1 Kipindi acho Samweli kakala yomsang'hanila Mndewa Imulungu muulolezi wa Eli. Kipindi acho usenga wa Mndewa Imulungu haukalile baho kwa baho, na Imulungu halaguse kinhu baho kwa baho. 2 Siku dimoja ikilo, Eli kakala yawasile mdigati jake na meso gake gakala hagalola goya. 3 Samweli nayo kakala yawasile mng'anda ya Mndewa Imulungu behi na sanduku da lagano da Imulungu. Kiwenge cha Imulungu kikala chokwaka kwavija kukala hakunakunguzuka. 4 Avo Mndewa Imulungu kamkema Samweli, nayo Samweli kedika, “Nabaha!” 5 Avo Samweli kakimbilila kwa Eli kamulongela, “Niza kwavija gweye kunikema.”

Avo Eli kamulongela, “Niye sikukemile. Genda ukawase.” Samweli kabwela kuwasa.

6 Mndewa Imulungu kamkema kabili, “Samweli!” Samweli kalamuka kachola kabili kwa Eli kamulongela, “Niza kwavija gweye kunikema.”

Lakini Eli kamulongela, “Sikukemile mwanangu genda ukawase kabili”

7 Samweli kakala hanamjuwa Mndewa Imulungu, na usenga wa Mndewa Imulungu ukala ung'hali haunagubuligwa kumwake.

8 Mndewa Imulungu kamkema Samweli mwanza wa kadatu. Samweli kalamuka kachola kwa Eli kamulongela, “Niza kwavija gweye kunikema.”

Baho Eli kajuwa kamba Mndewa Imulungu ayo yamkemile Samweli. 9 Avo Eli kamulongela Samweli. “Genda ukawase yahakukema, mulongele vino, ‘Longa, go Mndewa Imulungu niye msang'hanaji wako nokutegeleza.’ ” Avo Samweli kabwela kuwasa hanhu hake.

10 Abaho Mndewa Imulungu keza kema, kamkema kamba viyamkemile aho haichanduso, “Samweli! Samweli.”

Samweli kamwidika, “Longa niye msang'hanaji wako nokutegeleza.”

11 Avo Mndewa Imulungu kamulongela Samweli, “Nolonda kutenda mbuli imoja mwiisi ya Izilaeli na kila yonda yahulike kosinhuka. 12 Siku ayo nogavikiza gose ganilongile mbuli ya Eli na ulelo wake kulawa mwanduso mbaka kuuhelelo. 13 Na nomulongela kamba nowatagusa iwanhu wa mng'anda yake milele, kwa gehile yagajuwile, kwavija wanage wakala onikudula niye, na heyo hawagomese bule. 14 Avo noiduwila mbuli ya ing'anda ya Eli kamba gehile ga ng'anda ya Eli hagaloholigwa kwa nhosa hebu kwa sadaka yoyose milele.”

15 Samweli kawasa mbaka imitondo, kalamuka kavugula ulwivi lwa ing'anda ya Mndewa Imulungu. Lakini Samweli kakala yodumba kumulongela Eli usenga awo. 16 Lakini Eli kamkema Samweli, kamulongela, “Mwanangu Samweli.”

Samweli kamwidika, “Nabaha.”

17 Eli kamuuza, “Imulungu kakulongela choni? Sikuunifise kinhu chochose wahanifisa Mulungu yakutaguse ng'hani.” 18 Avo Samweli kamulongela Eli mbuli zose, hamfisile kinhu. Avo Eli kalonga, “Heyo ayo Mndewa Imulungu, leka yatende kamba viyokona vinoga kumwake.”

19 Avo Samweli kagendelela kukula, na Mndewa Imulungu kakala hamoja na heyo, na kagavikiza gose gayalongile Samweli na kuduhu hata mbuli imoja ilekile kuvikizwa. 20 Wanhu wose wa Izilaeli kulawa Dani mbaka Beelisheba wajuwa kamba Samweli katendigwa mtula ndagu wa Mndewa Imulungu. 21 Mndewa Imulungu kagendelela kumulawilila ako Shilo, kwavija Mndewa Imulungu kaigubula mwenyego kwa Samweli ako Shilo kubitila mbuli yake.

<- 1 Samweli 21 Samweli 4 ->