୬ ବନ୍ଡ, ଆମ୍ୱେଞ୍ଜି ଅବୟ୍ ଡର୍ନେମରନ୍ ଆରି ଅବୟ୍ ଡର୍ନେମରନ୍ ଆ ବିରୁଦଲୋଙ୍ ସଦରନ୍ ଜିର୍ରେ ଇୟ୍ତେ ଏକାୟ୍କାୟେ, ଆରି ତିଆତେ ଏର୍ଡର୍ନେମରଞ୍ଜି ବିସାରତଜି ।
୭ ଅମଙ୍ବେନ୍ ଗୋଗୋୟ୍ଡମ୍ ଡୋସାନ୍ ଡକୋ, ଇନିଆସନ୍ଗାମେଣ୍ଡେନ୍ ଆମ୍ୱେଞ୍ଜି ତର୍ଡମ୍ ଏଲ୍ସଙ୍ଗତ୍ତାତେ କି ବିସାରନ୍ ଆସନ୍ ଏଲ୍କାୟ୍କାୟ୍ତେ, ଆର୍ପାୟ୍ ଆମ୍ୱେଞ୍ଜି ଇନିବା ଏର୍ଡରମ୍ମନ୍ ଡ ବନବ୍ବଡନ୍ ସଏଲେ ଏଃଡ୍ଡକୋନେ ? ୮ ଆମ୍ୱେଞ୍ଜି ତର୍ଡମ୍ ଏଲ୍ବୁର୍ଡତେ, ଆରି ବୋଞାଙ୍ବେନ୍ ଆ କିଣ୍ଡୋଙ୍ଗଡ୍ ଏର୍ଡରମ୍ମ କାବ୍ବାଡ଼ାନ୍ ଏଲୁମ୍ତେ । ୯ ଏର୍ଡରମ୍ମମରଞ୍ଜି ଇସ୍ୱରନ୍ ଆ ରାଜ୍ୟଲୋଙ୍ ଡରକୋନେନ୍ ଅଃଞାଙେଜି, କେନ୍ଆତେ ଆମ୍ୱେଞ୍ଜି ଜନାଜି ତଡ୍ ପଙ୍ ? କନଣ୍ଡାୟ୍ଲୋଙ୍ ଗଲୋଡଙ୍ବେନ୍ ତଡ୍, ଜୋଣ୍ତଡ଼ାମରନ୍, କୋଙ୍ଡାୟ୍ପୁର୍ମରନ୍, ଡାରିନେମରନ୍, ଓବ୍ବାମରନ୍ ଡ ଓବ୍ବାମରନ୍ ବୟନ୍ ଆଡ୍ରକୋତନେଞ୍ଜି ଆ ମନ୍ରାଜି, ଗିୟ୍ମଡ୍ବୟ୍ମରନ୍, ୧୦ ରାଉମରନ୍, ରନ୍ନାମଡ୍ମରନ୍, ଗାସାଲ୍ମରନ୍, ଡନୋସେମରନ୍, ବୁର୍ଡମରନ୍, କେନ୍ ଆନିଞ୍ଜି ଇସ୍ୱରନ୍ ଆ ରାଜ୍ୟଲୋଙ୍ ଡରକୋନେନ୍ ଅଃଞାଙେଜି । ୧୧ ଆରି ଅମଙ୍ଲୋଙ୍ବେନ୍ ସିଲଡ୍ ଲାଙ୍ଲେନ୍ନେ କେନ୍ ଅନ୍ତମ୍ ଡକୋଲବେନ୍, ବନ୍ଡ ପ୍ରବୁ ଜିସୁ କ୍ରିସ୍ଟନ୍ ଆଞୁମ୍ଲୋଙ୍ ଡ ଇସ୍ୱରଲେନ୍ ଆ ପୁରାଡ଼ା ବାତ୍ତେ ଆମ୍ୱେଞ୍ଜି ମଡ଼ିର୍ ଡେଲବେନ୍; ଇସ୍ୱରନ୍ ଆସନ୍ ଏତ୍ରିୟ୍ଡମ୍ଲନ୍ ଆସନ୍ ଆମ୍ୱେଞ୍ଜି ଡର୍ନେମର୍ ଗାମ୍ଲେ ଡନିଡିନ୍ ଡେଲବେନ୍ ।
୧୫ ଡଅଙ୍ବେନ୍ କ୍ରିସ୍ଟନ୍ ଆ କେଣ୍ଡାର୍ ଡଅଙ୍ ଅନ୍ତମ୍ କେନ୍ଆତେ ଆମ୍ୱେନ୍ ଜନାଜି ତଡ୍ ପଙ୍ ? ଏତ୍ତେଲ୍ଡେନ୍ ଞେନ୍ ଇନି କ୍ରିସ୍ଟନ୍ ଆ କେଣ୍ଡାର୍ ଡଅଙ୍ ପାଙ୍ଲେ ଜୋଣ୍ଡଡ଼ି ଡଅଙ୍ ଅମ୍ମେଆୟ୍ ପଙ୍ ? ଏତ୍ତେଲେ ଡେଡଙ୍ ତଡ୍ । ୧୬ ଆରି, ଆନା ଜୋଣ୍ତଡ଼ିବଜନ୍ ବୟନ୍ ମାୟ୍ଲନ୍ ଡକୋତନ୍, ଆନିଞ୍ଜି ବାଗୁଞ୍ଜି ଆବୟନ୍ ଆ ଡଅଙ୍ ଅନ୍ତମ୍ ଡେତଜି, କେନ୍ଆତେ ଆମ୍ୱେଞ୍ଜି ଜନାଜି ତଡ୍ ପଙ୍ ? ସାସ୍ତ୍ରଲୋଙନ୍ ଅନିଡଲନ୍ ଡକୋ, “ଆନିଞ୍ଜି ବାଗୁଞ୍ଜି ଆବଡଅଙନ୍ ଡେତଜି ।” ୧୭ ବନ୍ଡ, ଆନା ପ୍ରବୁନ୍ ବୟନ୍ ମାୟ୍ତନେ, ଆନିନ୍ ପ୍ରବୁନ୍ ବୟନ୍ ଆବୟନ୍ ଆ ପୁରାଡ଼ା ଡେତଜି ।
୧୮ ଜୋଣ୍ତଡ଼ାନେନ୍ ସିଲଡ୍ ସବ୍ଙାୟ୍ଲନ୍ ଡକୋନାବା, ମନ୍ରାନ୍ ଇନିଜନଙ୍ ଆ ଇର୍ସେ ଲୁମେନ୍ ଡେନ୍, ତିଆତେ ଡଅଙନ୍ ପରାନ୍ସାତ୍ତିନ୍ ଅଃଡ୍ଡେଏ; ବନ୍ଡ ଆନା ଜୋଣ୍ଡଡ଼ାନ୍ ଡ ଜୁଣ୍ଡଡ଼ି କାବ୍ବାଡ଼ାନ୍ ଲୁମ୍ତେ, ଆନିନ୍ ଆ ଡଅଙନ୍ ବିରୁଦଲୋଙ୍ ଇର୍ସେନ୍ ଲୁମ୍ତେ । ୧୯ [c]ଡଅଙ୍ବେନ୍ ଇସ୍ୱରନ୍ ଆମଙ୍ ସିଲଡ୍ ଏଞାଙେନ୍, ଆରି ଡଅଙ୍ବେନ୍ ମଡ଼ିର୍ ପୁରାଡ଼ାନ୍ ଆ ସରେବାସିଂ, ଗାମ୍ଲେ ଆମ୍ୱେଞ୍ଜି ଜନାଜି ତଡ୍ ପଙ୍ ? ଆମ୍ୱେଞ୍ଜି ଆମ୍ୱେନ୍ଡମ୍ଆତେ ତଡ୍ । ୨୦ ଇନିଆସନ୍ଗାମେଣ୍ଡେନ୍ ଆମ୍ୱେଞ୍ଜି ଜବ୍ର ମଡ଼ଗା ବାତ୍ତେ ଞନିନ୍ ଡେଲବେନ୍, ତିଆସନ୍ ଡଅଙ୍ବେନ୍ ବାତ୍ତେ ଇସ୍ୱରନ୍ଆଡଙ୍ ସେଙ୍କେବା ।
<- ୧ କରନ୍ତି 5୧ କରନ୍ତି 7 ->