1 Kulu wayi barra nya-mangaji, nya-mangaji mirningiya, wankala mirningiya nyangambalanga-nganji Yiburama? Nya-mangaji yabiwiji, kambala-wundarrbanji nyangambalanga-biyi liyi-Juwu kangka ngambala li-Juwu wiji, jambalini nakaringu yilaa ki-Yiburama ki-wankalangka. Wayi barra nya-mangaji? Kirrirni-nala yiku barra. 2 Nya-mangaji Yiburama, kurdardi ki-Kada kilu-yibarranma nmanthawu barranamba yurlurr kangka nya-mangaji malbu yabi yurrngumantha, kurdardi kiwa-nima ngayamantharra yabi, Yiburama. Kurdardi kumba-alarramanma yiku ki-Kada, “Kanha-yibarra ngarna yurlurr yinku kangka jarnini marringaya,” kurdardi. Ngala Kada, kumba-nykalanykarri nuwarnu-yuwawu nuwarnarrku.

3 Kulu ki-arrkulangku, kilu-yibarra wuka yiku ki-Yiburama, kilu-balirra yiku ki-wukangka ki-Kada ngalhi wuka? Kilu-balirra nganinya, “Nya-mangaji Yiburama, kumba-yibarra na-wurdu yilaa ki-Kada, kulu ka-arri Kada, ‘Jarna-yibarranji Yiburama nmanthawu barranamba yurlurr ngatha kangka kumba-yibarra na-wurdu ngathangka,’ ka-arri nganinya Kada.”

Nganinya kilu-yibarra ki-wukangka nyikungu ki-arrkulangku, bawuji. 4 Kulu li-mbangu, li-mbangu jalini jabungka, kalu-rdumanji ma-kijululu. Kurdardi kalilu-ngundayima ma-mani winarrku ki-wirdinju nyungkalunga ngala jalu-yabimanji awara yiku, alu rdumanthawu ma-kijululu ma-mangaji, jalilu-ngundayi ma-kijululu kangka jalini jabungka yiku.

5 Ngala Kada, kurdardi kiwima barranamba nya-mangaji mirningiya wirdi. Kulu ngambala, kurdardi kambalima jabungka yabimanthawu awara yiku ki-Kada, ngambala rdumanthawu awara nakaringu yilaa, kurdardi. Narnu-yuwa narniku ki-Kada narnarrku. Kada, kambalilu-yibarranji ngambala nmanthawu barranamba yurlurr yiku, kurdardi kangka jambala-yabimanji awara yiku, kurdardi kangka jambalini jabungka yiku, ngala jambalilu-yibarranji nmanthawu barranamba yurlurr yiku kangka jambalamba-yibarranji ngambala-wurdu yilaa, ngambala li-wardi, jambalamba-yibarranji ngambala-wurdu yilaa nganinya. Kulu nganambaji marda ki-Kada kilu-yibarra Yiburama nmanthawu barranamba yurlurr yiku. 6 Marda nyarrku, nya-mangaji nyarrku wankala ngulakari, nyangambalanga-nganji nya-mangaji yabiwiji Dabida, kila-nykarri narnu-yuwa, karnila-nykarri narnu-yuwa narniku ki-Kada wumba kalilu-yibarranthaninya li-wulu, alu nmanthawu barranamba yurlurr yiku, alunga liyi-wuluwu wumba kurdardi kalu-wingkayima yurlurr yurrngumantha. Karnila-nykarri na-mangaji ki-Dabida, kulu kalili-nu li-mbangu li-wulu, jalini yabi nalu-wurdu, li-mangaji wumba ki-Kada jalilu-yibarranji nmanthawu barranamba yurlurr nganinya.

7 Kalili-nu nganinya, “Yabi nalu-wurdu li-mbangu namba Kada ja-wukanyinji alunga, ‘Kurdardi karna-linginmarru nya-mbangu, kurdardi karnarna-linginmarru narnu-wardi wumba kirru-wardima awara ngala kirna-wayathanjima nykarrinjawu, kirna-wayathanjima nykarrinjawu nuwarnu-wardiyu nuwarnuwirrunga bawuji,’ nganinya ja-wukanyinji. Yabi nalu-wurdu li-wulu namba narnalunga narnu-wardi jarnilu-yayamanji ki-Kada wurdula aluwa. 8 “Yabi barra nalu-wurdu li-wulu namba ki-Kada jalilu-yibarranji nmanthawu barranamba yurlurr yiku, li-mangaji wumba Kada jumba-wukanyinji alunga, ‘Kurdardi karnamba-nykalanykarriyu nuwarnu-wardiyu nuwarnalunga.’ ”

Nganinya barra kilu-balirra wuka ki-Dabida. 9-10 Kulu ka-wukanyi nganinya nya-mangaji Dabida alunga liyi-wuluwu ngala minja wayi barra nalu-yanyka li-mangaji? Li-rduwarra li-Juwu kalili-nu, mili li-mbangu nalarrku marda li-wulu wiji kalili-nu? Li-ngani barra?

Jirrirna-linginmanji barra, jinangu wuka liyi-wuluwu wiji, alunga liyi-rduwarduwarrawu marda alunga nuwalarrkulu, alunga liyi-wuluwu wiji.

Wayi barra malbu Yiburama? Ngaliwa nya-mangaji malbu Yiburama kumba-yibarra na-wurdu yilaa ki-Kada ngaliwa ki-Kada kilu-yibarra yiwa nmanthawu barranamba yurlurr yiku. Nungka rduwarra kilu-yibarra nganinya? Nungka kurdardi rduwarra?

Jirrirna-linginmanji barra, kilu-yibarra Yiburama nmanthawu barranamba yurlurr yiku ki-Kada ngaliwa aliyaliya rduwarra nyamangaji, aliyaliya rduwarra. 11 Nganinya barra, namba aliyaliya rduwarra nya-mangaji, baji barra kumba-yibarra na-wurdu yilaa ki-Kada, kulu ki-Kada kilu-yibarra malbu, yiwa nmanthawu barranamba yurlurr yiku. Kulu ngulakari barra kalu-ma barra Yiburama, kalu-ma yiwa nmanthawu rduwarra, kalu-ma nganinya, yiwa yiku nganthawu karanka ndiwa nyikungu, Yiburama.

Ambuliyalu Yiburama, kurdardi kiwa-nmanma rduwarra, kumba-yibarra na-wurdu yilaa ki-Kada, kulu ngulakari nalarrku kalu-wanda nya-mangaji. Nganambajilulu alu marda, kurdardi li-rduwarra, kalinyamba-yibarra nalu-wurdu yilaa ki-Kada. Kulu nganinya barra Yiburama ambuliyalu alunga ka-arri barranamba nyalunga-biyi, kulu li-mangaji, kurdardi li-rduwarra, ngulakari jalinyamba-yibarranji nalu-wurdu ki-Kada marda, kulu ki-Kada jalilu-yibarranji nmanthawu barranamba yurlurr yiku ngalalu nyamba-yibarrantharra nalu-wurdu yilaa barranamba Yiburama.

12 Kulu nganambajilulu barra nya-mangaji Yiburama, jiwini barranamba nyangambalangabiyi, ngambalanga liyi-rduwarduwarrawu liyi-Juwu wumba jambalamba-yibarranji ngambala-wurdu yilaa ki-Kada, kulu jambalini barranamba likili-ardu ki-Yiburama wumba kumba-yibarra na-wurdu yilaa ki-Kada, aliyaliya rduwarra ndiwa.

13 Kulu Kada ka-wukanyi yiku ki-Yiburama, kumbi-nu yiwa ngundayawu awara yiku, yiwa ngundayawu mayangka awara wiji yiku ki-Yiburama, alunga liyi-mangaji liyi-ngulangulakaringu wumba nakaringu yilaa ki-Yiburama, awara wiji nyalunga awara baku, nganinya kili-nu ki-Kada. Marda ka-wukanyi jinangu wuka ngaliwa aliyaliya na-mangaji, aliyaliya na-mangaji narnu-yuwa narnalunga balirrantha.

Baku karnilu-ngunda narnu-yuwa yiku ki-Mujij ngala minja kili-nu Yiburama nyuwu-mangaji ki-awarawu ambuliyalu, Kulu ki-Kada kili-nu Yiburama ki-awarawu kangka kumba-yibarra na-wurdu yilaa Yiburama, kurdardi kangka yiwa wingkayawu yurlurr nuwarnu-yuwawu ki-Mujij, kurdardi. Kumba-yibarra na-wurdu yilaa ki-Kada, kulu ki-Kada kilu-yibarra nmanthawu barranamba yurlurr, kulu ngulakari kili-nu Yiburama ki-awarawu ngundayawu.

14 Kulu nalarrku li-wulu li-manji, jalu-yudirrinji, katha li-mbangu li-jawina nuwarnu-yuwawu, kalu-rdumala nya-mangaji awara wumba kilu-ngundarra ki-Kada, kilu-ngundarra awara ngayamantharra alunga liyi-mangaji wumba jalini li-jawina nuwarnu-yuwawu ki-Mujij.

Namba ki-Kada, kilu-ngundayima awara ngayamantharra alunga liyi-mangaji, kulu li-wulu nalarrku, kalinyamba-yibarranjima nalu-wurdu yilaa ki-Jijaj winarrku. Ngala kurdardi. Ki-Kada kilu-ngundarra awara alunga, kilu-yabimala awara alunga liyi-mangaji wumba jalini yilaa ki-Jijaj nalu-wurdu.

15 Narnu-yuwa ki-Mujij, karnilu-ngunda ki-Kada, kulu kurdardi kambala-wingkayima yurlurr nuwu-mangaji yurrngumantha, waraba. Bajarnu narnu-yuwa ngambalanga, ngala jambala-ngajbirrinji nuwu-mangaji, nungkarnarrku jambala-ngajbirrinji nuwu-mangaji nagambala wiji. Namba jambala-ngajbirrinji nuwarnu-yuwawu nganinya kulu bajuwarnu Kada ja-yinjathirrinji ngambalanga liyi-ngajbirrinjamara, kulu baku kambalilu-ramala ki-Kada, kambalilu-ramala kangka kurdardi kambala-wingkayima yurlurr nuwarnu-yabiyu nuwarnu-yuwawu. Ngala minja bajalu nalarrku li-mbangu winkanda, kurdardi aluwa narnu-yuwa ki-Mujij, kurdardi ki-wukawu alunga yunduyundumanthawu alunga, “Jinanguwuthu yabi ngala jinanguwuthu niwarrku wardi.” Namba kurdardi ki-wukawu nyuwu-mangaji alunga kulu kurdardi kalili-narru ki-Kada, kurdardi kalili-narru baku, “Jirru-ngajbirrinji nuwarnu-yuwawu,” kurdardi kalili-narru nganinya. 16 Ngala nya-mangaji wuka wumba ki-Kada kili-nu Yiburama, Kada ngundayawu awara alunga liyi-wuluwu, nya-mangaji wuka kili-nu ki-Kada ngambalanga liyi-wuluwu wiji wumba jambalamba-yibarranji ngambala-wurdu yilaa ki-Jijaj, kurdardi kangka ngambala wingkayawu yurlurr nuwarnu-yuwawu ki-Mujij ngala minja kangka ngambala nyamba-yibarranthawu ngambala-wurdu yilaa. Kili-nu malbu Yiburama ngambalanga marda, yiwa Kada ngundayawu, ngundayawu winarrku ngambalanga. Jiwini yabi Yijan Kada, nganinya kilu-ngundarra winarrku, ndiwa yabi.

Kulu Kada, namba ka-wukanyi jinangu wuka, kalngiya nganinya kilu-ngundarra, kalngiya nganinya kilu-ngundarra awara ngambalanga. Ki-Kada kilu-ngundarra awara ngambalanga wumba jambalini li-jawina nuwarnu-yuwawu ki-Mujij kulu jambalamba-yibarranji ngambala-wurdu yilaa ki-Kada. Marda kilu-ngundarra awara alunga liyi-mbangu wumba kurdardi aluwa narnu-yuwa ki-Mujij ngala minja jalinyamba-yibarranji nalu-wurdu yilaa. Kalilu-ngundarra awara ngambalanga wiji kangka ngambala wiji jambala-wandayi Yiburama, jambalamba-yibarranj i ngambala-wurdu yilaa ki-Kada barranamba Yiburama ka-arri, jambala-wandayi barranamba li-ardubirri jalu-wandayi nyalunga-biyi, nganinya barra Yiburama barranamba nyangambalanga-biyi, kangka ngambala ngulakari jambalamba-yibarranji ngambala-wurdu yilaa ki-Jijaj barrawumba yiwa ka-arri.

17 Kada, kili-nu Yiburama nganinya kulu kilubalirra jinangu wuka ki-arrkulangku nganinya, “Jirna-yibarranji yinda nmanthawu wurrama. Nakaringu yindaa kala-nmala li-jakarda, li-ngulangulakaringu nalu-miji. Kala-nmala ki-awarala ki-mayangka ki-jakardala, nganinya kala-nmala li-mangaji linkili-nganji nakaringu yindaa,” ka-arri nganinya. Kulu Kada wumba naja-wukanyinji kalngi wuka, yiwa kili-nu nya-mangaji wuka, kili-nu nya-mangaji malbu wumba kumba-yibarra na-wurdu yilaa.

Yiwa barra Kada, jalilu-ngabiyanji li-mbangu li-ngabangaku, jalilu-lhungkumanji, jarnilu-ngundayi narnu-lhungku alunga wumba nambalu barni-lhungku, jalilu-ngundayi li-ardubirri alunga liyi-wuluwu wumba nambalu barni-bardarda. Kulu ja-wukanyinji ki-ngabiyawu barra namba aliyaliya kiwima nya-mbangu, jilu-lhaanji nya-mbangu namba aliyaliya kiwima. 18 Kulu nya-mangaji Yiburama, ka-malburri, ka-wardirri na-manka, kumba-lhaa ka-malburri kurdandu kulu kurdardi nyiki-arduwu barra, kalngiya malbu kumba-lhaa, kurdardi nyamba-kajakajamanthawu barra yiwa, Ngala minja kili-nu ki-Kada, “Li-jakarda nakaringu yindaa kala-nmala li-ngulangulakaringu.” Kulu Yiburama, kila-nykarri, kala-ka nya-mangaji wuka, yiwa nyamba-kajakajamanthawu li-jakarda, nakaringu yilaa li-jakarda likili-nganji, alu nmanthawu ki-awarala ki-mayangka ki-jakardala, kila-ka nya-mangaji wuka kulu kumba-yibarra na-wurdu yilaa ki-Kada nuwu-mangaji barra.

19 Kumba-nykalanykarri barra yiwa malbu, ka-wingkalwingkayaninya lukuluku bajiwuthu ki-lhabayila nyungku-mbangu ngulakari kulu nyungku-ja ambirriju, kilu-mirrinyma ki-lhabayilu, kalngiya malbu. Kumba-nykalanykarri mili anku riku-wanguwu wu-Jira, a-mangaji a-bardibardi, a-wardikirri barra, kurdardi nyamba-kulhakulhamanthawu bardardawu kangka rra-bardibardi barra Nganinya kumba-nykalanykarri nya-mangaji malbu ngala minja kila-ka wuka wumba kili-nu ki-Kada, li-jakarda li-ngulangulakaringu nakaringu yilaa kala-nmala, kila-ka wuka kulu kumba-yibarra na-wurdu yilaa ki-Kada.

20 Kurdardi ka-ngajbirrinma nyuwu-mangaji ki-wukawu wumba kili-nu ki-Kada, kurdardi kumba-yangamanma na-wurdu, ngala minja yurrngumantha kumba-yibarra na-wurdu yilaa ki-Kada, mili yurrulu kumba-yibarra na-wurdu wakulamba yilaa nganinya. Kumba-lhawarrma yiku ki-Kada ki-wukawu nyuwu-mangaji, kilu-barlirra. Bajingu lumbu ka-arri wunungu, yiwa nyamba-yibarranthawu na-wurdu yilaa ki-Kada. 21 Kilu-lhaa Kada, kalngiya jiwini wunungu, ja-wukanyinji ngayamantharra kalngi wuka. Kilu-lhaa, namba Kada jalili-nanji li-wulu ngabiyawu kulu baku kilu-ngabiyala awara nganambajilulu wumba kalili-nu, jiwini kalngiya wunungu, kalngiya yurlurr.

22 Nganinya barra kumba-yibarra na-wurdu yilaa ki-Kada malbu Yiburama, kulu bajuwarnu barra ka-arri Kada, “Kirna-yibarrala jinangu nmanthawu barranamba yurlurr ngatha kangka kumba-yibarra na-wurdu ngathangka.” 23-25 Ngala kurdardi ngayamantharra yiku ki-Yiburama ka-wukanyi nganinya Kada, kurdardi. Ngala minja nya-mbangu wankala mirningiya ki-Kada, kilu-balirra nya-mangaji wuka ngambalanga kangka nya-mangaji wuka ka-wukanyi ngambalanga marda, Kada. Namba jambalamba-yibarranji ngambala-wurdu yilaa ki-Kada, nya-mangaji Kada wumba kilu-lhungkuma ngabangaku, kilu-lhungkuma Jijaj Kurayij wumba kumba-mirra ngambalanga kangka jambalini li-wardi, kilu-lhungkuma mili ki-Kada, yiwa yibarranthawu ngambala, ngambala nmanthawu yurlurr yiku namba jambalamba-yibarranji ngambala-wurdu yilaa ki-Kada. Kulu kili-nu wuka marda ngambalanga, “Kalirna-yibarrala li-ja, alu nmanthawu barranamba yurlurr ngatha,” nganinya barra kili-nu. Bawuji barra.

<- Ruma 3Ruma 5 ->