2 Кӑт кущайӈәԓаԓ пеԓа фараон ԉикащәс, ўнайәт ԓэщатты куща пӑ ԋаԋ верты куща пеԓа,
3 пӑ ԓўвеԓ шавиты йохԓаԓ куща йоша ԓынан мӑсԓы, щи касна хота, хŏта Иосиф опсәс.
4 Шавиты йох куща ԓын хŏщайән Иосиф рупитты ԓэщатәс, пӑ ԓўв ԓынана рупитәс. Щиты касна хотән мŏԓты сыс ԓын устән.
5 Ипуш касна хотән, ўнайәт ԓэщатты куща пӑ ԋаԋ верты куща уԓмистән, кашәӈ ŏт ԓўв уԓмәԓ, кинтак и атән, кашәӈ ŏт ŏщхўԉ уԓәм вантәс.
6 Аԓәӈсӑхат Иосиф ԓын хŏщайән йŏхтәс, ԓынан кащаԓәсԓы, ԓын вешԓән рўтаԉӈән.
7 Фараон кущайӈән ԓўв ищмәсԓы, ԓўв пиԓәԓән кущайәԓ хотән уԓты касна хотән опсәм ŏтӈән пеԓа, щиты йастәс: «Мўйа нын тӑм хӑтәԓ вешԓән рўтаԉӈән?»
8 Ԓын ԓўвеԓа йастәсӈән: «Мин тӑм ат уԓмисмән; туп щи уԓәмӈән ԓӑрпитты хŏйат ӑнтом». Иосиф ԓынана йастәс: «Уԓәм ԓӑрпитты вер аԓт Турәм эԓты уԓ? Мӑнэм уԓәмԓән пŏтәртаԓән».
9 Хона ўнайәт ԓэщатты куща ԓўв уԓмәԓ Иосифа пŏтәртәс пӑ йастәс: «Уԓмитэмән, виноград ўна йўх ма йэԓпемән;
10 щи йўхән хуԓәм нўв; йўх энмәс, лыпәтән этса, щӑԓта щита виноград воԋщәм ŏтәт энәпсәт пӑ пŏшсәт;
11 фараон ан ма йошемән катәԓԓэм; виноград воԋщәм ŏтәт ма ўсәм пӑ фараон ан ԓыпийа пӑщәртсәԓам, пӑ фараон йоша ан мӑсэм».
12 Иосиф ԓўвеԓ йастәс: «Тӑта щи уԓмен ԓӑрпитты щир: хуԓәм нўв – щит хуԓәм хӑтәԓ;
13 хуԓәм хӑтәԓ хӑщты йўпийән фараон нӑӈен эсәԓԓәԓы пӑ рупитәм тӑхайэна омәсԓәԓы, нӑӈ пӑ фараон ан ԓўв йошәԓа мӑԓэн, йэԓпи иты, хун нӑӈ ԓўв хŏщайәԓ хона ўнайәт ԓэщатты кущайа усән;
14 хун нӑӈен йӑм питәԓ, ма эԓтэм нумәԓми пӑ, щи ԓŏват йӑм вера, фараона ма эԓтэм йаста, тӑм касна хот эԓты ким ат эсәԓсайәм;
15 ма еврейәт мўв эԓты йурән тусайәм; тӑта пӑ касна хотән омәсты урәӈән нэмәԓт атәм ӑт версәм».
16 Ԋаԋ верты куща кащаԓәсԓы, хŏты ԓўв уԓәм йӑма ԓӑрпитсәԓы пӑ Иосифа йастәс: «Ма ищи уԓмисәм: ŏхемән хуԓәм кураԋэк катәԓԓәм;
17 нўмпеләк кураԋэкән кӑмән хŏрпи фараон урәӈән ԓэты ԋаԋәт, ŏхемән омәсты кураԋэк эԓты щи ԓэтŏтәт тŏхԓәӈ войәтән нухԓайәт».
18 Пӑ Иосиф щиты йŏхԓы йастәс: «Тӑта щи уԓмен ԓӑрпитты щир: хуԓәм кураԋэк – щит хуԓәм хӑтәԓ;
19 хуԓәм хӑтәԓ хӑщты йўпийән фараон нӑӈ ŏхен хŏԓт сэвәрты партԓәԓы пӑ нӑӈен йўха нŏх сухтәԓԓы, тŏхԓәӈ войәтән эԓэн нухты питԓа».
20 Хуԓмет хӑтәԓән, фараон ԓўв сэма питәм хӑтԓәԓән митйохԓаԓа поры пӑсан верәс, пӑ касна хота опсыԓыйәм ўнайәт ԓэщатты пӑ ԋаԋ верты кущайӈән эԓты митйохԓаԓ уԓман нумәԓмәсԓы;
21 щӑԓта хона ўнайәт ԓэщатты куща йэԓпи рупитәм тӑхайәԓа пŏтсәԓы, пӑ ԓўв фараон йоша ан мӑс;
22 ԋаԋ верты куща пӑ йўха нŏх сухтәса, хŏты Иосиф ԓынана уԓәм ԓӑрпитыйәс.
23 Хона ўнайәт ԓэщатты куща Иосиф эԓты ӑт пӑ нумәԓмәсԓы, ԓўв эԓтэԓ йŏрэмәсԓы.
<- Оԓәӈ эԓты нэпек 39Оԓәӈ эԓты нэпек 41 ->