1 Ma Mose gejob lawa dabuŋwaga Midianŋa Jetro nê domba. Eŋ gêwê domba kêsa gamêŋ sawa kêsêlêŋ ec ŋêŋgeŋ e gêô lasê Anôtônê lôc Horeb. 2 Ma Anôtônê aŋela geoc tau lasê gêdêŋ eŋ ŋa jawaô. Ja ŋawaô tau kêsa gamêŋdani ŋalêlôm. Mose gêlic ja kêsa gamêŋdani, mago ja geŋ gamêŋdani tau su atom. 3 Ma Mose kêsôm gebe “Aê gabe jana najalic gêŋsêga tonec. Ja geŋ gamêŋdani su atom ŋam amboac ondoc.” 4 Apômtau gêlic eŋ kêdabiŋ gamêŋdani gebe êlic ŋam, tec Anôtô gêmôêc gêdêŋ eŋ aŋga gamêŋdani gebe “Mose, Mose.” Ma eŋ gêjô eŋ awa gebe “Aê tec gamoa.” 5 Go Anôtô kêsôm gebe “Ôtu gasuc ômôêŋ atom. Ônu nêm atapa su aŋga amtapa gebe gamêŋ, taŋ aôm kôkô naŋ, nom dabuŋ.” 6 Ma kêsôm teŋ gêwiŋ gebe “Tamamnê Anôtô aê, ma Abrahamnê Anôtô ma Isaknê Anôtô ma Jakobnê Anôtô aêgoc.” Mose gêsaŋ laŋôanô auc gebe kêtêc tau, gebe êlic Anôtô atom.

7 Go Apômtau kêsôm gebe “Aê galic ŋoc lau sêmoa jageo ŋanô aŋga Aiguptu. Aê gaŋô êsêac sêmôêc kêtu nêŋ gejobwaga kapoacwalôŋa sêlêsu êsêacŋa. Biŋŋanô, aê kajala êsêacnêŋ ŋandaŋ. 8 Aê kasêp gamêŋ gebe janam êsêac kêsi aŋga lau Aiguptu lemeŋ ma jawê êsêac sêwi gamêŋ tonaŋ siŋ nasêpi gamêŋ ŋajam to kapôêŋ teŋ. Aŋga gamêŋ tau tônê su to lêp keseleŋ. Galoc lau Kanaan to Het ma Amor to Peres ma Hib to Jebus sêŋgôŋ gamêŋ tau. 9 Aê gaŋô lau Israel nêŋ taŋi maŋkêsô aê taŋocsuŋ ma galic lau Aiguptu sejoŋ êsêac ŋanô. 10 Amboac tonaŋ aê gabe jasakiŋ aôm ôndêŋ Parao ôna gebe ôwê ŋoc lau Israel sêwi Aiguptu siŋ.”

11 Mago Mose kêsôm gêdêŋ Anôtô gebe “Aê asa, tec jandêŋ Parao jana ma jawê lau Israel sêwi Aiguptu siŋ nec.” 12 Anôtô gêjô eŋ awa gebe “Aê oc jawiŋ aôm. Ma gabe jakêŋ ŋabelo tonec êndêŋ aôm gebe ôjala, gebe aê tauc tec kasakiŋ aôm. Ŋabelo tau tonec gebe Êndêŋ taŋ ôwê lau sêwi Aiguptu siŋ su naŋ, oc anam sakiŋ Anôtô aŋga lôc tonec.”

13 Go Mose kêsôm gêdêŋ Anôtô gebe “Embe jandêŋ lau Israel jana ma jasôm êndêŋ êsêac gebe ‘Tameminêŋ Anôtô kêsakiŋ aê tec gamêŋ,’ ma êsêac embe têtu kênac aê gebe ‘Ênê ŋaê amboac ondoc,’ oc jasôm amboac ondoc êndêŋ êsêac.” 14 Go Anôtô kêsôm gêdêŋ Mose gebe “Aêŋoc ŋaê gebe Aê-Gamoa-Amboac-Gamoa.” Ma Anôtô kêsôm teŋ gêwiŋ gebe “Ôsôm biŋ tonec êndêŋ lau Israel gebe ‘Aê-Gamoa kêsakiŋ aê’ tec gadêŋ amac gamêŋ.” 15 Ma Anôtô kêsôm gêdêŋ Mose gêwiŋ gebe “Ôsôm êndêŋ lau Israel gebe ‘Apômtau, amac tameminêŋ Anôtô, Abrahamnê Anôtô ma Isaknê Anôtô ma Jakobnê Anôtô kêsakiŋ aê gadêŋ amac gamêŋ.’ Ŋaê tonec kêtu ŋoc ŋaê teŋgeŋ ma teŋgeŋŋa ma gôlôac to gôlôac wakuc samob aweŋ ênac aê ŋa ŋaê tonecgeŋ. 16 Ôna ma ôkalem lau Israel nêŋ laumata sa sêpi tageŋ, go ôsôm êndêŋ êsêac gebe ‘Apômtau, amac tameminêŋ Anôtô, geoc tau lasê gêdêŋ aê. Eŋ Abraham agêc Isak ma Jakob nêŋ Anôtô. Ma eŋ kêsôm gêdêŋ aê gebe “Aê gajac amac kêsi ma galic gêŋ samob, taŋ lau Aiguptu sêgôm gêdêŋ amac naŋ. 17 Tec aê taêc gêjam kêtu tôŋ gebe jawê amac awi gêŋwapac Aiguptuŋa siŋ ma aô lasê lau Kanaan to lau Het ma Amor to Peres ma Hib to Jebus nêŋ gamêŋ. Aŋga gamêŋ tônê su to lêp keseleŋ.” ’ 18 Lau Israel nêŋ laumata oc sêkêŋ taŋeŋ nêm biŋ ma sêwiŋ aôm andêŋ kiŋ Aiguptuŋa ana ma asôm êndêŋ eŋ gebe ‘Apômtau, Ebolainêŋ Anôtô, mêŋgêjam biŋgalôm gêwiŋ aêac, tec galoc ateŋ aôm gebe ôwi aêac siŋ gebe asêlêŋ bêc têlêac asa gamêŋ sawa ana ma akêŋ da êndêŋ aêacma Apômtau Anôtô.’ 19 Aê kajalagac gebe kiŋ Aiguptuŋa oc êwi amac siŋ atom e ŋaclai teŋ êkac eŋ acgom. 20 Amboac tonaŋ aê oc jamêtôc lemoc to janac Aiguptu ŋa gêŋtalô tokaiŋ-tokaiŋ aŋga gamêŋ tau. Gêŋtalô tau êmbacnê acgom, go êwi amac siŋ ana. 21 Aê jaŋgôm lau Aiguptu sêlic lau Israel ŋajam ma embe ana, go ana tolemem sawageŋ atom. 22 Amacnêm lauo samob êndêŋ-êndêŋgeŋ teteŋ nêŋ lauo sackapoac gêdêŋ tauŋŋa to lauo, taŋ sêŋgôŋ andu tageŋ sêwiŋ tauŋ naŋ, gebe sêkêŋ gêlôŋ silber to goldŋa ma ŋakwê êndêŋ êsêac. Ma amac akêŋ nêm latômio to ŋac sêsô to sênôŋ gêŋ tau. Amboac tonaŋ ajaŋgo gêŋ su aŋga lau Aiguptuŋa.”

<- EKSODUS 2EKSODUS 4 ->