Marqos 3

Yesus Kushuba Laafa Asusin Fati

(Mat. 12:9-14; Luqa. 6:6-11)

1 Dey Yesus wolle Ayhudni shiiphoni keyaassi giri. Estak dey kushuba laafa asu feer. 2 Isa isa meya malatok chowa sholsefaat: «Han beysani wonaasik fatunitto biyaniwa» yire oodet feeseter. 3 Yesus dey kushuba laafa asusin: «Kabira hang ganeya yaara yerowa» yi. 4 Estan asuni meyak: «Beysani wonaasik ma'aron zagungwa wedey mangunon zagunso; kaani fatungwa wedey worun; aaffarinso faqadteri makebbetiso?» yire mamsi. Sinuntano baasso shaakisete. 5 Yesus nibbesiisi chimak haarefaat biratoosta feese asuni meyanon gi'ak biyaat asusin: «Kushuneeson zeephwa» yi. Bar dey zeephin kushubaas fari. 6 Estan Ferisawini meya geregere kesere Yesusnin aakkak worsonemato Herodisni keena sine baassoneen ane merkesete.

Showo Asuni Meya Yesusneen Ane Hamete

7 Yesus nawobaasneen ane Galiilani baariiski hami. Galiilani daastan yeese showo asuni meya orfobaase hamete. 8 Bar zagit feena wuzason zuutire odesefaat Yuudani daastan, Yerusalemni katamaassin, Edomiyasni daastan, Yordanosni akaasi yesalo fa daastan, Tirosuknawa Sidonunna asi katamaassi biratotan Yesusniki yeesete. 9 Daraasa showotan kabi chowa asuni meya tugsiset feeseter sinna boor'a goonu barik hoossusonek nawoni meyanon ajaje. 10 Showo asunin fatir sinna boor'a merobesi faana baasso zuuttere barin ta'ire farsonek tiir'siset feeseter. 11 Asusasi fa kiina ayyana Yesusnin biyenaase sinba gandera: «Ne Ha'oni naawa» yit chaaget faaser. 12 Kiina ayyanaasikitonon dey bar oo sinnamato maksonoynamato zaggire ajaje.

Asire Heppe Wosini Meeni Korto

(Mat. 10:1-4; Luqa. 6:12-16)

13 Yesus aamaasta kesfaat bar shunna basakitonin teege. Basakito dey barki yeese. 14-15 Barneen ane foosonek; kaambaason maksonek wosunak; kiina ayyanaasikitonon asusasin kisusonek ha'suni hugnabesi foonak asire heppe asunin koraat: «Wosi[a]» yire teege.

16 Es kortese asire heppe asusakito «Phexiros» yire sunsina Simon 17 «Boanerges» uus dey «Dedoni naanggot» yire sunsina Zabdiyosni naanggot Yaqobnawa Yohannisna, 18 Andriyas, Filiphoos, Bertelemewos, Maatiwos, Tomas, Ilfiyosni naa Yaqob, Tadewos, koonefe baassokin ye[b] Simon, 19 Yesusnin aatire ima Askorotki Yuuda.

Yesusnawa Beelzebulna

(Mat. 12:22-32; Luqa. 11:4-23; 12:10)

20 Esseen orfo Yesus keer ye. Barneen nawoni meyaneen showo asuni meya hepsa dey zuuttesete boor'a muuni muuk aane chimoto. 21 «Yesus nifasewa» yistefa wolla odesefaat koonni meya ephak yeesete.

22 Yerusalemun yeese Museni tumaasi assinynyani meya: «Yesus Beelzebul basaassi faarwa! Kiina ayyanaasikitonon kisifenaas baron ha'sifa barikwa» yit wolumsete.

23 Yesus baassotin barki teegere besok ekka yi: «Sexanaas aakkak Sexanaason kisuk chimnirinso? 24 Isa taatoos bare bare oor oor kesfaanane taatobaas zagira yerok aafa chimanawuza. 25 Esiisimato isa keer fe asu oor oor kesfaanane zagire fook aafa chimanawuza. 26 Es bari boor'a Sexanaas bare bare oor oor kesfaanane tishutu tishunatano aafa zagira yerona wuza.

27 «Isa zag asuni keer girire zeemme es zag asusin ephphe taar'noy keebaassi fa foobaason bo'ok chimnir aafe. Taar'naneen orfotu bo'ok chimana.

28 «Futo makefawungwa, asuni meya wostesefe boor'aasewa maksefe me'aase zuuttera feeshun ustona. 29 Sinuntano Korto Ayyanaasta mei'ni kaama maksefe baasso boor'aas koi'ba foonto kowatu sinanatano boor'besiis isanne aafa feeshun ustona wuza.

30 « ‹Kiina ayyana basaassi faarwa› » yiset feeseter sinna boor'atu Yesus es baron make.

Yesusni Intoosewa Ayni Meena

(Mat. 12:46-50; Luqa. 8:19-21)

31 Yesusni intoosewa aybaasakitona yeesere gerakalo yersefaat barki wosisere teegsisete. 32 Es biratoosta diise asuni meya: «Ne intoosewa ayneesakitona gerok neen sholsediferwa» yire maksete.

33 Yesus wolgire: «Intona oonso? Aytaasakito oona oonanso?» yit wolgi. 34 Biratoosta diise baassoki biifet: «Ese intonaasewa aytaasakitona haniiswa: 35 Ha'oosi fiqadinon zagsefe baasso zuuttere ayta, eetna, intonawa» yi.

<- Marqos 2 Marqos 4 ->