1 Daudi kawating'haniza wambigalo yakalile nao, kawagola mvibumbila va wanhu maelufu na wanhu magana na keka kilongozi kwa kila kibumbila. 2 Daudi kawatuma wakalizi zake mna ivibumbila vidatu, kibumbila cha ichanduso kikala muulongozi wa Yoabu, kibumbila cha kabili kikala muulongozi wa Abishai mwanage Seluya mdodo wake Yoabu na kibumbila cha kadatu kikala muulongozi wa Itai, Mgiti. Daudi kawalongela wanhu wose, “Na niye nochola hamoja na mweye mwiing'hondo.”

3 Lakini wanhu wamulongela, “Gweye sambi uchole. Hata twahakimbila, siye hawatugesa. Hata kamba nusu yetu odanganika, vivija hawaigaza na siye. Lakini gweye kumwao kofaya kubanza wanhu elufu kumi. Avo gweye kolondeka usigale bahano kudibuga na ututazege kulawa baha kudibuga.”

4 Mndewa kawalongela, “Notenda kija kimchona kumwenu kinoga.”

Avo mndewa kema hamgwazo ya lwivi, kuno wakalizi zake maelufu kwa magana olawa. 5 Mndewa kamulagiza Yoabu, Abishai na Itai, “Kwa kunyonela bazi niye, sikumumtowe ng'hani ija imbwanga Abisalomu.” Wanhu wose wahulika mndewa kiyawalongele waja iwakulu wa mabumbila mbuli ya Abisalomu.

6 Avo wakalizi wa Daudi wachola kuluwala kuitowa ng'hondo na Waizilaeli. Ng'hondo ayo ikala kumuhulo wa Efulaimu. 7 Wanhu wa Daudi wawatowa wanhu wa Izilaeli. Wanhu wakomigwe siku dijo wakala elufu ishilini. 8 Ng'hondo yenela kuluwala lose na wanhu wengi wadanganika kumuhulo kubanza waja wakomigwe na misime.

9 Abisalomu kakala yakwelile mnyama kamba kihongwe mkulu, bahaja kaiting'hana na wanhu wa Daudi. Mnyama ayo kakala yobita hasi ya biki kulu da mwaloni, pala da Abisalomu jangama mditambi da mwaloni. Abisalomu kalekigwa yotinga mditambi na mnyama ayo kagendelela.

10 Munhu imoja viyone vija kachola kumulongela Yoabu, “Nimona Abisalomu kotinga mditambi da mwaloni.”

11 Yoabu kamulongela munhu ija, “Choni? Kumona Abisalomu? Habali humtowile na kumkoma? Nahakugwelele nhunza ya vihande longo va shaba na mkwiji.”

12 Lakini munhu ija kamulongela Yoabu, “Hata kamba nigweleligwe vihande elufu imoja va shaba, sambi ninule mkono wangu kumkoma mwana wa mndewa, kwavija tuhulika mndewa viyawalagize gweye, Abishai na Itai, ‘Kwa kunyonela bazi niye, sikumumtowe ng'hani ija imbwanga Abisalomu.’ 13 Kamba nahamtendele mbuli yoyose ihile, haduhu mbuli ifisigwa kwa mndewa, na gweye sambi ungombele bule.”

14 Yoabu kalonga, “Habule chonda unilongele.” Abisalomu viyakalile yang'hali mgima yotinga mdibiki da mwaloni, Yoabu kasola migoha midatu kamuhoma muumoyo. 15 Abaho wabwanga longo wampapile vinhu va kuitowela kuna ing'hondo Yoabu, wamzunguluka Abisalomu, wamtowa na kumkoma.

16 Abaho Yoabu katowa mhalati, avo mabumbila ga wakalizi waleka kuwakweleleza Waizilaeli, kwavija Yoabu kawagomesa. 17 Wamsola Abisalomu na kumwasila kudisimo kulu kumuhulo, uchanha yake wamwikila lundo kulu da mibwe. Wanhu wose wa Izilaeli wakimbila kila imoja kakimbilila ukayake.

18 Kipindi Abisalomu viyakalile kabule wana, kakala yaizengele mhanda na kuisimika Kudikonde da Mndewa, kwavija kona kabule mwana yonda yatende twaga jake dikumbukigwe. Kaikema mhanda ayo twaga jake mwenyego. Mbaka lelo yokemigwa mhanda ya Abisalomu.

19 Ahimaasi mwanage Sadoki kalonga, “Nhogolela niye nikimbile nikamulongele mndewa kamba Mndewa Imulungu kamkombola kulawa mmakono ga iwanhu omwihila.”

20 Yoabu kamulongela, “Lelo hugala usenga uno, ila kodaha kugala siku iyagwe. Lakini lelo hugala usenga wowose kwavija mwana wa mndewa kadanganika.”

21 Abaho Yoabu kamulongela Mkushi imoja, “Genda kamulongele mndewa kija chuuwone.” Mkushi kafugama haulongozi wa Yoabu, abaho kachola yokimbila.

22 Ahimaasi mwanage Sadoki kamulongela kabili, “Chonde ng'hogolela nimkimbilile ija Imkushi.”

Lakini Yoabu kamwidika, “Mwanangu habali kolonda kukimbila? Gweye honda utunzigwe kinhu chochose.”

23 Ahimaasi kamulongela, “Jojose na diwe, nolonda kukimbila.”

Avo, Yoabu kamulongela, “Ona kimbila.” Baho Ahimaasi kakimbila kubitila nzila ya hungo, na kambita ija Imkushi.

24 Daudi kakala yakalile hagati ya nyivi mbili za buga. Mkalizi kakwela uchanha ya ulwivi, kenula kihanga chake, kamona munhu kaiyeka kokwiza yokimbila. 25 Mkalizi kamulongela mndewa kwa sauti, mndewa kamulongela, “Kamba kaiyeka, kana usenga.” Ija imunhu viyavikile behi.

26 Mkalizi kamona munhu iyagwe kalonga, “Kuna munhu iyagwe kokwiza yokimbila yaiyeka.”

Mndewa kalonga, “Heyo nayo kogala usenga.”

27 Mkalizi kalonga, “Vinyona niye ija wa ichanduso kokimbila kamba Ahimaasi mwanage Sadoki.”

Mndewa kalonga, “Heyo munhu yanogile, kogala usenga unogile.”

28 Abaho Ahimaasi kamulongela mndewa kwa sauti ng'hulu, “Mbuli zose zinoga” Kaidulika mbaka hasi kalonga, “Yatogoligwe Mndewa Imulungu, Imulungu wako, yawasegese wanhu waja wakulemile gweye mndewa wangu.”

29 Mndewa kauza, “Vilihi, imbwanga Abisalomu yang'hali mgima?”

Ahimaasi kamwidika, “Yoabu viyandagize niye msang'hanaji wako, nyona kukala na nyangi, lakini sijuwile kamba kilawilila choni.”

30 Mndewa kamulongela, “Hinduka ima kumgwazo.” Kahinduka, kema.

31 Abaho ija Imkushi kavika kalonga, “Nina usenga unogile kumwako mndewa wangu, lelo Mndewa Imulungu kakugombola kulawa kwa waja wose wakulemile gweye.”

32 Mndewa kamuuza, ija Imkushi, “Vilihi, Abisalomu mgima?”

Mkushi kamwidika, “Mndewa wangu, waja wose okwihila na waja okulema wahalonda kukutendela mbuli yoyose ihile, wawe kamba mbwanga ayo Abisalomu.”

33 Baho mndewa kakala na lusikisiki, kakwela kudigati dikalile uchanha ya lwivi lwa dibuga na kalila. Viyakalile yokwela kakala yolila kolonga, “Mwanangu Abisalomu, mwanangu Abisalomu, maza nahadanganike niye, mwanangu Abisalomu!”

<- 2 Samweli 172 Samweli 19 ->