PESALEM 52

Anôtônê mêtôc to moasiŋ

1 O ŋaclaisêga aôm, kotoc taôm sa nêm secŋa kêtu ageŋŋa.

Anôtônê têtac gêwiŋ teŋgeŋŋa gêc gedeŋ tôŋgeŋ.

2 Aôm kalomtêna, taêm gêjam imbêlam ŋabiŋgêga

e wai-waiôma.

3 Aôm têmtac gêwiŋ sec kêlêlêc ŋajam su

ma têmtac gêwiŋ biŋ dansaŋ kêlêlêc biŋŋanô su.

4 Aôm imbêlam dansaŋ.

Têmtac gêwiŋ biŋ alôb-alôb ŋaôma.

5 Amboac tonaŋ Anôtô oc enseŋ aôm su ônaŋa samucgeŋ. Eŋ oc êtiŋ to enseŋ aôm su aŋga nêm beclêlôm

ma oc êkip aôm sa aŋga lau mateŋ jali nêŋ gamêŋ.

6 Lau gêdêŋ oc sêlic e têtêc tauŋ

ma sêômac aôm gebe

7 “Kec, alic ŋac tônê kêkêŋ Anôtô kêtu nê lamu atom.

Kêkêŋ gêwiŋ nê awa taêsam ma gêjam kauc gebe sec êpuc eŋ tôŋ.”

8 Ma aê tec katôm katêkwi ŋawawa ŋajam

kakô Anôtônê andu.

Aê taêc kêka Anôtônê têtac gêwiŋ teŋgeŋŋa

gedeŋ tôŋgeŋ.

9 Aê oc janam daŋge aôm endeŋ tôŋgeŋ êtu nêm gêŋ, taŋ gôgôm naŋŋa

ma jatoc nêm ŋaê sa êndêŋ lau mansaŋ sêŋô gebe aôm gabêjam.

* mêŋkêtêku biŋ gêdêŋ Saul gebe Dawid kêsô Abimeleknê andu gaja naŋ.