1 Go Apômtau kêsôm gêdêŋ Mose gebe” Ôndi, ôwi gamêŋ tonec siŋ, aôm to lau, taŋ gôwê êsêac sêsa aŋga gamêŋ Aiguptuŋa sêmêŋ naŋ. Asêlêŋ e aô lasê gamêŋ, taŋ katôc lemoc gêdêŋ Abraham agêc Isak ma Jakob ma kasôm gebe ‘Aê gabe jakêŋ nom tonec êndêŋ nêm wakuc.’ 2 Aê gabe jasakiŋ ŋoc aŋela teŋ êsêlêŋ êmuŋ aôm ma jajanda lau Kanaan to Amor ma lau Het to Peres ma lau Hib to Jebus gebe sêwi gamêŋ tau siŋ. 3 Api gamêŋ, taŋ su to lêp keseleŋ naŋ. Mago aê tauc japi jawiŋ amac atom. Embe jawiŋ amac, oc moae janseŋ amac su aŋga intêna anaŋa, gebe amac lau gêsômtêkwa ŋatoŋ.”
4 Gêdêŋ taŋ lau sêŋô biŋ ŋawapac tonaŋ naŋ, êsêac têtaŋ lasê ma ŋac teŋ gêjam gêlôŋ tau atom, 5 gebe Apômtau kêsôm gêdêŋ Mose gebe “Ôsôm êndêŋ lau Israel gebe ‘Amac lau gêsômtêkwa ŋatoŋ. Aê embe japi jawiŋ amac êndêŋ ŋasawa dambêgeŋ oc janac amac eb tageŋ anaŋa. Amboac tonaŋ akôc nêm gêlôŋ su, ec jajala gebe aê jaŋgôm amac amboac ondoc.’ ” 6 Amboac tonaŋ lau Israel sêkôc nêŋ gêlôŋ su aŋga lôc Horeb ma sêsêlêŋ ŋaômageŋ.
Becobo sêkac saŋa
7 Ma Mose kêkôc becobo elêmê ma gê bec tau kêkô jaêc gamêŋ, taŋ bec ŋagêdô kêkô naŋ. Eŋ kêsam becobo tau gebe Becobo takac saŋa. Lau teŋ embe sensom Apômtau, go sêsa sêna becobo sêkac tauŋ saŋa, taŋ kêkô jaêc gamêŋ, taŋ bec ŋagêdô kêkô naŋ. 8 Elêmê embe Mose êsa êndêŋ becobo tau êna, go lau samob sêndi sa sêkô nêŋ bec ŋakatam ma mateŋ êndiŋ Mose ŋapaŋ e êsô becobo ŋalêlôm êna. 9 Mose embe êsô becobo ŋalêlôm êna su, go tao majaŋ êsêp êmêŋ êkô becobo tau ŋasacgêdô. Ma Apômtau ênam biŋgalôm êwiŋ Mose. 10 Lau embe sêlic tao majaŋ êsêp êmêŋ êkô becobo tau ŋasacgêdô, go samob sêndi ma teteŋ mec êndêŋ Apômtau aŋga nêŋ bec ŋasacgêdô êndêŋ-êndêŋgeŋ. 11 Amboac tonaŋ Apômtau gêjam biŋgalôm gêwiŋ Mose agêc laŋôŋanô gêdêŋ tauŋ amboac ŋac teŋ, taŋ gêjam biŋgalôm gêwiŋ nê ŋac ôli andaŋ eŋŋa. Ma gêdêŋ taŋ Mose gêmu gêja gamêŋ, taŋ becobo ŋagêdô kêkô naŋ, nê sakiŋwaga gêwi becobo tau siŋ atom. Ŋac wakuc tau Nun latu Josua.
Apômtau gêjac mata gebe êmoa êwiŋ lau
12 Go Mose kêsôm gêdêŋ Apômtau gebe “Ôlic acgom, aôm taôm kôsôm gêdêŋ aê gebe ‘Ôwê lau tonec sêpi sêna.’ Mago aôm kôsam ŋac, taŋ gobe ôsakiŋ êwiŋ aê naŋ, nê ŋaê lasê gêdêŋ aê atom. Mago aôm kôsôm gebe ‘Aê kajala aômnêm ŋaê ma aôm gôjac matocanô ŋajam. 13 Amboac tonaŋ galoc aê jateŋ aôm gebe aê embe janac matamanô ŋajam, go ôtôc nêm intêna êndêŋ aê e jajala aôm êtu tôŋ ma janac matamanô ŋajam. Ma taêm ênam tonec êwiŋ gebe lau-m tonec têtu aômnêm laugac.” 14 Ma Apômtau kêsôm gebe “Aê tauc oc jasêlêŋ jawiŋ aôm ma jakêŋ aôm ôlêwaŋ taôm.” 15 Ma Mose kêsôm gêdêŋ eŋ gebe “Aôm taôm embe ôsêlêŋ ôwiŋ aêac atom, go ôsakiŋ aêac awi gamêŋ tonec siŋ ma api ana atom. 16 Aôm embe ôsêlêŋ ôwiŋ aêac atom, go ajala amboac ondoc gebe aê to ŋoc lau ajac aôm matamanô ŋajam. Aôm embe ôsêlêŋ ôwiŋ aêac, go êwaka aê to nêm lau sa êndêŋ lau nomŋa ŋagêdô samob.”
17 Ma Apômtau kêsôm gêdêŋ Mose gebe “Biŋ tecenaŋ, taŋ aôm kôsôm naŋ, aê oc jaŋgôm ŋanô êsa, gebe aôm gôjac aê matocanô ŋajam ma aê kajala aômnêm ŋaê sugac.” 18 Mose kêsôm gebe “Aê jateŋ aôm gebe oc nêm ŋawasi lasê êndêŋ aê.” 19 Ma Apômtau kêsôm gebe “Aê gabe jakêŋ ŋoc ŋawasi êô lasê aôm laŋômnêmŋa ma jasôm ŋoc ŋaê lasê êndêŋ aôm ôŋô. Ŋoc ŋaê gebe Apômtau. Ma oc jamoasiŋ ŋac, taŋ gabe jamoasiŋ eŋ naŋ, to taêc walô ŋac, taŋ gabe taêc walô eŋ naŋ.” 20 Ma kêsôm teŋ gebe “Mago aôm ôtôm gebe ôlic aê laŋôcanô atom, gebe ŋac, taŋ êlic aê naŋ, oc êmoa mata jali atom.” 21 Ma Apômtau kêsôm gebe “Ôlic acgom, ŋasawa teŋ tec gêc kêdabiŋ aê. Ôpi mêŋôkô poc kapôêŋ ŋaô. 22 Ma êndêŋ aôm ôkô poc ŋasawa ma jaŋgandê aôm auc ŋa lemoc e jaôc lêlêc aôm su acgom, 23 go jakôc lemoc su e ôlic dêmôêctêkwa, mago ôlic laŋôcanô atom.”
