19
1 Odaa niɡ̶idiaaɡ̶idi ja jajipata ijo ane napaawaɡ̶ateloco me notaɡ̶anaɡ̶a, layaagaɡ̶awa niɡ̶ina anelioditiogi oko ane notaɡ̶anaɡ̶ateloco digoida ditibigimedi modi,
“Oɡ̶eetetalotiwaji codaa maweniɡ̶ideni Aneotedoɡ̶oji!
Jiɡ̶iniaaɡ̶iniwa Ǥoniotagodi Aneotedoɡ̶oji ane najigotedoɡ̶owa gela ɡ̶odewiɡ̶a.
Jiɡ̶iniaaɡ̶iniwa aneliodi loniciwaɡ̶a,
codaa meliodi me datale.
2 Niɡ̶ina me iloikatidi niɡ̶ina oko ikee niɡ̶ina anewi
codaa meote niɡ̶ina ane iɡ̶enaɡ̶a.
Aneotedoɡ̶oji iloikatidi naɡ̶ajo iwaalo agopeloa ane diɡ̶icaadaɡ̶a yowooɡ̶odi
leeɡ̶odi loenataka ane napioi digoida iiɡ̶o me loomatewepodi oko.
Aneotedoɡ̶oji iloikatidi
leeɡ̶odi me nigodi niɡ̶ijoa liotaka Aneotedoɡ̶oji.”
3 Odaa ja napaawaɡ̶ataceloco modi,
“Oɡ̶eetetalo Aneotedoɡ̶oji
leeɡ̶odi niɡ̶inoa loɡ̶ocilaɡ̶adi naɡ̶ajo nigotaɡ̶a eloodo
ane yabidi idioka limedi me itedibige!”
4 Odaa niɡ̶ijoa 24 lacilodi, ijaaɡ̶ijoa cwaatolo ewikaɡ̶a dakagitiniwace odaa joɡ̶odoɡ̶etetalo Aneotedoɡ̶oji ane nicotedeloco nibaanco ɡ̶oneɡ̶e, modi,
“Jiɡ̶idaaɡ̶ee!
Oɡ̶eetetalo Aneotedoɡ̶oji!”
5 Odaa ja jajipata ica ane dotaɡ̶a ipegitege naɡ̶ajo baanco ɡ̶oneɡ̶e mee me dotaɡ̶a,
“Oɡ̶eetetalo Ǥoniotagodi Aneotedoɡ̶oji,
akaamitawece anakaami liotaka,
akaamitawece anakaami iwikodadipi,
codaa anakaami ɡ̶oneɡ̶aɡ̶a,
akaamitawecetiwaji ane eemiteetibige Aneotedoɡ̶oji!”
Lalokegi ladoneɡ̶egi Waxacoco
6 Odaa ja jajipata ijo ane dotaɡ̶a layaagaɡ̶awa niɡ̶ina elioditiogi oko ane notaɡ̶anaɡ̶a, codaa me layaagaɡ̶awa niɡ̶ina ninyoɡ̶odi nelegi ane daxoɡ̶oke codaa maɡ̶aɡ̶a layagaɡ̶awa niɡ̶inoa naxacoɡ̶onakatedi. Modi me notaɡ̶anaɡ̶a,
“Oɡ̶eetetalo Aneotedoɡ̶oji,
igaataɡ̶a Ǥoniotagodi Aneotedoɡ̶oji aneliodi loniciwaɡ̶a,
ja iiɡ̶e inoatawece.
7 Ǥodinitibece,
idinanenaɡ̶atibece.
Odaa jocaɡ̶anaɡ̶atalo Aneotedoɡ̶oji.
Igaataɡ̶a jiɡ̶icota lakata lalokegi ladoneɡ̶egi Waxacoco,
codaa naɡ̶ani liomaɡ̶ata me lodawa jaɡ̶aɡ̶a dinenyaɡ̶aditege.
8 Naɡ̶ani awicije liomaɡ̶ata,
Aneotedoɡ̶oji yajigote lipegeteɡ̶e ane nipegedi,
dalebepe, codaa me yapidi,
lajo me dinixo.
Naɡ̶ada lipegeteɡ̶e ida ane diitigi,
one niɡ̶inoa loenataka ane iɡ̶enaɡ̶a niɡ̶ina oko liomaɡ̶ataka Aneotedoɡ̶oji.”
9 Odaa jeɡ̶eetiwa niɡ̶ijo aanjo, “Idiitedini niɡ̶inoa ane yotaɡ̶a: Ninitibigiwaji niɡ̶ina oko anonodetibigiwaji migotibeci lalokegi ladoneɡ̶egi Waxacoco.” Codaa eledi meetiwa, “Niɡ̶inoa notaɡ̶a anejitece, Aneotedoɡ̶oji lotaɡ̶a.”
10 Odaa ja idakagitini lodoe niɡ̶ijo aanjo me domaɡ̶a joɡ̶eteta, pida meetiwa, “Jinoɡ̶oɡ̶eetiwa! Igaataɡ̶a akaami iciagi ee liotagi Aneotedoɡ̶oji, codaa iciagepodi ɡ̶anioxoadipi anoyotete niiɡ̶axinaɡ̶aneɡ̶egi anewi aneetece Jesus. Oɡ̶eetetalo Aneotedoɡ̶oji! Igaataɡ̶a niiɡ̶axinaɡ̶aneɡ̶egi aneetece Jesus, latematigo aneo Liwigo Aneotedoɡ̶oji me notaɡ̶anaɡ̶a niɡ̶ijo anoyeloɡ̶oditedibece Aneotedoɡ̶oji lowooko.”
Ijo ane waxoditeloco ica apolicaɡ̶anaɡ̶a lapaceɡ̶egi
11 Odaa niɡ̶idiaaɡ̶idi ja jinaditace ditibigimedi me domoke. Odaa ja jinaditace niɡ̶ijo apolicaɡ̶anaɡ̶a lapaceɡ̶egi ijaaɡ̶ijo ane waxoditeloco liboonaɡ̶adi, “Niɡ̶iniwa ane jakataɡ̶a me jinakatonaɡ̶a”, eledi liboonaɡ̶adi “Niɡ̶iniwa ewi”. Idioka limedi me iɡ̶enaɡ̶a niɡ̶ina me iloikatidi niɡ̶ina oko, codaa niɡ̶ina me ideleɡ̶e niɡ̶ina ane beyagi. 12 Ligecooɡ̶eli ídi micataɡ̶a niɡ̶ina ɡ̶alewaɡ̶a. Codaa owidi laleli nolee lacilo (ikee meliodi naɡ̶atetigi). Idi boonaɡ̶adi ane diniditelogo, aɡ̶ica ane yowooɡ̶odi ane diitigi. Epoka yowooɡ̶odi ane diitigi niɡ̶ida boonaɡ̶adi. 13 Ajo nicaapa igotigi ɡ̶odawodi. Codaa eledi liboonaɡ̶adi me
“Aneotedoɡ̶oji Lotaɡ̶a.”
14 Idiwatawece niɡ̶icoa nideleɡ̶ecajoli digoida ditibigimedi odiotece, owaxoditelogo inoa apolicaɡ̶anadi lapacaɡ̶aɡ̶a, odinixotinigilo lipegeteɡ̶e ane yapacaɡ̶a, codaa me yapidi. 15 Noditicogi nioladi nodaajo-ocaɡ̶ataɡ̶a ane dalepe, odaa jiɡ̶idaa datikata me yaaɡ̶adi niɡ̶inoa ane noiika, yoniciwadi me diiɡ̶enataka. Codaa ipoditedeloco niɡ̶inoa lidelaɡ̶awadi iloikatidi micataɡ̶a niɡ̶ina oko me nipodi “uuva”, ane niopaaɡ̶aditedini me noɡ̶a liwagedi. Odaa jiɡ̶idaaɡ̶igotediogi, igaataɡ̶a Aneotedoɡ̶oji, aneliodi loniciwaɡ̶a, eliodi me deliɡ̶ide leeɡ̶otedi libeyaceɡ̶eco ina oko. 16 Nicaapa codaa me loxobi diniditeloco,
“Ninionigi-eliodi niɡ̶inoa inionaɡ̶a-eloodoli,
Niotagodi niɡ̶inoa otagododi.”
17 Odaa ja jinadi ijo aanjo ane dabiditeloco aligeɡ̶e. Odaa ja dapaawetiogi inoatawece ilaaɡ̶axodi ane leegitibigimece me wayo, meetiogi, “Anagitiwaji, adinatecoɡ̶oteeniteloco lalokegi Aneotedoɡ̶oji me dilokotaje. 18 Anagitiwaji elici libole niɡ̶ijoa inionaɡ̶a-eloodoli, ijoa iodaɡ̶awadi, ijoa lacilodi ane niiɡ̶enatakanaɡ̶a, libole ijoa apolicaɡ̶anadi lajo me niwitidaɡ̶a, codaa ijoa apolicaɡ̶anaɡ̶ademaɡ̶a, codaa me libole inoatawece ɡ̶oneleegiwadi, inoa niotaka, inoa ane daɡ̶a niotaka, inoa iwikodadi, inaaɡ̶inoa ɡ̶oneɡ̶aɡ̶a!”
19 Odaa niɡ̶idiaaɡ̶idi ja jinadi niɡ̶ijo eijeeɡ̶agi ane doide, ijaaɡ̶ijoa inionaɡ̶a-eloodolitigi niɡ̶ina iiɡ̶o, ijaaɡ̶ijoa niodaɡ̶awadi, dinatecoɡ̶otee moideleɡ̶e niɡ̶ijo ane waxoditeloco apolicaɡ̶anaɡ̶a lapaceɡ̶egi, ijaaɡ̶ijoa aaɡ̶aɡ̶a niodaɡ̶awadi. 20 Odaa niɡ̶ijo eijeeɡ̶agi ane doide joɡ̶oniwilo, ijaaɡ̶ijo awitakegi anee me yeloɡ̶oditedibece Aneotedoɡ̶oji lowooko, aneote inoa loenataka ane joxicaɡ̶atema lodoe niɡ̶ijo eijeeɡ̶agi ane doide, aneote me ninaaletiniwace niɡ̶ijo oko anodinanatece nibikotaxete niɡ̶ijo eijeeɡ̶agi codaa modoɡ̶eteta niwilanigi anowo me liwigo. Odaa niɡ̶ijo eijeeɡ̶agi ijaaɡ̶ijo niɡ̶ijo ane ninaaletiniwace oko oyokoletinece elagigi nelegi aneite noledi ane daɡ̶a ipe, inaa ɡ̶ocilaɡ̶adi ane lanicaɡ̶awa aligopenaɡ̶aneɡ̶e loɡ̶ocilaɡ̶adi lanigi. 21 Odaa niɡ̶ijo ane yeyaɡ̶aticoace anoyaxawa niɡ̶ijo eijeeɡ̶agi ane doide me didele, niɡ̶idi boɡ̶onigodi oyatitiogi nodaajo-ocaɡ̶ataɡ̶a ane noditicogi nioladi niɡ̶ijo ane waxoditeloco apolicaɡ̶anaɡ̶a lapaceɡ̶egi. Odaa inoatawece ane ilaaɡ̶axodi oyeligo liboledi neɡ̶epaa daɡ̶adiaaɡ̶oyakadi moyeligo.
<- APOCALIPSE 18APOCALIPSE 20 ->
