1 Vizibitile siku ndodo, Wafilisiti waweka hamoja wakalizi zao wachole wakaitowe na Waizilaeli. Akishi kamulongela Daudi, “Gweye hamoja na wanhu zako mochola na niye kuing'hondo.”

2 Daudi kamwidika Akishi, “Ona! kochona kinhu chonda yatende msang'hanaji wako.”

Akishi kamwidika Daudi, “Niye nokusagula gweye uwe mkalizi wangu siku zangu zose.”

3 Kipindi acho Samweli kakala yadanganike, Waizilaeli wose wakala wamulilile na kumzika kudibuga jake da Lama. Sauli kakala yawawingile wanhu olagula kwa mizimu na wahawi mwiisi yake.

4 Wafilisiti weka ng'hambi yao ako Shunemu, Sauli kawating'haniza Waizilaeli wose na weka ng'hambi ako Giliboa. 5 Sauli viyawonile wakalizi wa Wafilisiti kasonga kudumba, na kagwaya kwa bwembwe diyakalile najo mmoyo wake. 6 Hata viyampulile Mndewa Imulungu, Mndewa Imulungu hamwidike kwa nzozi hebu kwa dibwe[a] da kujuwa goyolonda, hebu kwa nzila ya watula ndagu. 7 Baho Sauli kawalongela wasang'hanaji zake, “Nizahilileni mtwanzi yolagula kwa mizimu ili nimuuze.”

Wasang'hanaji zake wamwidika, “Kuna mtwanzi imoja kolagula kwa mizimu ako Endoli.”

8 Avo Sauli kavula viwalo viyavalile, kavala viwalo viyagwe, kachola hamoja na wasang'hanaji zake wabili. Wavika kwa ija imtwanzi ikilo, Sauli kamulongela, “Nilagulile kwa mizimu na ungalile imunhu inimulonda.”

9 Ija imtwanzi kamulongela, “Gweye kojuwa kamba Sauli kawawinga wanhu olagula kwa mizimu na wahawi wose mwiisi ya Izilaeli. Habali konhegela mtego namate ili nikomigwe?”

10 Sauli kaiduwila kwa twaga da Mndewa Imulungu, kalonga, “Kamba Mndewa Imulungu viyokala, honda ukobozigwe kwa mbuli ino.”

11 Ija imtwanzi kamulongela, “Kolonda nikugalile nani?”

Sauli kamulongela, “Ngalila Samweli.”

12 Ija imtwanzi viyamone Samweli kaguta kwa sauti ng'hulu, kalonga, “Habali kumvizila? Gweye kwa Sauli!”

13 Sauli kamulongela, “Sikuudumbe, kochona choni?”

Ija imtwanzi kamulongela, “Nomona imulungu kolawa mwiisi.”

14 Sauli kamuuza, “Munhu ayo kaigala na nani?”

Ija imtwanzi kamulongela, “Mvele wa kimbigalo na kavala kanzu.”

Baho Sauli kajuwa kamba heyo kakala Samweli. Sauli kaidulika mbaka hasi.

15 Samweli kamulongela Sauli, “Habali konigaza kwa kunigala kuno?”

Sauli kamulongela, “Niye nogaya ng'hani! Wafilisiti oitowa na niye, na Mndewa Imulungu kandeka. Hanilongela kwa nzila ya watula ndagu hebu nzozi. Lekaavo nikukema ili unilongele kinhu cha kutenda.”

16 Samweli kamuuza, “Habali koniuza niye kamba Mndewa Imulungu kakuleka na kakwihila? 17 Mndewa Imulungu katenda gaja gayakulongele kubitila niye. Mndewa Imulungu kausegesa undewa kumwako na kamgwaa Daudi Mwiizilaeli miyago. 18 Kwavija, gweye huitegeleze sauti ya Mndewa Imulungu, huivikize ing'hasiliki yake kwa Waamaleki. Lekaavo lelo Mndewa Imulungu kokutendela vivo. 19 Gweye hamoja na Waizilaeli wose, Mndewa Imulungu kowagela mmakono ga Wafilisiti. Gweye na wanago wa kimbigalo mayo mokuwa na niye. Mndewa Imulungu kowagela mmakono ga Wafilisiti iwakalizi wa Izilaeli.”

20 Bahaja, Sauli kagwa kingubanguba kwavija kadumba zimbuli ziyalongile Samweli. Sauli kakala kabule nguvu mulukuli kwavija kakala hadile kinhu chochose kulawa ichungulo mbaka ichungulo ya siku iyagwe.

21 Abaho ija imtwanzi viyacholile kwa Sauli, kamona Sauli kogwaya, kamulongela, “Niye msang'hanaji wako nitogola kuuhonza ugima wangu kwa kutenda kija kiunongele nhende. 22 Nhegeleze niye msang'hanaji wako, togola nikutandile kigate kidodo uje wahapata nguvu uchole na mwanza wako.”

23 Sauli kalema kalonga, “Sija bule.”

Lakini waja iwasang'hanaji wake na ija imtwanzi, wamuhembekeza yaje, abaho katogola kuja. Avo kenuka kakala mulusazi.

24 Ija imtwanzi ukae kumwake kukala na bofu da ng'ombe dinonile, himahima kadichinja, kasola usage wa ngano, kaukanda, kateleka gate dilibule hamila. 25 Kamgwaa Sauli, na vivija kawagwaa awo iwasang'hanaji zake, na hewo waja. Abaho kilo acho wenuka wasegela.

<- 1 Samweli 271 Samweli 29 ->