1 Щи пŏрайән Ирод хон щи ӑктәщиты хŏйатәт эԓты тухәԓ хŏйатԓаԓ пеԓа йошԓаԓ нŏх аԓәпсәԓы, ԓывиԓаԓа атәм верты урәӈән,

2 пӑ Иаков, Иоанн йай, аԓтты кешийән пӑратты партсәԓы.

3 Ваттаԓән, щит иудейәта йӑм, щи йўпийән Петра па ўсԓы, – щи пŏрайән тўтәӈ ԋаԋ йэмәӈ хӑтԓәт усәт, –

4 пӑ, ԓўвеԓ иԓ катәԓмаԓ йўпийән, пӑтлам хота омәссәԓы, пӑ ԋӑԓ ԉаԉ йохпи ԋӑԓ похла ԓўвеԓ шавиты партсәԓы, Пасха йўпийән мир хŏща ԓўвеԓ этәԓтәты нумәсыйәс.

5 Петра пӑтлам хотән эԓт ԓавәԓтса, щи кўтән ӑктәщиты хŏйатәт ԓўв урӈәԓән тўӈа–щира Турма пойәкщәсәт.

6 Хун пӑ Ирод ԓўвеԓ ким этәԓтәты утщисԓы, щи ат Петра кӑт ԉаԉ йŏхӈән кўтән ŏԓәс, кӑт карты кеԓән пŏнман уса, пӑ ԉаԉ йохән ов пўӈәԓән пӑтлам хот шависа.

7 Щӑԓта ин, Турәм Куща ангел ԓўв йэщаԓтәԓ ԓойәс, пӑ нŏвийән пӑтлам хот нŏх хутԓәптәса. Ангел, Петра пўӈԓәԓ эԓты пŏткәман, ԓўвеԓ нŏх кўрәтсәԓы пӑ йастәс: «Сора ԓойа». Щӑԓта карты кеԓԓаԓ ԓўв йошԓаԓ эԓты иԓ рӑкәтсәт.

8 Пӑ ангел ԓўвеԓа йастәс: «Ӑтпен йӑры пӑ кўр ԓумтәмԓан ԓумтаԓән». Ԓўв щиты версәԓы. Щӑԓта ԓўвеԓа йастәԓ: «Нӑӈ эԓты ԓумтәмен ԓумты пӑ ма йўпемән йўва».

9 Петра ким этәс пӑ ԓўв йўпеԓән шушәс, ӑт уйәтман, ангелән верты вер йӑна щиты ус, нумәсман, ԓўв вантәпса ватәԓ.

10 Оԓәӈ ԓавәԓты ԉаԉ йох пӑ кимет ԓавәԓты ԉаԉ йох мŏхты мӑнман, ԓын вош пеԓа мӑнты карты пушас ова йŏхәтсәтән. Щи ов ԓын урӈәнән ԓўв сӑхатәԓ пелки пўншантәс; ԓын ким этсәӈән пӑ и вош хулы мӑтсәԓән, щӑԓта шамкап ангел ԓўв пўӈԓәԓ эԓты хŏԓт пентәс.

11 Щиӈәԋща Петра, сэмәԓ этмаԓән, йастәс: «Ин манэма йӑна щи ныԓа, Турәм Куща Ԓўв ангеләԓ китмаԓ пӑ мӑнэм хŏԓт пайәтсәԓы Ирод йош эԓты пӑ иса щит эԓты, мўй иудей мир ԓавԓәс».

12 Щӑԓта, тыйэԓ–тохэԓ вантымаԓ йўпийән, Мария, Марка айәԓтты Иоанн аԋԏи, хот ԉэпа йохтәс, хŏта ар хŏйат ӑктәщсәт пӑ пойәкщәсәт.

13 Хун пӑ Петра пушас овән хŏплэмәс, Рода нэмпи митнэ хуԓәтты ким этәс.

14 Щӑԓта, Петра тўр сый мŏштымаԓ кемән, амәтмаԓ рўвән пушас ов ӑт пўшсәԓы, йŏхи хухәԓмәман, такан йастәс, мӑтты Петра пушас овән ԓойәԓ.

15 Тўмет пӑ ԓўвеԓа йастәсәт: «Нӑӈ мўй ŏшенән уԓԓән?» Туп ԓўв и йэԓԓы ўра верәԓ. Ԓыв пӑ пŏтәртсәт: «Щит Ԓўв ангеләԓ».

16 Щи кўтән Петра пушас ов сэкты йэԓԓы питәс. Хун пӑ ов пўшсэԓ, ԓўвеԓ кащаԓәсәт пӑ ӑԓ пакәтсәт.

17 Ԓўв пӑ, йошәԓән пос верман, мӑшйайән ат усәт, ԓывиԓаԓа пŏтәртсәԓы, хŏты Турәм Куща ԓўвеԓ пӑтлам хот эԓты ким этәԓтәсԓы, пӑ йастәс: «Тӑм вер эԓты Иаков пӑ хӑнам йохәт айкеԓән вераԓән». Йухәт, ким этмаԓән, па тӑха пеԓа мӑнәс.

18 Хӑтԓа йўвмаԓ йўпийән, ԉаԉ йох кўтән ун хурэп тыйәс, хŏты Петра йис.

19 Ирод пӑ, ԓўвеԓ кӑшмаԓ пӑ ӑт уйәтмаԓ йўпийән, ԓавԓәм ԉаԉ йох сўтәтсәԓы пӑ ԓывиԓаԓ пӑратты партсәԓы. Йухәт ԓўв Иудея эԓты Кесарияйа мӑнәс пӑ щита хӑщиԓыйәс.

20 Ирод Тир пӑ Сидон хŏйатәт пеԓа лики хуры ус; ԓыв пӑ, ԓыв кўтэԓән йастатман, ԓўв хŏщайәԓ йŏхәтсәт пӑ хон хот куща, Власт, ԓыв пеԓайэԓ керәтман, пайԓы уԓәпса вохсәт, ԓыв мўвеԓ хон мўв эԓты ԓэс, щишән.

21 Йастәм хӑтәԓән Ирод, хон ԓумтәма ԓумәтԓыман, пӑԓ тӑхайа опсәс пӑ ԓыв пеԓайэԓ пŏтәртәс.

22 Мир такан ԋухмийәԓ: «Щит ӑнта хŏйат, Турәм тўр сый».

23 Туп шӑмкапан Турәм Куща ангел ԓўвеԓ мушәӈа версәԓы, щи урәӈән, мўйа ԓўв Турма ишәк йасәӈ ӑт йастәс; щӑԓта Ирод ики, суԓ войәтән шӑпиман, пӑрәс.

24 Турәм йасәӈ пӑ арамәс пӑ лакки ԓӑрпиԓәс.

25 Варнава пӑ Савл, партәм верән тӑԓаӈа верман йўпийән, Марк нэма пŏнәм, Иоанн пӑтән ўйман, Иерусалим эԓты [Антиохияйа] йŏхԓы йŏхәтсәтән.

<- Апостоләт Верәм Верәт 11Апостоләт Верәм Верәт 13 ->