1 “Gêdêŋ taŋ Israel ŋapalêgeŋ naŋ, aê têtac gêwiŋ eŋ ma gamôêc ŋoc latuc aŋga Aiguptu gêmêŋ. 2 Aê gamôêc-gamôêc eŋ, mago eŋ gaja ec-gêja ec ma kêkêŋ da gêdêŋ Bal ma da ŋamalu gêdêŋ gwam. 3 Aê tec kadôŋ Epraim gebe êsêlêŋ. Ma kasip eŋ sa. Mago êsêac sêjala gebe aê gagôm êsêac ôliŋ ŋajam kêsa naŋ atom. 4 Aê gajam gôliŋ êsêac ŋa gôliŋ taê walôŋa to gaê êsêac ŋa lêpoa têtac gêwiŋŋa. Aê gajam êsêac sa gebe kioŋ, taŋ gêsac êsêac gêsuŋtêkwa naŋ, êkôniŋ êsêac tôŋ atom ma gawec ma galôm êsêac.

5 “Êsêac sedec gebe sêmu dêndêŋ aê sêmêŋ, amboac tonaŋ oc sêmu sêna Aiguptu êtiam, ma Asuria ênam gôliŋ êsêac. 6 Siŋ oc êsa aŋga nêŋ malac ma enseŋ nêŋ malac ŋakatam ŋawalô ma êndaŋgôŋ êsêac su aŋga nêŋ malac ŋajaŋa ŋalêlôm. 7 Aêŋoc lau sebe sêkac tauŋ su aŋga aêŋoc sêmoa, amboac tonaŋ kioŋ ênsac êsêac gêsuŋtêkwa ma teŋ êôc su atomanô.

8 “O Epraim, aê jawi aôm siŋ amboac ondoc. O Israel, aê jakêŋ aôm êndêŋ lau tenteŋlatu amboac ondoc. Aê jaŋgôm gêŋ, taŋ gagôm gêdêŋ Adma naŋ, êndêŋ aôm amboac ondoc. Aê jaŋgôm gêŋ, taŋ gagôm gêdêŋ Seboim naŋ, êndêŋ aôm amboac ondoc. Aêŋoc ŋalêlôm kêkac tau ôkwi ma taêc walô aôm kêlêlêc su. 9 Aê oc jaŋgôm ŋoc têtac ŋandaŋ kapôêŋ ŋanô êsa atom. Aê gabe janseŋ Epraim su êtiam atom. Gebe aê Anôtô, aê ŋamalac atom. Aê ŋac dabuŋ, taŋ gamoa aôm ŋalêlôm naŋ, ma aê jawac êtu janseŋ suŋa atom.”