1 Musa kagendelela kuwalongela Waizilaeli, “Gogeni na kukweleleza malagizo na mafundizo gose ganiwafunzile, ili muwe wagima na kuisola isi yonda yawagwee Mndewa Imulungu, Imulungu wa wahenga zenu. 2 Sikumwengeze kinhu chochose hebu kusegesa kinhu chochose mna gamalagizo goniwagwelela, lakini gagogeni malagizo ga Mndewa Imulungu, Imulungu wenu, gano goniwagwelela. 3 Mwenye mugona kwa meso genu gaja gayatendile Mndewa Imulungu ako Baali Peoli. Mndewa Imulungu, Imulungu wenu, kawakoma iwanhu wose hagati yenu wamtambikile ayo imulungu Baali Peoli. 4 Lakini mweye mose mumtamanile Mndewa Imulungu, Imulungu wenu mung'hali wagima mbaka lelo.

5 “Loleni, niwafunza malagizo na mafundizo kamba Mndewa Imulungu, Imulungu wangu viyanilagize nitende, ili mugakweleleze ako kuna iisi yumuchola kuisola. 6 Gagogeni na kugakweleleza gago kwavija mwahatenda vivo iwanhu wa isi ziyagwe vonda wagajuwe, ojuwa kamba mweye muna nzewele na ubala na olonga, ‘Wanhu wa isi ino ng'hulu wana nzewele na wabala!’

7 “Kuduhu wanhu wa isi yoyose, hata kamba isi yao ng'hulu, imulungu wao kokala behi na hewo kamba viyali behi na siye Mndewa Imulungu, Imulungu wetu, twahampula yatutaze. 8 Vivija kuduhu wanhu wa isi yoyose, hata kamba isi yao ng'hulu, wana malagizo na mafundizo ga haki, kamba gago ganiwafunzile lelo.

9 “Muiteganye na mugelegeze, sikumuisemwe gaja gamugonile kwa meso genu wenyego. Sikumuisemwe gago mna imizoyo yenu muugima wenu wose. Wasimulileni wanenu na iwazukulu zenu, 10 siku ayo vumwimile kuulongozi wa Mndewa Imulungu, Imulungu wenu ako Holebu viyanilongele, ‘Wating'hanize awo iwanhu kuulongozi wangu, niwalongele mbuli zangu ili waifunze kunidumba niye, siku zose viwokala mwiisi na vivija wawafunze wanao watende vivo.’

11 “Avo mukwesa behi na kwima hasi ya ulugongo lukalile lokwaka moto uvikile mbaka kuulanga kuno wenela ziza na wingu kulu. 12 Abaho Mndewa Imulungu kalonga na mweye kulawa muumoto awo. Muzihulika mbuli ziyalongile lakini hammone, mweye muihulika sauti yake iiyeka. 13 Kawalongela lagano jake, na kawalagiza mugagoge gaja Gamalagizo Longo, gayandike mna ivibao vibili va mabwe. 14 Kipindi acho Mndewa Imulungu kanilagiza niwafunze malagizo na mafundizo gomulondigwa kugagoga mwiisi yumuchola kuisola.

15 “Avo, sikumuisemwe kamba Mndewa Imulungu viyalongile na mweye muumoto ako kulugongo lwa Holebu, hammone viyali. Avo muiteganye ng'hani, 16 sikumuinange na kutenda kinyago, hebu sisila da kinhu chochose kiwe kamba mbigalo hebu mtwanzi, 17 hebu mnyama yoyose mwiisi hebu ndege, 18 hebu mng'onyo yoyose yotambala hebu somba weli mgamazi. 19 Muiteganye, mwahalola uchanha kuulanga na kujona zuwa na mbalamwezi na nhondo na vinhu viyagwe vili kuulanga, sikumvikwesele na kuvitambikila na kuvisang'hanila, kwavija vinhu avo Mndewa Imulungu, Imulungu wenu kavilumba mbuli ya iwanhu wose wayagwe iwokala mwiisi wavitambikile. 20 Lakini mweye awo yawakombole kulawa Misili mulawe mditanuli da zuma. Kawalava kuko ili muwe wanhu zake kamba vimwili lelo. 21 Kwa mbuli yenu Mndewa Imulungu, Imulungu wenu kanigevuzikila, kaiduwila kamba niye siloka bule ulwanda lwa Yolidani na kwingila mwiisi ija inogile iyowagwaa iwe yenu. 22 Avo niye nofila mwiisi ino, siloka bule umwambu wa ulwanda, lakini mweye, sambi moloka ulwanda na mochola kuisola isi ayo inogile. 23 Muiteganye sikumuisemwe lagano da Mndewa Imulungu, Imulungu wenu diyatendile na mweye, na sikumutende kinyago cha kinhu chochose kiyawagomese Mndewa Imulungu, Imulungu wenu. 24 Mndewa Imulungu, Imulungu wenu kamba moto usakaza, heyo ayo Imulungu yeli na migongo.

25 “Vonda mukale mwiisi ayo, mwahapata wana na wazukulu na mwahawa wavele, kamba mwahasonga kupotela na kutenda vinyago kwa kuigala na kinhu chochose, mwahatenda gehile mgameso ga Mndewa Imulungu, Imulungu wenu na kumgevuza, 26 avo niye lelo noukema ulanga na isi vilole mbuli ino, nowalongela kamba, kwa mwanza umoja mokomigwa kuko mwiisi yumuchola kuisola ako umwambu wa lwanda lwa Yolidani. Hamukala kuko kwa siku nyingi, lakini mokomigwa mose. 27 Mndewa Imulungu kowapwililisa mweye mna iwanhu wa isi ziyagwe, na iwanhu kidogo hagati yenu awo onda wasigale kuko kutali kuyawagalile Mndewa Imulungu. 28 Kuko moisang'hanila imilungu ya mibiki na mibwe, ayo itendigwe kwa makono ga wanhu, ayo haidaha kulola hebu kuhulika hebu kuja hebu kunusa. 29 Lakini mwahawa kuko mziisi azo na mwahamzahila Mndewa Imulungu, Imulungu wenu, kwa mizoyo yenu yose na kwa loho zenu zose, heyo momona. 30 Mbuli azo zose zahawapata ako kumwande, mogaya ng'hani avo kukimambukizo mombwelela na kumtegeleza Mndewa Imulungu, Imulungu wenu. 31 Mndewa Imulungu, Imulungu wenu kamema bazi, honda yawaleke hebu kuwananga hebu kudisemwa lagano diyatendile kwa kuiduwila kwa iwahenga zenu.

32 “Gelegezeni gaja gaumwaka, gaja galawile mweye mung'hali hamunavumbuka, kulawa siku ayo Imulungu viyamulumbile munhu. Zahileni mwiisi yose kulawa mwambu uno mbaka uyagwe, kamba kuna kinhu kamba kino cha unzonza kilawila hebu kihulikigwa. 33 Vino kuna wanhu wowose waihulika sauti ya Imulungu kamba vimuihulike mweye yolonga kulawa mmoto, abaho wasigala wagima? 34 Vino kuna imulungu yoyose iyagwe yagezile kusola iwanhu wake kulawa mwiisi ya iwanhu wayagwe, kamba viyatendile Mndewa Imulungu, Imulungu wenu? Heyo katenda avo kwa magazo na vilaguso na unzonza na ng'hondo na kwa nguvu yake ng'hulu, katenda vinhu vigela bwembwe na mweye mugona gose ago kwa meso genu ako Misili. 35 Mweye muzona mbuli azo, ili mujuwe kamba Mndewa Imulungu ayo Imulungu yaiyeka na haduhu iyagwe. 36 Kulawa kuulanga kawatenda muihulike sauti yake ili yawafunze kumtegeleza, na hano mwiisi kawatenda muwone moto wake mkulu, na muzihulika mbuli zake kulawa muumoto awo. 37 Kwavija kawanogela wahenga zenu na kawasagula mweye na kawalava kulawa mwiisi ya Misili kwa nguvu na udahi, 38 kawawinga mgameso genu wanhu wa isi zili na nguvu kubanza mweye, ili yawagale na kuwagwaa isi yao iwe yenu, kamba viili mbaka lelo. 39 Avo, muijuwe mbuli ino na muigelegeze mmizoyo yenu, kamba Mndewa Imulungu ayo Imulungu ako kuulanga na hasi mwiisi, na kuduhu iyagwe. 40 Gogeni gaja gayalongile na malagizo gake goniwagwaa lelo, ili mugendelele goya mweye na wanenu baho kumwande na mukale siku nyingi mwiisi ayo iyowagwaa Mndewa Imulungu, Imulungu wenu iwe yenu siku zose.”

41 Abaho Musa kagabagula mabuga madatu ako umwambu wa kudilawila zuwa wa lwanda lwa Yolidani, 42 ako munhu yahamkoma munhu bila kulonda, kodaha kukimbilila buga dimoja mna gamabuga gago na kouhonya ugima wake. 43 Kadibagula buga da Bezeli dili kudibawe da ikiwala kawagwelela wanhu wa kabila da Lubeni, na buga da Lamoti mwiisi ya Gileadi kawagwelela iwanhu wa kabila da Gadi na buga da Golani mwiisi ya Bashani kawagwelela iwanhu wa kabila da Manase.

44 Gano gago malagizo gawagweleligwe wanhu wa Izilaeli na Musa. 45 Gano gago galondigwe na mafundizo na malagizo Musa gayawalongele Waizilaeli viwalawile mwiisi ya Misili, 46 na wakala kubonde behi ya Beti Peoli mwambu wa kudilawila zuwa wa lwanda lwa Yolidani, mwiisi ya mndewa Sihoni wa Waamoli, yatawale ako Heshiboni abaho kahumwa na Musa na iwanhu wose wa Izilaeli viwezile kulawa mwiisi ya Misili. 47 Waisola isi yake na isi ya mndewa Ogu wa isi ya Bashani. Wandewa awo iwabili wa Waamoli watawala kuko umwambu wa kudilawila zuwa wa lwanda lwa Yolidani. 48 Isi ayo yenela kulawa kudibuga da Aloeli mwiingema ya lwanda lwa Alinoni, mbaka kulugongo lwa Silioni, vivija lokemigwa Helimoni, 49 hamoja na isi yose ya umwambu wa kudilawila zuwa wa lwanda lwa Yolidani mbaka bahali ya Alaba, kuhumulukila kulugongo lwa Pisiga.

<- Kumbukumbu 3Kumbukumbu 5 ->