mwana ayo mkisege acho, abaho kakizudika ikisege mmidete mgamazi kumgwazo wa ulwanda lwa Naili. 4 Lumbu jake ija imwana, kaifisa behi ili yalole choni chonda kimulawilile.

5 Avo mndele wa Falao kahumuluka muulwanda yakoge, wasang'hanaji zake wa kitwanzi wakala otembela tembela kumgwazo wa ulwanda. Mndele wa Falao kachona kija ikisege mmisanze, kamtuma msang'hanaji wake yamgalile. 6 Mndele wa Falao viyakifungule ikisege acho kamona mwana, kakala kolila. Heyo kamonela bazi, kalonga, “Imwana ino vivija wa Waebulania.”

7 Bahaja lumbu jake mwana ija kalawilila kamuuza mndele wa Falao, “Kolonda nichole kumkema mtwanzi wa Kiebulania yakong'hezele mwana ino?”

8 Mndele wa Falao kamwidika, “Ona, genda kamkeme.” Avo mndele ayo kachola kumkema mamake imwana ayo. 9 Mndele wa Falao kamulongela mtwanzi ayo, “Msole imwana ino unyong'hezele, na niye nokuliha fungu jako.” Avo mtwanzi ayo kamsola imwana na kumong'heza. 10 Mwana viyakalile mbala goya, kamgala kwa mndele wa Falao, heyo kamsola na kamtenda mwanage. Kalonga, “Kwavija nimvabula mgamazi,” avo kamkema Musa, fambulo jake kuvabula.

11 Musa viyakulile, kachola kuwatembelela ndugu zake Waebulania, kawona viwananahizwe kusang'hana sang'hano ndala. Kamona Mmisili imoja komtowa Muebulania, imoja wa Waebulania wayage. 12 Musa kawegesela na viyone kuduhu munhu yomulola, kamkoma Immisili na kamfisa mmisanga. 13 Imitondo yake, Musa kachola kabili kawona Waebulania wabili oitowa. Avo kamuuza ija yomonela miyage, “Habali komtowa miyago?”

14 Munhu ayo kamwidika, “Nani yakwikile uwe kilongozi wetu na msemi wetu? Kolonda kunikoma kamba vuumkomile ija Immisili?” Avo Musa kadumba na kailongela mwenyego, “Kumbe wanhu oijuwa mbuli ino!”

15 Falao viyaihulike mbuli ayo ilawilile, kalonda kumkoma Musa, lakini Musa kakimbila kachola kukala mwiisi ya Midiani, kakala behi na sima. 16 Avo wandele saba wa mulava nhosa wa kuko Midiani weza kudeha mazi ili wazing'weze fugo za tatao. 17 Wasusilaji wayagwe weza wawawinga wandele awo. Lakini Musa keza kawataza wandele awo kwa kuzing'weza mazi fugo zao. 18 Viwabwelile kwa tatao Leueli, kawauza, “Habali lelo mulopola kubwela?”

19 Wao wamwidika, “Mmisili imoja katutaza mmakono ga wasusilaji waja, heyo mwenyego katudehela mazi na kuzing'weza fugo zetu.”

20 Tatao kawauza wandele zake, “Kakwahi? Habali mmuleka kuko? Mkemeni yeze yaje hamoja na siye.”

21 Avo Musa katogola kukala kwa munhu ayo, avo munhu ayo kamgwaa Musa mndele wake yakemigwe Sipola yawe mwehe wake. 22 Sipola kamulelela Musa mwana wa kimbigalo. Musa kailongela mwenyego, “Niye sili mwenekae mwiisi ino.” Avo kamgwaa twaga mwana ayo Gelishomu, fambulo jake munhu baki.

23 Miyaka mingi viibitile mndewa wa Misili kafa, lakini Waizilaeli wagangamala na wamulilila Imulungu kwavija wakala watumwa. 24 Imulungu kahulika kuiyalala kwao, na heyo kakumbuka lagano jake diyatendile na Abulahamu na Isaka na Yakobo. 25 Imulungu kawalola Waizilaeli na kajuwa viwodununzwa.

<- Kulawa 1Kulawa 3 ->