1 Ana me abanga uganiya, nihenu, daki ya cukuno se a nyertike shi ni vat ba. 2 Isa rusa ni vat, uwui ugomo Asere u eze gusi ukari in niye. 3 Uganiya sa anu wadi gu tizin, ''iriba irom nan ti cukum ti huma'' abini me iwono idi tu we. Idi zi pazaza gusi une ahira uyo. Wada suburka me ba. 4 Shi nihenu, ida zo me shi anyimo amariu ba, uguna uwui me udi mukurka shi gusi ukari. 5 Vat ushi ahana amasa wani nan ahana uwui. Tida zon duru ahana ani ye, nani amariu ba. 6 Kati ti wuzi moro gusi ukasu wa anu ba, ca ti cukuno unu hira ahira nan unu inko iriba ahira a'indw. 7 An desa wa wuza moro wa wuza in niye nini, andesa ubere uhuza, uhuza in niye nini. 8 Sa ya cukuno haru anu uwui wani, ya cukuno duru ti inki iriba ahira a'inde, ti inki iriba nan hem ucukuno gusi imum i kurzo uru, ti inso iriba ti kem ubura anyimo ugomo Asere. 9 Daki ugomo Asere māa inki uguna ti iri izenzen imeme ba, bati ti kem ubura uni usuro uYeso vana Asere. 10 Me mani māa wi barki haru, bati nani ti hira ahira nani ti zin moro, ti di cukuno nigoo me nan me. 11 Barki anime, i nya acece nikara niriba, in benki acece, gusi imum sa isa zina nu wuza me. 12 Ti zinu tira ushi tari nya ni andesa wa zin katuma anyimo ashime ti nanu, wa kuri wa dungura shi anyimo ugomo Asere. 13 Ta gunna shi canti ni we memeru anyimo uhem, barki katuma kawe me, cukuno ni ahuma acece ashi. 14 Ti zini utira ushi tari, nihenu; gbarika ni anu zatu ace, benki ni anu zatu akara, cukuno ni riba ishew acece ashi vat. 15 Kati i garza imum buri ini imum iburi, ca icukuno i wuzi acece imum i huma. 16 Wuza ni iriba irum konu maya. 17 Wuza ni biringara sarki umarsa. 18 Bezi ni iriba irom ahira atimum vat. Imum sa ugomo Asere ma nyara anyimo vana umeme Yeso uru. 19 Kati i hunze tize ti bibe ta sere. 20 Kati i uzi u'inko ababga. 21 Mansa ni vat timumum. Inta ni imum besa irizi. 22 Wuna ni pit ahira atimumum ti buri. 23 Ca ugomo Asere ulau ma kuro icukuno lau, ca bibe bi shi, wan uvengize, nan nipum a inta we memeru sarki imum iburi barki u aye Yeso vana ugomo Asere. 24 Desa ma tisa shi ugino me, unu iriba ishew mani, de besa madi wuzi anime. 25 Nihenu, wuza ni haru biringara cangi. 26 Iso ni nihenu vat in nu gbindirko uriri ubibe bi lau. 27 Ma pata shi nan Asere basa ni unyettike ugeme aje ani henu vat. 28 Timumum tiriri acoo aru ugomo Asere ti cukuno nan shi.

<- Utassalonikawa Utuba 4