1 Израиль ԓўв тӑйәм ŏтәԓ пиԓән мӑнәс, пӑ Вирсавияйа йŏхтәс, пӑ Исаак ащеԓ Турма Иаков щита йир верәс.

2 Атәԓән уԓәмән Турәм Израиль вохсәԓы: «Иаков! Иаков!» Ԓўв йастәс: «Ма щи».

3 Турәм йастәс: «Ма Турәм, нӑӈ ащен Турәм; Египет мўва мӑнты аԓ пӑԓа, щита нӑӈ эԓтэн вŏԓаӈ мир тыйәԓтԓәм;

4 Ма нӑӈ пиԓэнән Египет мўва мӑнԓәм, Ма нынан йŏхԓы па туԓԓам. Иосиф ԓўв йошәԓән нӑӈ сэмԓан лӑп петԓәԓы».

5 Вирсавия эԓты Иаков йэԓԓы мӑнәс; пӑ щӑԓта Израиль пŏхәт Иаков ики, ԋаврэмԓаԓ, имиԓаԓ пиԓән колесница ԓовәӈ ухԓәтән Египет мўва тусԓаԓ; щитәт фараонән китсайәт, ԓўвеԓ туты урәӈән.

6 Ханаан мўвән шитәм войԓаԓ пӑ пŏрмасԓаԓ пӑтән ўсԓаԓ, пӑ Египет мўва йŏхәтсәт, – Иаков пӑ хŏԓ рутәԓ ԓўв пиԓәԓән.

7 Пŏхԓаԓ пӑ хиԓыԓаԓ, эвиԓаԓ пӑ хиԓынэԓаԓ, пӑ хŏԓ рутәԓ ԓўв пиԓәԓән Египет мўва пӑтән тусԓы.

8 Тӑта щи Египет мўва йŏхтәм Израиль пŏхԓаԓ нэмәт: Иаков пӑ ԓўв пŏхԓаԓ. Иаков оԓәӈ пŏхәԓ Рувим.

9 Рувим пŏхәт: Ханох пӑ Фаллу, Хецрон пӑ Харми.

10 Симеон пŏхәт: Иемуил пӑ Иамин, пӑ Огад, пӑ Иахин, пӑ Цохар, пӑ Саул, ханаан нэ пŏх.

11 Левий пŏхәт: Гирсон, Кааф пӑ Мерари.

12 Иуда пŏхәт: Ир пӑ Онан, пӑ Шела, пӑ Фарес, пӑ Зара; туп Ир пӑ Онан ханаан мўвән пӑрсәтән. Фарес пŏхәт: Есром пӑ Хамул.

13 Иссахар пŏхәт: Фола пӑ Фува, Иов пӑ Шимрон.

14 Завулон пŏхәт: Серед пӑ Елон, пӑ Иахлеил.

15 Щит Лия тыхәԓ тэԓ ус, Месопотамия мўвән Иакова тӑйәм пŏхәт пӑ Дина эвеԓ, пӑ ԓыв пŏхԓаԓ. Аратәԓән ԋӑԓйаӈ пеԓа хуԓәм хŏйат эвиԓаԓ пӑ пŏхԓаԓ, пӑ ԓыв ԋаврэмԓаԓ.

16 Гад пŏхәт: Цифион пӑ Хагги, Шуни пӑ Эцбон, Ери пӑ Ароди пӑ Арели.

17 Асир пŏхәт: Имна пӑ Ишва, пӑ Ишви, пӑ Бриа, пӑ Серах нэ ŏпеԓ. Бриа пŏхәт: Хевер пӑ Малхиил.

18 Щит Зелфа тыхәԓ тэԓ ус, Лаванән Лия эвеԓа ԓўв митнэӈа мӑса. Иакова ԓўв энмәԓтәм тыхԓаԓ аратәԓән хутхŏщйаӈ ԋаврэм ус.

19 Иаков Рахиль имеԓ пŏхәт: Иосиф пӑ Вениамин.

20 Египет мўвән Иосиф хŏща Манассия пӑ Ефрем сэма питсәтән, Асенефа, Илиополь вош Потифер нэмпи йир верты хŏйат эвийән, сэма пайәтсайтән.

21 Вениамин пŏхәт: Бела пӑ Бехер пӑ Ашбел; Гера пӑ Нааман, Эхи пӑ Рош, Муппим пӑ Хуппим пӑ Ард.

22 Щит иса Рахиль тыхәԓ тэԓ ус, хŏйтат Иаков хŏща сэма питсәт, аратәԓән ԋӑԓхŏщйаӈ хŏйат.

23 Дан пŏх: Хушим.

24 Неффалим пŏхәт: Иахцеил пӑ Гуни, пӑ Иецер, пӑ Шиллем.

25 Тӑм Валла тыхәԓ тэԓ ус, Лаванән Рахиль эвеԓа ԓўв митнэӈа мӑса. Иакова ԓўв энмәԓтәм тыхәԓ тэԓәԓ аратәԓән ԓапәт хŏйат.

26 Египет мўва Иаков пиԓән йŏхтәм хŏйатәт, хŏйтат ԓўв эԓтэԓ тыйсәт, аратәԓән ԓапәтйаӈ пеԓа хут хŏйат, ԓыв тўмпеԓән хŏԓна Иаков пŏхԓаԓ имет па.

27 Иосиф пŏхӈән, хŏйӈән Египет мўвән сэма питсәӈән, кӑт хŏйат. Египет мўва касԓәм Иаков хŏттэԓ хŏйат иуԓтыйа ԓапәтйаӈ.

28 Иаков ԓўв йэԓпеԓән Иосиф хŏща Иуда китсәԓы, Иосифән Гесем пеԓа йуш аԉты урәӈән. Щӑԓта Гесем мўва ԓыв йŏхәтсәт.

29 Иосиф ԓўв колесница ԓовәӈ ухԓәԓ киртсәԓы пӑ Израиль ащеԓ йэщаԓт Гесем мўва мӑнәс, ԓўвеԓ кащаԓәмәԓән, ӑпәԓсәԓы, пӑ ԓўв сапԓәԓән хўв хоԓԓәс.

30 Пӑ Израиль Иосифа йастәс: «Ин ма нӑӈен ԓыԓӈа ватмем йўпийән пӑрты верәтԓәм».

31 Иосиф йайԓаԓа пӑ ащеԓ хŏт тэԓа йастәс: «Ма мӑнԓәм, фараона айкеԓ туԓәм пӑ ԓўвеԓ йастәԓәм: ‘Ма йайԓам пӑ ма ащем хот тэԓ, хŏйтат Ханаан мўвән усәт, ма хŏщайэм йŏхәтсәт;

32 щит ош шавиты хŏйатәт; ԓыв вой энмәԓԓәт; пӑ ун вой па ай вой тащԓаԓ пӑ мўй тӑйԓәт, ԓыв пӑтән тусԓаԓ’.

33 Фараон нынан вохԓаԓы ки пӑ иԋщәсԓәԓы: ‘Мўй верман уԓԓәты?’,

34 нын щиты йастаты: ‘Мўӈ, нӑӈ митйохԓан, айтэԓән ин тӑм унты вой энмәԓтман усув, опращԓув иты’; щишән, нын Гесем мўвән уԓты хӑйԓайты. Египет хŏйатәт ош шавиты хŏйатәт ӑт шӑктәԓԓаԓ, ԓывиԓаԓа щит ўкщәм».

<- Оԓәӈ эԓты нэпек 45Оԓәӈ эԓты нэпек 47 ->