1 Siku da ichanduso da mwezi wa kadatu toka Waizilaeli viwasegele mwiisi ya Misili, siku dijo wavika kuluwala lwa Sinai. 2 Viwasegele ako Lefidimu na kuvika kuluwala lwa Sinai, kuko weka ng'hambi kuulongozi lwa ulugongo lwa Sinai. 3 Musa kakwela uchanha kulugongo kuiting'hana na Imulungu.

Mndewa Imulungu kamkema Musa uchanha kulugongo kamulongela, “Uwalongele vino ulelo wa Yakobo na Waizilaeli wose, 4 ‘Mweye wenyego mugoga gaja ganiwatendele Wamisili, na vija viniwasegese mweye kamba jola viyogasegesa makinda gake kwa mabawa gake, niwagala kumwangu. 5 Avo, kamba monitegeleza niye na kugoga lagano jangu, mokuwa wanhu zangu musaguligwe hagati ya isi zose hamoja vivija isi yose yangu. 6 Mweye mokuwa undewa wa walava nhosa na isi ing'alile.’ Uwalongele vivo Waizilaeli.” 7 Avo Musa kabwela kawakema wavele wa Izilaeli, kawalongela gaja gose Mndewa Imulungu gayamulagize. 8 Wanhu wose wedikila hamoja, “Totenda gaja gose gayalongile Mndewa Imulungu,” Nayo Musa kabwela kwa Mndewa kumulongela gaja gawalongile iwanhu awo.

9 Mndewa Imulungu kamulongela Musa, “Lola niye nokwiza kumwako mdiwingu kulu, ili wanhu wahulike vonda nilonge na gweye, ili wakutogole milele.”

Musa kamulongela Mndewa, gaja gawalongile wanhu. 10 Avo, Mndewa Imulungu kamulongela Musa, “Genda ukawahunge wanhu lelo na mayo. Walongele wanhu wafue viwalo vao, 11 na waisasale mbuli ya kisindo, kwavija niye Mndewa Imulungu nohumuluka kulugongo lwa Sinai kuulongozi wa wanhu wose. 12 Wekile wanhu imbaka kila mwambu na uwalongele sikuwakwele kulugongo hebu kulukwasa. Munhu yoyose yonda yakwase ulugongo kokomigwa. 13 Yakomigwe kwa kutoigwa kwa mabwe hebu kwa mgoha, na siyo kwa makono. Yawe munhu hebu mnyama sikummuleke yawe mgima. Lakini mhalati yahagendelela kutoigwa wanhu wakwese behi ya ulugongo.”

14 Abaho Musa kahumuluka kulugongo kachola kwa iwanhu na kawahunga, nao wavifuwa viwalo vao. 15 Kawalongela, “Muisasale kwa kisindo na mbigalo yoyose sikuyamuwase mwehe wake.”

16 Imitondo siku ya kadatu kukala na ng'huwa na mimwesa na wingu kulu dilawilila kulugongo, na sauti ng'hulu ya mhalati ihulikigwa. Wanhu wose mna ing'hambi wagwaya kwa bwembwe. 17 Musa kawalongoza wanhu wose mna ing'hambi kuchola kuiting'hana na Imulungu, na wanhu wose wema hasi ya ulugongo.

18 Lugongo lwa Sinai lugubikigwa na yosi, kwavija Mndewa Imulungu kahumuluka kwa moto. Na yosi da moto uja difililika uchanha kamba yosi da biwi kulu dikwaka, na ulugongo lutigisika kwa nguvu. 19 Sauti ya mhalati igendelela kuhulikigwa ng'hani. Abaho Musa kalonga na Imulungu, Imulungu nayo kamwidika kwa ng'huwa.

20 Mndewa Imulungu kahumuluka kulugongo lwa Sinai, kamkema Musa kuna inhembeti ya ulugongo. Nayo Musa kakwela uchanha. 21 Abaho Mndewa Imulungu kamulongela Musa, “Humuluka hasi ukawazume wanhu sikuweze kundola, kwavija wahatenda vivo wengi mna iwanhu awo wofa. 22 Vivija walava nhosa, awo onikweselaga olondigwa waihunge, kamba hawaihunga nowakoboza.”

23 Musa kamulongela Mndewa Imulungu, “Wanhu hawadaha kukwela uchanha ya ulugongo lwa Sinai kwavija gweye mwenyego kutulagiza twike mbaka kuzunguluka ulugongo.”

24 Mndewa Imulungu kamulongela Musa, “Humuluka hasi abaho wize na Haluni. Lakini sikuuwatogolele walava nhosa na wanhu wayagwe waloke mzimbaka weze kumwangu, buleavo nowakoboza.” 25 Avo Musa kahumuluka na kawalongela Waizilaeli gaja gose gayalagizwe.

<- Kulawa 18Kulawa 20 ->