1 Lau samob selom bu Jordan jasêpi su acgom, go Apômtau kêsôm gêdêŋ Josua gebe 2 “Ôjaliŋ lau 12 sa aŋga launêŋ, ŋac tageŋ-tageŋ êtôm gôlôacmôkêgeŋ, 3 ma ôjatu êsêac gebe ‘Akôc poc 12 aŋga Jordan ŋaluŋ tonec, akôc aŋga gamêŋ, taŋ dabuŋwaga eŋtapa sêka naŋ, ma akôc poc tau amêŋ bumakeŋ ma atoc poc tau êkô gamêŋ, taŋ êmbêc anêc naŋ.’ ” 4 Go Josua kêkalem lau 12 tau aŋga lau Israel nêŋ, taŋ kêjaliŋ sa naŋ, ŋac tageŋ-tageŋ kêtôm gôlôacmôkêgeŋ. 5 Ma Josua kêsôm gêdêŋ êsêac gebe “Asêlêŋ naamuŋ Apômtau, amacnêm Anôtô, nê katapa êsêp bu Jordan ŋaluŋgeŋ ma aôc poc tageŋ-tageŋ êtômgeŋ ma poc tau ŋanamba êtôm Israelnêŋ gôlôacmôkê. 6 Poc tonaŋ êtu ŋabelo êkô amac ŋalêlôm. Ma embe nêm ŋapalêo to ŋac têtu kênac amac êtu ŋamu gebe ‘Poc tonec gebe êwa asageŋ sa êndêŋ amac,’ 7 go anac miŋ êndêŋ êsêac gebe Bu Jordan gêlêc sa ma kêkêŋ ŋasawa gêdêŋ Apômtaunê katapa poacŋa. Gêdêŋ taŋ katapa tau gelom Jordan naŋ, ŋabu gêlêc sa. Tec poc tonec êtu ŋabelo teŋgeŋŋa êndêŋ lau Israel.”

8 Ma lau tau sêgôm biŋ, taŋ Josua kêjatu naŋ, ŋanô kêsa ma sêkôc poc 12 aŋga Jordan ŋaluŋgeŋ kêtôm lau Israel nêŋ gôlôacmôkênêŋ toŋ, kêtôm taŋ Apômtau kêsôm gêdêŋ Josua naŋ. Ma êsêac sêôc poc tau selom jasêpi gamêŋ, taŋ sebe sênêc naŋ, ma tetoc poc tau sêŋgôŋ tonaŋ. 9 Ma Josua gêboa poc 12 sa kêkô Jordan ŋaluŋgeŋ aŋga gamêŋ, taŋ dabuŋwaga sêbalaŋ Apômtaunê katapa ma eŋtapa sêka naŋ, ma poc tau kêkô tônê e mêŋgêdêŋ galoc. 10 Ma Apômtau kêjatu Josua gebe êsôm biŋ, taŋ Mose kêjatu Josua naŋ, êndêŋ lau Israel. Ma dabuŋwaga, taŋ sêbalaŋ katapa naŋ, gacgeŋ sêkô Jordan ŋaluŋgeŋ e biŋ samob, taŋ Apômtau kêjatu Josua naŋ, ŋanô kêsa.

Ma lau selom sêkac tauŋgeŋ sêja bumakeŋ. 11 Ma gêdêŋ taŋ lau samob selom jasêpi ŋamakeŋ su naŋ, Apômtaunê katapa to dabuŋwaga selom amboac tonaŋgeŋ sêmuŋ lau. 12 Rubennê wakuc ma Gadnê wakuc to Manasenê gôlôac ŋamakeŋ selom tolaukasapgeŋ sêmuŋ lau Israel kêtôm Mose kêjatu êsêac. 13 Siŋwaga tolaukasap amboac 40,000 selom jasêpi Jeriko ŋagamêŋ gaboaŋŋa sêja. Êsêac sêmasaŋ tauŋ gebe sênac siŋ sêmoa Apômtau laŋônêmŋa. 14 Gêdêŋ bêc tonaŋ Apômtau ketoc Josua sa aŋga lau Israel laŋôŋnêm ŋa ma êsêac têtêc eŋ kêtôm têm, taŋ gêmoa mata jali naŋ, kêtôm têtêc Mose.

15 Ma Apômtau kêsôm gêdêŋ Josua gebe 16 “Ôjatu dabuŋwaga, taŋ sêbalaŋ katapa poacŋa naŋ, gebe sêpi aŋga Jordan sêmêŋ.” 17 Amboac tonaŋ Josua kêjatu dabuŋwaga gebe “Api aŋga Jordan amêŋ.” 18 Ma gêdêŋ taŋ dabuŋwaga, taŋ sêbalaŋ Apômtaunê katapa poacŋa naŋ, sêpi aŋga Jordan ŋaluŋ su ma êsêac eŋtapa sêka gamêŋ ŋakeleŋ naŋ, bu Jordan gêjô tau mala e kêsalê butali auc kêtiam kêtôm gêmuŋŋa.

19 Lau mêŋsêpi aŋga Jordan gêdêŋ ajôŋ ŋamataŋa ŋabêc kêtu 10 ma sê nêŋ bec sêŋgôŋ Gilgal, taŋ gêc malac Jeriko ŋagamêŋ oc kêpiŋa naŋ. 20 Ma Josua gêboa poc 12, taŋ êsêac sêkôc aŋga Jordan naŋ, sa aŋga Gilgal. 21 Ma eŋ kêsôm gêdêŋ lau Israel gebe “Amacnêm ŋapalêo to ŋac embe têtu kênac tameŋi êtu ŋamu gebe ‘Poc tonec ŋam amboac ondoc,’ 22 go awa sa êndêŋ êsêac ma asôm gebe ‘Lau Israel selom bu Jordan tonec sêmoa gamêŋ keleŋgeŋ,’ 23 gebe Apômtau, amacnêm Anôtô, gêgôm bu Jordan kêpa kêtu amacŋa e alom mêŋapi ŋamakeŋ kêtôm gêgôm gêdêŋ Gwêckoc, taŋ gêgôm kêpa kêtu aêacŋa e alom mêŋapi ŋamakeŋ. 24 Eŋ gêgôm gêŋ tonaŋ, gebe lau tomôkê-tomôkê nomŋa sêjala, gebe Apômtau lêma ŋajaŋa ma gebe amac atêc Apômtau, amacnêm Anôtô, endeŋ tôŋgeŋ.”

<- JOSUA 3JOSUA 5 ->