1 Mndewa Imulungu kamulongela Musa, “Ding'hali kubulo dimoja disigala nomtowa najo Falao na Wamisili, abaho kumwande kowalekeseni musegele hano, na heyo mwenyego kowawinga musegele mwiisi yake. 2 Walongele Waizilaeli kamba kila mbigalo na mtwanzi yampule munhu wa behi yake vinhu va shaba na zahabu.” 3 Mndewa Imulungu kawatenda Waizilaeli wanogeligwe na Wamisili, na Musa mwenyego kawa munhu mkulu ng'hani mwiisi ya Misili, mgameso ga watawala wa Falao hamoja na wanhu wose.

4 Musa kamulongela Falao, “Mndewa Imulungu kolonga vino, ‘Kilo kikulu, lelo nobita hagati ya isi ya Misili. 5 Nahabita kila chaudele wa kimbigalo mwiisi ya Misili kofa. Kusongela chaudele wako gweye Falao ija yeli muhazi wako mbaka chaudele wa msang'hanaji wako ija yoduga kwa dibwe. Hata chaudele wa fugo zako vivija wofa. 6 Hokuwa na kililo kikulu mwiisi yose ya Misili, kililo acho hakinalawilila, na honda kilawilile kabili. 7 Lakini mna iwanhu wa Izilaeli kokuwa kuduhu kililo na kokuwa na tindiwalo, baho kojuwa kamba Mndewa Imulungu ayo yowabagula Waizilaeli na Wamisili.’ ” 8 Abaho Musa kamulongela Falao, “Wasang'hanaji zako okwiza kumwangu na kunifugamila na onipula nisegele mwiisi ya Misili niye na wanhu wose onikweleleza. Gahamala gago nosegela.” Abaho Musa kasegela kwa Falao kuno kagevuzika.

9 Mndewa Imulungu kamulongela Musa, “Falao honda yakutegeleze ili nhende ng'hani unzonza mwiisi ya Misili.” 10 Avo Musa na Haluni watenda unzonza wose mgameso ga Falao. Lakini Mndewa Imulungu kamtenda Falao yawe na moyo mdala, kalema kuwaleka Waizilaeli wasegele mwiisi yake.

<- Kulawa 10Kulawa 12 ->