1 Go galic undambê wakuc to nom wakuc, gebe undambê ŋamataŋa to nom ŋamataŋa naŋ gêjaŋa su ma gwêc malamê amboac tonaŋ. 2 Ma galic malac dabuŋ Jerusalem wakuc, taŋ Anôtô kêkêŋ kêsêp aŋga undambê gêmêŋ naŋ, ŋagêlôŋ amboac awê, taŋ sêjam gêlôŋ eŋ gebe ênam ŋac. 3 Ma gaŋô awa kapôêŋ teŋ kêsa aŋga lêpôŋ kiŋŋa gebe “Ôlic acgom, Anôtônê andu kêkô gêwiŋ ŋamalac. Eŋ oc êŋgôŋ êwiŋ êsêac ma êsêac oc têtu ênê lau, ma Anôtô tau oc êmoa êwiŋ êsêac. 4 Ma eŋ oc êmbuŋ mateŋsulu samob aŋga mateŋgasi su ma gêmacanô oc ênêc êtiam atom ma gêŋwapac to taŋiboa ma ŋandaŋ oc ênêc êtiam atom, gebe gêŋ ŋamataŋa samob gêjaŋagac.”

5 Ma ŋac, taŋ gêŋgôŋ lêpôŋ kiŋŋa naŋ, kêsôm gebe “Ôlic acgom, aê oc jaŋgôm gêŋ samob êtu wakuc.” Ma eŋ kêsôm gebe “Oto gebe Biŋ tonec biŋ ŋaŋêŋ to biŋŋanô.” 6 Ma kêsôm gêdêŋ aê gebe “Ŋanô kêsagac. Aê ŋac ŋamata to ŋamu. Aê katu ŋam to ŋatêpôê. Aê jakêŋ bu aŋga bumata mata jali êndêŋ lau, taŋ bu gêjô êsêac naŋ, sênôm ŋaômageŋ. 7 Ŋac taŋ êku ŋacjo tulu naŋ, êwê kaiŋ gêŋ tonaŋ ŋai êtu ênê gêŋlênsêm, ma aê jatu ênê Anôtô ma eŋ êtu aê latuc. 8 Ma lau mateŋ golec to sêkêŋ gêwiŋ atom, ma lau tosec to sêjac ŋamalac êndu, ma mockaiŋo to mockaiŋ ma laubeŋ to gwam ŋasakiŋwaga ma dansaŋtêna samob, oc sêwê kaiŋ ŋagêjactoŋ, taŋ ja to talao gelom naŋ. Gêmacanô kêtu luagêcŋa tau tonaŋ.”

9 Go aŋela 7 tolaclu 7, taŋ gêŋwapac ŋamuŋa 7 kêsêp e meŋgêc naŋ, nêŋ teŋ gêmêŋ ma kêsôm gêdêŋ aê gebe “Ômôêŋ, aê jatôc awê, taŋ Domba gebe ênam naŋ, êndêŋ aôm.” 10 Tec aêŋoc katuc kaiŋ teŋ kêsa e eŋ gêôc aê kapi lôc baliŋ kapôêŋ teŋ gaja, go eŋ kêtôc malac dabuŋ Jerusalem, taŋ Anôtô kêkêŋ kêsêp aŋga undambê gêmêŋ naŋ, gêdêŋ aê. 11 Gêmêŋ toAnôtônê ŋawasigeŋ. Malac tau ŋawê amboac pocawa, amboac pocawa jaspa ŋaôsic amboac glas. 12 Malac tau ŋatuŋbôm kapôêŋ ma baliŋ toŋasacgêdô 12. Ma aŋela 12 sêkô sacgêdô tonaŋ ŋaô gêdêŋ-gêdêŋgeŋ. Ma teto Israel latuinêŋ gôlôacmôkê 12 nêŋ ŋaê kêpi sacgêdô tau. 13 Sacgêdô têlêac gêc oc kêpiŋa, têlêac gêc musaŋgu-mŋa, têlêac gêc mula-mŋa ma têlêac gêc oc kêsêpŋa. 14 Ma poc 12 kêtu malac ŋatuŋbôm tau ŋanombaŋ, ma Dombanê aposolo 12 nêŋ ŋaê 12 gêc poc tau.

15 Aŋela taŋ kêsôm biŋ gêdêŋ aê naŋ, kêkôc dôŋ gold teŋ gebe ênam dôŋ malac tau ma ŋasacgêdô to tuŋbôm. 16 Malac tau ŋalêsiŋŋa to ŋatakôcŋa baliŋ kêtôm taugeŋ. Aŋela gêjam dôŋ malac tau kêtôm dôŋ 12,000, ŋalêsiŋŋa to ŋatakôcŋa ma ŋabaliŋ kêpi lôlôcŋa kêtôm taugeŋ. 17 Eŋ gêjam dôŋ malac ŋatuŋbôm amboac tonaŋgeŋ. Ma tuŋbôm tau baliŋ kêtôm dôŋ 144 kêtôm ŋamalacnêŋ dôŋ, taŋ aŋela kêkôc naŋ. 18 Tuŋbôm tau êsêac sêboa ŋa pocawa jaspaŋageŋ, ma malac tau sêkwê ŋa goldanô e ŋakêŋkêŋ laŋgwageŋ kêtôm glas. 19 Êsêac sêjam gêlôŋ malac ŋatuŋbôm ŋanombaŋ ŋa pocawa tokaiŋtokaiŋ. Nombaŋ ŋamataŋa jaspa, ma kêtu luagêcŋa sapir, ma kêtu têlêacŋa agat, kêtu aclêŋa emeral, 20 kêtu lemeŋ teŋŋa sardoni, kêtu 6ŋa konelian, kêtu 7ŋa krisolit, kêtu 8ŋa beril, kêtu 9ŋa topa, kêtu 10ŋa krisopra, kêtu 11ŋa hiasint ma kêtu 12ŋa ameti. 21 Ma sêkêŋ kêkôm tageŋ-tageŋ kêtu sacgêdô 12 ŋakatam. Ma malac ŋaintêna tau goldanô ŋakêŋkêŋ kêtôm glas e ŋawa laŋgwageŋ.

22 Ma galic lôm dabuŋ teŋ kêkô malac tau atom, gebe Apômtau Anôtô ŋaniniŋ Ŋatau agêc Domba têtu ŋalôm dabuŋ. 23 Ma malac tau kêpô lêna oc to ajôŋ gebe êpôŋa nec atom, gebe Anôtônê ŋawasi kêpô malac tau ma Domba kêtu ŋalamp. 24 Lau totoŋ-totoŋ oc sêsêlêŋ sêmoa ŋawê tonaŋ ŋalêlôm. Ma kiŋ nomŋa oc sejoŋ nêŋ waba toŋawasi sêsô malac tau sêna. 25 Êsêac sênsaŋ ŋakatam auc atomanô, ŋawê oc ênêc ŋapaŋ, eleŋ to êmbêc oc naêsa gamêŋ tonaŋ atom. 26 Ma êsêac oc sejoŋ lau totoŋ-totoŋ nêŋ waba to awa towae sêsô malac tau sêna. 27 Gêŋ ŋatêmui teŋ oc êsô malac tonaŋ êna atom, ma ŋac sec to dansaŋtêna teŋ êsô êna atom amboac tonaŋgeŋ. Lau taŋ teto nêŋ ŋaê kêsêp Dombanê buku mata jaliŋa naŋgeŋ, sêsô sêna. [a] ŋawasi kaiŋ teŋ ma ŋatalô tokaiŋ-tokaiŋ. Ŋagêdô kokoc, ŋagêdô matac-matac to majaŋ-majaŋ. Bîn pocawaaŋa gêwa ŋa gebe ŋawasl oc ênam Jerusalem wakuc auc samucgeŋ. Malac ŋagêŋlêlôm taŋ ênêc awê to gêŋ, taŋ êsiŋ tau naŋ ŋawasigeŋ.

<- GEOC LASÊ 20GEOC LASÊ 22 ->