Wosini meya 2

Korto Ayyanaas Nawoni Meyaasta Kere

1 Penxekooste yiste heeboos kar'fana kabaasik nawoni meya zuuttambesiise isarik isa dimta zuuttere feeseter. 2 Diinqo akama ipuwani kaamane fa kaama den saman ya. Baasso feesete keyaassi dey tuumi. 3 Termane fa geeni wino baassok beste. Bagte bagtera isa isarbesiisata di. 4 Zuuttambesiise Korto Ayyanak tuuntesete. Korto Ayyanaas baassok imna aruusimato ooma noonok wolumsete.

5 Es kabaasik daa daassin yeese Ha'ooson digsefe Ayhudni meya Yerusalemuk feeseter. 6 Es kaamaason odesefe kabaasik showo asuni meya zuuttesete. Isarbesi isarbesiis baasso teetni noonoosik wolumsefeen odesete boor'a diinqesete. 7 Diinqoknawa dajokna ekka yisete: «Han ekka wolumsefe baasso zuuttambesiise Galiilaki asutenoso? 8 Eekin inno daani noonoosik wolumsefeen odefeniis aakkanso? 9 Inno Partenaki, Meedki, Elamki, Mesopetomiyaki, Yuudaki, Kepedokiyaki, Pantoski, Iisiyaki, 10 Firgiyaki, Punfiliyaki, Giphtsiki, Kerenani tesha fa Libiyani awurajjaasitu faafeni. Inno Roomun ye Ayhudni meenawa Ayhud sina inno dey faanir. 11 Esiisimato Qerxesni asuni meenawa Arabni asuni meena zuuttere Ha'oosi akama wostonon inno teetni noonoosik wolumsefeen odedifeniwa» 12 Es bari boor'a zuuttambesiise diinqesere: «Han wuzaas aambanso?» yisete. 13 Sinuntano isa isaas: «Wayinini usha ushere zaysetewa» yit kanyesete.

Phexirosni Wollaas

14 Es kabaasik Phexiros asire isse wosini meyaneen yerefaat kaambaason teggire daraasik ekka yit make: «Nitto Yuudani daastaki asunawa Yerusalemuk feese nittona zuuttamnitiise han sina chowaason aruk sholefaatine ta makefana baron mai'sira odotiwa. 15 Hash wonnanneen keez sa'ati sinna boor'a nitto safarefetisimato han baasso aane zaysotowa. 16 Sinuntano han bar sinnaas raajju Iyyuel ekka yit makena bar ko'unakwa:

17 « ‹Ha'oos koi'ni wonaasikitosi;

Ayyananaason asu zuuttambaase asiista kessunawa;

arqaasnawa mashka naanggotnitiise raaji maksone;

na'oni meya dey raa'i biyone;

kur'uni meya dey miito miitosone.

18 Esiisimato dey es wonaasikitosi;

arqa wostinynyataasatanawa;

mashka wostinynyanaastana;

Ayyananaason kessunawa;

baasso dey Raaji maksone.

19 Den samak diinqi wuzasikitonon;

han daastak dey biistera artonoy wuza besunawa;

hanna, geya, geeni ki'na dey bestona.

20 Akama dey diinqi sina Daamiisa wona yoonoyfeen;

zeemma Awaas talmona;

assaas dey hannane faar sinana.

21 Daamiisa sunanon teegefe bar zuuttere fui'tona› yiwa.

22 «Israelni asuni meeno! Han kaamaason odotiwa. Nitto teetaasik arifetisimato Naaziretki Yesus bar oo sinnamato Ha'oos nitto ganeyaassi barki kamo zagina akama akama wostoos, biistera artonoy wuzaasewa besose futo sinbaas artewa. 23 Bar teetbaasik Ha'oos zeemma koppa'ena bariknawa arina barikna nittok aattere imtewa. Nitto dey barin tumabesi foonto meeni kushusi suuttonak zagira worseti. 24 Sinuntano kituus barin ephpha fu'onak aane chima sinna boor'a Ha'oos kituusi shananon tishkira barin kitun kabgi. 25 Dawit dey basa chowaasik ekka yi:

« ‹Daamiisin wonna wonna sinnaastatu biifawungwa;

nawonoynamato bar hoi'ta teshnaastatu fewa.

26 Es bari boor'a nibnaas gire;

noononaas dey girak tuunte;

Esiisimato ashnaas dey abdiktu faafa.

27 Kaanaason ke'oni dimaassi aafa beyana wuza;

Kortoneesin dey;

moogaassi kuuppe fui'tonak aafa zaguta wuza.

28 Kaani ugnaason taak assitwa;

ne taneen ane sinta boor'a;

giranaas tuuma sinana.›

29 «Aytaasakitono! Zeemoti abani meeni ganeyaassin isaas sina Dawit kitire kabbartenamato; moogbaas dey hawungneen kar'a innokik faanamato ammanon nittok makonawa. 30 Sinuntano Dawit es baron makenaas raajju sinna boor'anawa dey Ha'oos barik: ‹Ne zalaassin isaasin ne zigimoosta duusunawa› yit teyya girina abdini kaamaason arire feer sinna boor'awa. 31 Es bari boor'a: ‹Kiristoos› ke'oni dimaassi fui'tonoynamatonawa ashbaas dey moogaassi kuupnoynamatonatu zeemme biyaat kitun kabuna bari chowaason make. 32 Es Yesusnin Ha'oos kitun kabgiwa. Inno dey zuuttera es chowaasik zaalwa. 33 Ha'oosi hoi'ta teshta duuk den tegifena kabaasiknawa Korto Ayyanaasi abdinon Abaaskin ephna kabaasikna han biifeti baronnawa odefeti baronna kessiwa. 34-35 Ese den sama kesaas Dawit sinna beybaason Dawit teetbaasik ekka yit makewa:

« ‹Daamiis Daamtaasik;

gumaneesin ne ha'suni hugnaasi sikalosi;

zaguna kabaneen;

hoi'ta teshnaasta duwa.›

36 «Ese han nitto suutti Yesusnin Ha'oos Daam dey Kiristoos zaginamato Israelni meeni daraas zuuttere futok aruwowa!»

37 Daraas dey es baron odesefe kabaasik nibbesiissi akamanon safarsere Phexirosninnawa oom wosini meyanonna: «Ayni meyane! Eekin awu zagunirinso?» yisete.

38 Phexiros dey ekka yi: «Harmutiwa; boor'nitiis dey feeshun ustonak isa isarnitiis Yesus Kiristoosni sunaasik haphuqtoti. Ha'oosi ima sina Korto Ayyanaason ephphatootiwa. 39 Abdini kaamaas nittoknawa naanggotnitiisikitoknawa. Esiisimato dey Daama Ha'oos barki teegona woksok feese baasso zuuttambesiise asiknawa.»

40 Dey ooma showo kaama zaala maket: «Han elinga koontoosta yooni ke'oossin teetnitiison fu'otiwa» yire kiiti. 41 Baassossin showobesiis es kaamaason ephpheteesere haphuktesete. Es wono keez kum sinni asuni meya amanere daytesete. 42 Baasso dey wosini meeni assuuson odesere isarik fook, tushaason isarik muuknawa shiiphokna chimet feeseter.

Amanynyini Meeni Isar Sinnewa Baasso Foose

43 Es kabaasik wosini meeni kushuussi showo biistera artonoy wuznewa diinqine zagtet faar sinna boor'a asu zuuttambaase dige. 44 Amanynyini meya zuuttere isariktu feesefe. Fa wuzbesiis zuuttera gaara. 45 Fa wuzbesiisonnawa otumbesiisonna kisire waagefaafe es waagaason isarba isarbaasik sholsinamato haa'e imet feeseter. 46 Wonna wonna betemeqdesiissi zuutteset feeseter. Keebesi keebesiissik dey wol teegsefaafe isarik tushaason batte giraknawa ma'a nibakna meeset feeseter. 47 Daamiisin dey galatteset feeseter. Dara zuuttambaase dey baassotin ulfinsit feer. Ha'oos dey faruni asuni meyanon wonna wonna baassosta daysit faar.

<- Wosini meya 1 Wosini meya 3 ->