1 Ma galoc tasôm biŋ amboac ondoc. Tasôm gebe Tamoa sec ŋalêlômmaŋ, gebe moasiŋ tau ênam sêga me. 2 Masigoc, amboac tonaŋ atom. Aêac dawi sec siŋ naŋ kêtôm tamac êndu su, tec tasêlêŋ tamoa sec ŋalêlôm êtiam amboac ondoc. 3 Amac ajala biŋ tonaŋ atom me. Aêac samob, taŋ busaŋgu gêbiŋ aêac tôŋ tamiŋ Kilisi Jesu naŋ, busaŋgu gêbiŋ aêac tôŋ tamiŋ eŋ gêmac êndu amboac tonaŋ. 4 Gêdêŋ taŋ taliŋ saŋgu naŋ, Anôtô kêsuŋ aêac dawiŋ Kilisi gebe tawê kaiŋ eŋ gêmac êndu. Ma Tamanê ŋawasi gêŋu Kilisi sa aŋga ŋacmatênêŋ, tec aêac tasa nêŋ lêŋ tamoa mateŋ jali wakuc amboac tonaŋgeŋ.

5 Aêac tamac êndu dawiŋ Kilisi tatôm eŋ gêmac êndu, tec oc dandi sa dawiŋ eŋ tatôm eŋ gêdi sa amboac tonaŋgeŋ. 6 Biŋ tonec aêac tajalagac gebe aêacnêŋ ŋalêlôm laŋgwa kêpi kakesotau gêwiŋ Kilisi, gebe enseŋ ôliŋ ŋasec tau su ma tatu sec tau ŋasakiŋwaga êtiam atom. 7 Gebe ŋac, taŋ gêmac êndu su naŋ, gêmac kêgaboac eŋ su aŋga sec ŋaŋaclai. 8 Aêac embe tamac êndu dawiŋ Kilisi, go takêŋ êwiŋ gebe daŋgôŋ mateŋ jali dawiŋ eŋ amboac tonaŋgeŋ. 9 Aêac tajala gebe Anôtô gêŋu Kilisi sa aŋga ŋacmatênêŋ, tec oc êmac êndu êtiam atomanô. Gêmacanô tau oc ênam gôliŋ eŋ êtiam atom. 10 Eŋ gêmac êndu tonaŋ gêmac êndu kêtu dim tageŋ ma geseŋ sec ŋaŋaclai su. Eŋ mata jali, tec gêŋgôŋ mata jali kêtu Anôtôŋa. 11 Ma amac amboac tonaŋ, alic taôm amboac awi sec siŋ su kêtôm amac êndu. Ma Kilisi Jesu gêbiŋ amac tôŋ aŋgôŋ matem jali kêtu Anôtôŋa.

12 Amboac tonaŋ sec ênam gôliŋ amac ôlim, taŋ êmac êndu naŋ, e taŋem wamu têmtac ŋakalac ôlimŋa nec êtiam atom. 13 Akêŋ ôlim ŋagêŋlêlôm êndêŋ sec êtu geo ŋalaukasap atom. Akêŋ taôm êndêŋ Anôtô êtôm ŋac, taŋ mata jali kêsa ma akêŋ ôlim ŋagêŋlêlôm êndêŋ Anôtô êtu biŋgêdêŋ ŋalaukasap, 14 gebe sec ênam gôliŋ amac êtiam atom, gebe amoa biŋsu ŋalabu atom, amoa Anôtônê moasiŋ ŋalabu.

15 Ma galoc amboac ondoc. Aêac tamoa biŋsu ŋalabu atom, tamoa moasiŋ ŋalabu, tec daŋgôm sec tamoa me. Masigoc, amboac tonaŋ atom. 16 Amac ajalagac, amac embe akêŋ taôm anam sakiŋ ŋac teŋ ma taŋem wamu eŋ, go atu ŋac, taŋ taŋem wamu eŋ naŋ, nê sakiŋwaga. Embe atu sec ŋasakiŋwaga, go anaŋa ma embe atu taŋa wamu ŋasakiŋwaga, go Anôtô êmansaŋ amacnêm biŋ. 17 Mago tanam daŋge Anôtô, gebe gêmuŋgeŋ amac atu sec ŋasakiŋwaga, mago galoc têdôŋ mêtê gêdêŋ amac, tec taŋem wamu biŋŋanô tonêm ŋalêlôm samucgeŋ. 18 Kilisi kêgaboac amac su aŋga sec ŋaŋaclai, tec ajam sakiŋ biŋgêdêŋ. 19 Aê jasôm ŋoc biŋ amboac ŋamalac sêsôm nêŋ acgom, gebe amac ŋamalac palê-palê. Gêmuŋgeŋ amac akêŋ ôlim ŋagêŋlêlôm kêtu gêŋ ŋatêmui to geo ŋasakiŋwaga. Ma galoc akêŋ ôlim ŋagêŋlêlôm kêtu biŋgedêŋ ŋasakiŋwaga, tec asa Anôtônê launêŋ lêŋ.

20 Gêdêŋ taŋ atu sec ŋasakiŋwaga naŋ, amac asô biŋgêdêŋ ŋalabu atom. 21 Ma amac atap sakiŋ tonaŋ, taŋ galoc gêgôm amac majem kêsa naŋ, ŋaŋanô sa amboac ondoc. Ŋanô tonec gebe gêmacanô tau. 22 Mago galoc tec Anôtô kêgaboac amac su aŋga sec ŋaŋaclai ma atu ênê sakiŋwaga. Sakiŋ tonaŋ ŋaŋanô gebe asa Anôtônê launêŋ lêŋ e êtu ŋamu aŋgôŋ matem jali teŋgeŋ. 23 Sec ŋaôli tau tonec gebe gêmacanô. Ma Anôtônê moasiŋ tau tonec gebe aêacnêŋ Apômtau Kilisi Jesu gêbiŋ aêac tôŋ daŋgôŋ mateŋ jali teŋgeŋ.

<- ROM 5ROM 7 ->