65
Daŋge kêtu Anôtônê moasiŋ ŋalêlômŋa
1 O Anôtô, lau aweŋ êôc aôm aŋga Sionmaŋ.
Ma sêŋgôm biŋ, taŋ sêjac mata gêdêŋ aôm naŋ, ŋanô êsa.
2 Aôm kôkêŋ taŋam mec,
amboac tonaŋ ŋamalac samob dêndêŋ aôm sêwac
3 êtu nêŋ geo ŋatoŋŋa. Aêacma geo embe êlêlêc aêac su,
go ôsuc ôkwi.
4 Aê aoc êôc ŋac, taŋ aôm kôjaliŋ eŋ sa gebe êtu gasuc aôm
wacêmoa nêm malacluŋ naŋ,
gebe aômnêm andu to lôm ŋagêŋ ŋajam,
tec oc êôc aêac tôŋ.
5 O Anôtô, aêacma kêsiwaga, aôm kôkêŋ taŋam aêac
to gôjam aêac sa ŋa gêŋtalô.
Lau aŋga nom ŋamadiŋ samob to êsêac, taŋ sêŋgôŋ gwêcm aŋga jaêcsêga naŋ,
sêkêŋ mateŋ aômgeŋ.
6 Aôm ŋactêkwa, taŋ kôjandiŋ ŋaclai kêtu nêm ômbiŋkap naŋ,
tec kôkwê lôc tolôc sa kêkô.
7 Aôm gôê gwêc kêtu malô to gôgôm ŋadembom ŋatip kêsa
ma gôgôm tenteŋlatu samob nêŋ wambaŋ kêtu malô.
8 Gôgôm e lau, taŋ sêŋgôŋ nom ŋamadiŋ jaêcsêga naŋ,
têtêc tauŋ kêtu nêm gêŋtalôŋa.
Aôm gôgôm lau gamêŋ oc kêpi to oc kêsêpŋa
sêjam lasê toôndugeŋ.
9 Aôm kokeleŋ nom ma kôsanem ŋa bu.
Aôm kômoasiŋ nom ŋanôgeŋ.
Aôm Anôtô kôkêŋ nêm bu kêsuŋ e ŋalap-lap laŋgwageŋ.
Aôm kômasaŋ nom amboac tonaŋ, tec kôkêŋ launêŋ gêŋ kômŋa kêpi ŋajamgeŋ.
10 Aôm kôsanem nom ŋawampôm e ŋapep sawa to kôlênsim nom e kêtu palê.
Aôm kôkêŋ kom kêmalôm nom ma gôjam mec gêŋ e kêpi ŋajam.
11 Aôm gôjac dabiŋ jala ŋa nêm moasiŋ totau-totau
ma waŋam ŋalêsi gênôm gamêŋ gêjam auc.
12 Bôcnêŋ gamêŋ sêniŋ gêŋŋa ŋamêdôb ŋajamgeŋ ŋapaŋ.
Ma gamêŋ ŋamatu gêbuc tau sa e têtac kêsa laŋgwageŋ.
13 Bôc sêjam oba auc amboac oba kêsô ŋakwê
ma gaboaŋ kêkwa tau auc ŋa molauŋ.
Êsêac sêjam lasê
to sêjam wê sêwiŋ tauŋ totêntac ŋajamgeŋ.