1 O amac Galatawaga, amac lau kauc gêbôc. Aê gawa Jesu Kilisi sa gêdêŋ amac e kêtôm amac taôm alic eŋ geŋkaleŋ kakesotau. Ma asa gêwê amacnêm kauc ôkwi. 2 Aê gabe jaŋô biŋ tageŋ tonec aŋga amacnêm gebe Ŋalau Dêbuŋ gêdêŋ amac gêwac nec ŋam kêsêp amac ajam kôm, taŋ biŋsu kêjatu naŋ, e ŋanô kêsa me aŋô ŋawae ŋajam e akêŋ gêwiŋgeŋ. 3 Amac kauc gêbôc amboac tonaŋ me. Amac ajac m nêm lêŋ toŊalau Dabuŋgeŋ ma galoc abe anac dabiŋ ŋa taôm nêm ôlimwalô me. 4 Amac atap moasiŋ tonaŋ ŋai sa ŋaômageŋ me. Moae amboac tonaŋ nec. 5 Anôtô taŋ kêkêŋ Ŋalau gêdêŋ amac to gêgôm gêŋsêga kapôêŋ aŋga amacnêm naŋ, oc gêgôm kêtu amac ajam kôm, taŋ biŋsu kêjatu naŋ, e ŋanô kêsaŋa me kêtu aŋô ŋawae ŋajam e akêŋ gêwiŋŋa.

6 Biŋ tonaŋ kêtôm teto gêc gebe “Abraham kêkêŋ gêwiŋ Anôtô, tec gêlic eŋ ŋac gêdêŋ.” 7 Amboac tonaŋ ajala acgom gebe lau, taŋ sêkêŋ gêwiŋ naŋ, têtu Abrahamnê latui ŋanô. 8 Biŋ taŋ teto gêc naŋ, gêwa sa kwanaŋgeŋ gebe Anôtô êmansaŋ lau samuc nêŋ biŋ e êlic êsêac têtu lau gêdêŋ êtu sêkêŋ êwiŋŋa, tec ŋawae ŋajam gêdêŋ Abraham kwanaŋgeŋ gebe “Gôlôac nomŋa samob têtap mec ŋamoasiŋ sa êtu aômŋa.” 9 Amboac tonaŋ lau, taŋ sêkêŋ gêwiŋ naŋ, têtap mec ŋamoasiŋ sa sêwiŋ Abraham, taŋ kêkêŋ gêwiŋgeŋ naŋ.

10 Samob taŋ taêŋ kêka kôm, taŋ biŋsu kêjatu naŋ, biŋsu oc êpuc boa êsêac gebe teto gêc gebe “Biŋsu êpuc boa lau pebeŋ, naŋ sêŋgôm biŋ, taŋ teto gêc biŋsu ŋabuku naŋ, samob ŋanô êsa tomalageŋ atom.” 11 Biŋ tonec gêc awê gebe biŋsu kêtôm gebe êmansaŋ ŋamalacnêŋ biŋ e Anôtô êlic êsêac têtu lau gêdêŋ nec atom, gebe teto gêc gebe “Ŋac taŋ Anôtô kêmasaŋ ênê biŋ e gêlic eŋ kêtu ŋac gêdêŋ naŋ, êŋgôŋ mata jali êtu kêkêŋ gêwiŋŋa.” 12 Mago biŋsu gêc kêtu takêŋ êwiŋŋa atom, gêc kêtu daŋgôm ŋanô êsaŋa amboac teto gêc gebe “Ŋac teŋ embe êmansaŋ biŋsu tomalageŋ, naŋgo êŋgôŋ mata jali.”

13 Biŋsu kêpuc boa aêac, mago Kilisi kêsi aêac su. Eŋ kêkêŋ tau kêsô biŋ kêpuc boaŋa ŋalabu gêjô aêac su kêtôm teto gêc gebe “Biŋsu kêpuc boa lau samob, taŋ seŋkaleŋ ka naŋ.” 14 Anôtô gêgôm gêŋ tonaŋ ma kêkêŋ Kilisi Jesu gebe mec ŋamoasiŋ, taŋ Anôtô gêjac mata gêdêŋ Abraham naŋ, elom lau samuc gebe aêac takôc Ŋalau, taŋ Anôtô gêjac mata naŋ, sa êtu takêŋ gêwiŋŋa.

15 Lasitêwaac, aê gabe janam dôŋ ŋoc biŋ êpi ŋamalacnêŋ mêtê acgom. Ŋac teŋ embe êmansaŋ nê awalênsêm êtu taŋ su, go Ŋac teŋ êtôm gebe enseŋ su me ênac têku nê biŋ teŋ atom. 16 Ma Anôtô gêjac mata biŋ gêdêŋ Abraham agêc nê wakuc. Eŋ kêsom gebe “Aôm to nêm wakuc” nec atom. Embe êsôm amboac tonaŋ, go êwa ŋa gebe ênê wakuc taêsam. Mago kêsôm gebe “Agêc nêm wakuc,” tec gêwa ŋa gebe ênê wakuc tageŋ. Ênê wakuc tau Kilisi. 17 Aê gabe jasôm biŋ amboac tonec gebe Anôtô kêmasaŋ awalênsêm kwanaŋgeŋ e jala 430 gêjaŋa acgom, go kêkêŋ biŋsu kêdaguc. Mago biŋsu tau êtôm gebe enseŋ awalênsêm su to ênam biŋ, taŋ Anôtô gêjac mata naŋ, ôkwi atom. 18 Gêŋlênsêm taŋ Anôtô gebe êkêŋ naŋ, embe ŋam êsêp biŋsu, go biŋ, taŋ Anôtô gêjac mata naŋ, ŋanô masi. Mago Abraham kêtap moasiŋ tonaŋ sa kêtu Anôtô gêjac mata gêŋ tau gêdêŋ eŋŋa.

19 Ma biŋsu tau ŋam amboac ondoc. Biŋsu tau ŋam gebe ŋamalac sêŋgêlisêŋgêli sêmoa e Abrahamnê wakuc, taŋ Anôtô gêjac mata biŋ kêpi eŋ naŋ, mêŋêsa acgom. Aŋela sêkêŋ biŋsu tau kêsêp sêliŋwaga teŋ lêma. 20 Sêliŋwaganê kôm gêjac ŋac tageŋ ŋawae atom. Mago Anôtô eŋ ŋac tageŋ.

21 Ma biŋsu tonaŋ oc enseŋ biŋ, taŋ Anôtô gêjac mata naŋ su me. Masianô. Biŋsu teŋ embe ênêc, taŋ êtôm gebe êkêŋ aêac daŋgôŋ mateŋ jali naŋ, go biŋsu tonaŋ oc êtôm gebe êmansaŋ aêacnêŋ biŋ e Anôtô êlic aêac tatu lau gêdêŋ amboac tonaŋ. 22 Mago Anôtônê biŋ gêwa sa gebe sec kêkôniŋ gêŋ samob tôŋ, gebe lau, taŋ sêkêŋ gêwiŋ Jesu Kilisi naŋgeŋ, têtap moasiŋ, taŋ Anôtô gêjac mata naŋ sa.

23 Gêdêŋ taŋ biŋ takêŋ gêwiŋŋa mêŋkêsa atomgeŋ naŋ, biŋsu tau kêgamiŋ aêac daŋgôŋ kapoacwalô, gebe êkôniŋ aêac tôŋ e êndêŋ têm Anôtô eoc biŋ takêŋ gêwiŋŋa lasê acgom. 24 Amboac tonaŋ biŋsu kêtu aêacnêŋ jaomwaga, taŋ gêwê aêac dêdêŋ Kilisi taja, gebe Anôtô êmansaŋ aêacnêŋ biŋ e êlic aêac tatu lau gêdêŋ êtu aêac takêŋ gêwiŋŋa. 25 Galoc biŋ takêŋ gêwiŋŋa mêŋkêsa, tec aêac tasô jaomwaga ŋalabu kêtiam atom.

26 Amac samob atu Anôtô latui kêtu akêŋ gêwiŋ Kilisi Jesuŋa. 27 Amac samob, taŋ aliŋ saŋgu su naŋ, Kilisi gêbiŋ amac tôŋ tamiŋ eŋ, tec asô Kilisi kêtu nêm ŋakwêgac. 28 Talic lau ŋagêdô amboac Juda ma ŋagêdô amboac lau samuc atom. Talic ŋagêdô amboac gêŋôma ma ŋagêdô amboac lau sêmoa nêŋ lêtêgeŋŋa atom. Talic ŋagêdô amboac ŋacwaga ma ŋagêdô amboac lauo atom. Amac samob, taŋ Kilisi Jesu gêbiŋ amac tôŋ naŋ, atu ŋanô tageŋ. 29 Embe Kilisinê gêŋ amac, oc atu Abrahamnê wakuc ma awê kaiŋ gêŋlênsêm êtôm Anôtô gêjac mata.

<- GALATA 2GALATA 4 ->