LUKA 14

Jesu gêgôm ŋac gêmac ôli ŋajam kêsa

1 Gêdêŋ sabat teŋ Jesu kêsô Parisainêŋ kasêga teŋ nê andu gaja gebe sêniŋ geŋ ma lau dêdib eŋ sêmoa. 2 Sêmoa e ŋac ôli kêsuŋ-kêsuŋ teŋ gêdêŋ Jesu gêja. 3 Tec Jesu gêôc awa sa ma kêsôm gêdêŋ biŋsutau to Parisai gebe “Embe daŋgôm gêmac ŋajam êsa êndêŋ sabat, oc eso biŋsu me masi.” 4 Mago êsêac sêjam tauŋ tôŋ. Tec Jesu kêkam ŋac tau e gêgôm eŋ ôli ŋajam kêsa ma kêkêŋ eŋ gêc gêja. 5 Go kêsôm gêdêŋ êsêac gebe “Amacnêm asa, embe latu me bôc embeŋ êsêp sê tobu êndêŋ sabat ma oc ê eŋ sa sebeŋ êndêŋ sabat atom me.” 6 Ma êsêac têtôm gebe sêjô biŋ tonaŋ atom.

Biŋ tamoasiŋ lau to takôniŋ tauŋŋa

7 Jesu gêlic gebe ŋacleŋ sêgôm mocsac gebe sêŋgôŋ ŋamataŋageŋ, tec kêsôm biŋgôliŋ teŋ gêdêŋ êsêac gebe 8 “Ŋac teŋ embe êkalem aôm gebe ôniŋ awê to ŋac ŋamoasiŋ ôwiŋ, naŋ ôŋgôŋ ŋamata atom, gebe moae ŋatau kêkalem ŋac towae teŋ êlêlêc aôm su êwiŋ êmêŋ, 9 go ŋac, taŋ kêkalem amagêc wacêsôm êndêŋ aôm gebe ‘Ôwi malam siŋ êndêŋ ŋac tonecmaŋ.’ Ma aôm oc ôndi tomajamgeŋ naôŋgôŋ ŋamuŋa. 10 Embe sêkalem aôm, naŋ naôŋgôŋ ŋamuŋa acgom. Go ŋac, taŋ kêkalem aôm naŋ, embe êmêŋ, oc êsôm êndêŋ aôm gebe ‘Ŋoc ŋac, ôsa mêŋôŋgôŋ ŋamataŋa.’ Amboac tonaŋ oc etoc aôm sa êndêŋ lau samob, taŋ sêŋgôŋ sêwiŋ aôm naŋ sêlic. 11 Teŋ embe etoc tau sa, naŋ Anôtô oc êkôniŋ eŋ, ma teŋ embe êkôniŋ tau, naŋ Anôtô oc etoc eŋ sa.”

12 Go Jesu kêsôm gêdêŋ ŋac, taŋ kêkalem eŋ naŋ gebe “Embe ono gêŋ ocsalô me êtulaŋa, naŋ ôkalem nêm lau to lasimi ma tawaŋ to lau tolêlôm, taŋ acnêm sackapoagêdô gêdêŋ tau naŋ, gebe moae sêkalem aôm ŋagêjôŋa naŋgeŋ atom. 13 Embe ono moasiŋ, naŋ ôkalem lau ŋalêlôm sawa to puliŋ ma magiŋ kêsu to mateŋpecgeŋ, 14 go aê aoc êôc aôm, gebe êsêac tonaŋ oc sêkalem aôm ŋagêjôŋa atom, ma êndêŋ taŋ lau gêdêŋ sêndi sa naŋ, Anôtô oc êkêŋ ŋagêjô êndêŋ aôm.”

Biŋgôliŋ moasiŋ kapôêŋŋa

(Mat 22:1-10)

15 Ŋacleŋnêŋ teŋ gêŋô biŋ tonaŋ ma kêsôm gêdêŋ Jesu gebe “Aê aoc êôc ŋac, taŋ oc êniŋ gêŋ aŋga Anôtônê gamêŋ naŋ.” 16 Tec Jesu kêsôm gêdêŋ eŋ gebe “Ŋac teŋ gêgôm moasiŋ kapôêŋ ma kêkêŋ jaeŋ lau taêsam. 17 Kêdabiŋ gebe sêniŋ ŋamoasiŋ tau ma kêsakiŋ nê sakiŋwaga teŋ gêja gebe naêsôm êndêŋ lau, taŋ jaeŋ gêdêŋ êsêac kwanaŋgeŋ naŋ gebe ‘Amêŋ, gebe gajac ŋabiŋ gêŋ gêbacnê.’ 18 Ma êsêac samob nêŋ ŋalêlôm kêtôm taugeŋ tec seseŋ tauŋ su. Ŋac ŋamataŋa kêsôm gêdêŋ eŋ gebe ‘Aê gajam ôli kôm teŋ, tec najanac kêsi acgom. Amboac tonaŋ jateŋ aôm gebe naômansaŋ ŋoc biŋ.’ 19 Ma ŋac teŋ kêsôm gebe ‘Aê gajam ôli bôc 10, tec najanac ŋoc gêŋ kêsi. Aê jateŋ aôm gebe naômansaŋ ŋoc biŋ.’ 20 Go teŋ kêsôm gebe ‘Aê galoc gajam awê sa, tec katôm gebe jawac atom.’ 21 Sakiŋwaga tonaŋ gêmu jagêjac miŋ biŋ samob tonaŋ ŋai gêdêŋ nê ŋatau. Teic andu ŋatau têtac ŋandaŋ kêsa ma kêsôm gêdêŋ nê sakiŋwaga tonaŋ gebe ‘Sebeŋ ôna ma ojoŋ lau ŋalêlôm sawa to puliŋ ma mateŋpec to magiŋ kêsu sa aŋga malac ŋaintêna sauŋ to kapôêŋ mêŋsêsô gamêŋ tonec.’ 22 Ma sakiŋwaga kêsôm gebe ‘Apômtau, biŋ taŋ kôjatu aê gebe jaŋgômŋa naŋ gagôm su, mago andu gêlôc atom tageŋ.’ 23 Tec ŋatau kêsôm gêdêŋ sakiŋwaga tau gebe ‘Ôsa kôm ŋaintêna to tuŋmagê ôna ma ôkac lau gebe sêsô sêmêŋ e ŋoc: andu êlôc.’ 24 Ma aê jasôm êndêŋ amac gebe Lau taŋ sêŋô aêŋoc jaeŋ su naŋ, nêŋ teŋ oc êsac aêŋoc moasiŋ ŋagec atom.”

Biŋ tasap Jesu tôŋŋa

(Mat 10:37-38)

25 Lau taêsam sêwiŋ Jesu sêja, tec kêsa tau ôkwi ma kêsôm gêdêŋ êsêac gebe 26 “Ŋac teŋ embe êndêŋ aê êmêŋ ma têtac endec tama agêc têna ma nê awê to ŋapalê ma lasiio to ŋac ma ênac kapoac tau atom, naŋ oc êtôm gebe êtu ŋoc ŋacseŋom atom. 27 Ŋac teŋ embe êôc nê kakesotau êndaŋguc aê atom, naŋ oc êtôm gebe êtu ŋoc ŋacseŋom atom. 28 Amacnêm teŋ embe taê ênam gebe êkwê lôm teŋ, go êŋgôŋ sic ma êsa waba andu tauŋa ŋaôli samob sa êmuŋ acgom e êjala gebe nê awa kêtôm gebe ênac dabiŋ kôm tau. 29 Eŋ embe êŋgôm amboac tonaŋ atom, go êu demboŋ ênsac ŋaômageŋ ma êtôm gebe ênac dabiŋ andu atom. Ma lau samob, taŋ sêlic naŋ, oc sêsu eŋ susu 30 ma sêsôm gebe ‘Ŋac tônê kêkwê lôm gêjac mgeŋ, mago kêtom gebe ênac dabiŋ atom.’ 31 Ma kiŋ teŋ, taŋ nê siŋwaga 10,000 embe ênac siŋ êndêŋ kiŋ teŋ, taŋ nê siŋwaga 20,000 naŋ êŋgôŋ sic ma taê ênam tau ŋapep êmuŋ acgom e êjala gebe nê ŋaclai kêtôm gebe êku ŋacjo tulu me masi. 32 Embe êtôm atom, go êsakiŋ lau-sê-wamawaga nasêpuc ŋacjo tôŋ jaêcgeŋ ma teteŋ êtu wamaŋa. 33 Amboac tonaŋ amacnêm ŋac teŋ embe êwi nê gêŋ samob siŋ samucgeŋ atom, oc êtôm gebe êtu ŋoc ŋacseŋom atom.

Gwêc taŋ kêtu sec

(Mat 5:13; Mar 9:50)

34 “Gwêc tonaŋ gêŋ ŋajam, mago embe ŋamakic ênaŋa, oc daŋgôm ŋamakic êsa êtiam amboac ondoc. 35 Oc êtôm gebe tapalip êsêp kôm to êpi lênduc êna atom, tambaliŋ siŋ ŋaômageŋ. Ŋac teŋ nê taŋasuŋ êŋôŋa embe ênêc, naŋ êŋômaŋ.”

<- LUKA 13 LUKA 15 ->